Ermənilər Ağdam rayonunun kəndlərini atəşə tutmaqda davam edir (YENİLƏNİB)

Erməni tərəfinin intensiv artilleriya atəşi nəticəsində Ağdam rayonunda bir sakin həlak olub, beş nəfər yaralanıb.

Ağdam rayon polis şöbəsinin və prokurorluğun birgə məlumatında deyilir ki, bazar ertəsi saat 17:00-a yaxın Əhmədağalı kənd məscidinin yaxınlığında mərmi partlaması nəticəsində qəlpə yarası alan Qaraş Dadaşov (1954-cü ildə anadan olub) həlak olub.

Saat 16:00-da Sarıçoban kəndinə üç mərmi atılıb. Nəticədə yerli sakin İlqar Cəfərov yaralanıb.

Orta Qərvənd kəndinin atəşə tutulması nəticəsində Rəşad Heydərov (1989-cu il) və Fərhad Heydərov (1968-ci il) qəlpə yarası alıblar.

Saat 20:00-a yaxın Qaradağlı kəndində artilleriya zərbələrindən sonra yanğının söndürülməsi zamanı yanğın xidmətinin əməkdaşı Akif Mustafayev (1974-cü il) yaralanıb.

Səfərli kəndində Pakizə Məhərrəmova (2000-ci il) qəlpə yarası alıb.—06D--

2016 Aprel 05 (Çərşənbə axşamı) 13:02:03

Bu gün səhər saat 11:00-a yaxın erməni tərəfin artilleriya atəşi nəticəsində Həsənqaya kəndində yaşayan kəlbəcərli məcburi köçkün 16 yaşlı Turan Həsənli həlak olub.

Gənc qız evdə partlayan mərmi nəticəsində aldığı çoxsaylı qəlpə yarasından həlak olub. Bu barədə Tərtər polisinin və prokurorluğun birgə məlumatında deyilir.

Bu fonda erməni tərəfi Azərbaycanın yaşayış məntəqələrini atəşə tutmadığını bəyan edir.—06В--