Etirazçı cəzaçəkmə müəssisəsində azan oxumağa icazə verilməsi tələbinə görə cəzalandırılıb

Bakı/17.06.21/Turan: 6 saylı cəzaçəkmə müəssisəsinin may ayında aclıq aksiyası keçirən məhkumlarından biri Vəli Allahverdiyev iki ay müddətinə cərimə otağına salınıb. Bu barədə Turan-a onun anası Telnaz Allahverdiyeva bildirib.

Onun sözlərinə görə, Allahverdiyev mayın 13-də koronavirus şübhəsi ilə Penitensiar Xidmətinin Müalicə Müəssisəsinə aparılıb, oradan isə 2 saylı cəzaçəkmə müəssisəsinə köçürülüb.

“Karantin” bitdikdən sonra onu geri qaytarmalı idilər, amma iki ay müddətinə cərimə kamerasına salıblar. Bundan başqa, onu, Qopustan qapalı həbsxanasına göndərməklə hədələyirlər.

Penitensiar Xidmətdən şərh almaq mümkün olmayıb. Ananın sözlərinə görə, oğlu dindardır, cəzalandırılmasına isə məhkumun cəzaçəkmə müəssisəsində səsgücləndiricidən istifadə ilə azan oxumaq hüququ verilməsi tələbi səbəb olub.

Xatırladaq ki, Vəli Allahverdiyev mayın 12-də həbsxana mağazasında ərzaqların qiymətinin yüksək olmasına, məhkumlara verilən yeməyin keyfiyyətinin pis olmasına, rüşvətə və evdən bağlama gətirilməsinin qadağan edilməsinə etiraz əlaməti olaraq aclıq elan edən məhkumlar arasında idi. Həmin vaxt Penitensiar Xidmətin mətbuat xidməti cəzaçəkmə müəssisəsində belə bir aclıq aksiyasının keçirilməsi faktını təkzib etmişdi. -21D06-