Əvəz Zeynallının polisə tabe olmamaqda günahlandırılır (YENİLƏNİB)

"Xural" qəzetinin baş redaktoru Əvəz Zeynallının polisin qanuni əmrinə tabe olmamaqda günahlandırıldığı bildirilir.

Bu barədə vəkil Elçin Sadıqov məlumat yayıb.

"Hazırda Əvəz Zeynallı Binəqədi Rayon Polis İdarəsinin müvəqqəti saxlama yerində saxlanılır. Sabah (dekabrın 20-də) onunla görüşəcəm. Hələ ki, onun cəzalandırılmasının əsasları ilə bağlı heç bir məlumat vermədilər. Əvəz Zeynallıya qarşı İnzibati Xətalar Məcəlləsinin 535.1-ci maddəsi ilə inzibati iş qaldırılıb (polisin qanuni əmrinə tabe olmama)", - deyə vəkil vurğulayıb.

* * *

2017 Dekabr 19 (Çərşənbə axşamı) 22:35:28

Əvəz Zeynallının polisə aparıldığı bildirilir

Bakı/19.12.17/Turan: "Xural" qəzetinin baş redaktoru Əvəz Zeynallının polisə aparıldığı bildirilir. Bu haqda jurnalistin həyat yoldaşı Məlahət Qisuri məlumat verib .

Onun sözlərinə görə, Əvəz Zeynallı hazırda Binəqədi rayon Polis İdarəsinin 4-cü polis bölməsindədir.

Xanımı Ə.Zeynallının saxlanılmasının səbəbləri barədə ehtimallarını da dilə gətirib.

"Uzun müddətdir ki, Əvəz Zeynallı sosial şəbəkələrdə canlı yayımla Binəqədi rayon polisinin əməkdaşlarının fəaliyyətinə toxunurdu. O, polislərin gərək oldu-olmadı, Binəqədi şossesində yolu bağladığını, minlərlə insanın onlarla kilometr yolu evlərinə piyada getməsindən bəhs edirdi. Bu gün də yollar heç bir xəbərdarlıq edilmədən bağlanıb, yolda çəkiliş etmək istəyən Əvəz vəzifəsi və kimliyi bilinməyən polis əməkdaşlarının təhqirinə məruz qalıb", xanımı bildirib.

Xanımının sözlərinə görə, jurnalistlə polis əməkdaşı arasında yaşanan mükalimənin ardınca, Ə.Zeynallı zorla 4-cü polis bölməsinə aparılıb.

Məlahət Qisuri Ə.Zeynallının cəzalandırılacağı ilə bağlı xəbərlər aldıqlarını da ifadə edib.

4-cü polis bölməsindən Ə.Zeynallının saxlanılması haqda bilgi almaq mümkün olmayıb. Bölmədən "Turan"a deyiblər ki, jurnalistin saxlanılması ilə bağlı məlumat almaq üçün Daxili İşlər Nazirliyinin mətbuat idarəsinə müraciət etmək lazımdır.

DİN-in mətbuat xidməti ilə danışmaq isə mümkün olmayıb.

Ə.Zeynallı 2002-ci ildən "Xural" qəzetinin baş redaktoru olub. O, Milli Məclisin keçmiş deputatı Gülər Əhmədovanın şikayəti əsasında 2011-ci il oktyabrın 28-də həbs edilib.

Hədə-qorxu gəlməklə külli miqdarda rüşvət almaq, daha sonra isə məhkəmə qərarlarını icra etməmək və vergidən yayınmaqda ittiham olunub.

Baş redaktor o zaman bütün ittihamları rədd etmişdi.

2014-cü il dekabrın 30-da prezidentin imzaladığı əfv sərəncamı əsasında azadlığa buraxılıb.