Əvəz Zeynallı ombudsmana müraciət edib

 Həbsdə olan “Xural” qəzetinin redaktoru, vicdan məhbusu  Əvəz Zeynallı ombudsman Elmira Süleymanovaya məktub ünvanlayıb. 

Müəllif saxlandığı Bakı təcridxanasında saxlanma şəraiti nisbətən yaxşı olsa da mətbu, siyasi hüquqlarını pozulmasından, təcridxanadakı rüşvət mexanizmindən şikayət edir. Müttəhimlərin ailələri ilə görüşlərinə problem yaradıldığı, məktublaşmaların məhdudlaşdırıldığı, şikayət ərizələrinin ünvanlara çatdırılmadığı qeyd olunur.   

Redaktor iki-üç qat nəzarətdə saxlandığını, bu haqda mətbuata bildirsə də bu nəzarətin daha da artdığını nəzərə çatdırır, bu nəzarəti Vahid Əliyev adlı əməkdaşın həyata keçirdiyini bildirir. Beynəlxalq qurumların təmsilçiləri, ombudsman aparatının əməkdaşları ilə görüşünə imkan verilmədiyi deyilir. İyul ayında ATƏT təmsilçiləri ilə görüşə imkan verilmədiyi bildirilir.     

Redaktor şikayət məktublarının ünvanlara çatdırılmamasına diqqəti çəkir, Ədliyyə Nazirliyinə, Penitensiar xidmət, ombudsman aparatına göndərdiyi məktubların ünvanlara çatdırılmadığını bildirir, məktubların təcridxanada açıldığını qeyd edir. Vəkillə konfidensial görüşü pozduğu üçün Ə.Zeynallının vəkili təcridxana rəhbərliyini məhkəməyə verib.    

Redaktor ailəsi ilə görüşə icazə verilməməsinə diqqət çəkir və bunu qanunvericilik normalarının və hüquqlarının pozulması adlandırır.   

Ə.Zeynallı qeyd edir ki, 50-100 manat rüşvət əvəzində təcridxana rəhbərliyi istənilən şəxsə görüş verir və bu zaman hər hansı məktuba ehtiyac olmur. 

Daha sonra redaktor ombudsmana rəhbərliyə xəbər vermədən təcridxanaya gəlməyi tövsiyyə edir və bu görüşdə elementar hüquqlarının pozulması ilə bağlı müzakirə aparmaq istədiyini bildirir. 

Ə.Zeynallı 2011-ci il oktyabrın 28-də rüşvət ittihamı ilə həbs edilib, daha sonra ona qarşı məhkəmə qərarını yerinə yetirməkdən yayınma, vergi ödəməkdən yayınma kimi ittihamlar irəli sürülüb. -05D-