Əvəz Zeynallının səhhətində ciddi problemlər yaranıb

Reportyorların Azadlıq və Təhlükəsizlik İnstitutu (RATİ) barəsində həbs qəti-imkan tədbiri seçilmiş “Xural” qəzetinin baş redaktoru Əvəz Zeynallının səhhətinin pisləşməsi barədə xəbərlərdən ciddi narahatlıq keçirir. RATİ hesab edir ki, redaktorun həbsi Mülki və Siyasi Hüquqlar haqqında Beynəlxalq Paktın 19-cu maddəsinə ziddir və dərhal azad olunmalıdır. Ə. Zeynallının azad olunması qərarının veriləcəyini gözləyən RATİ redaktorra bütün lazımi tibbi yardımın göstərilməsinə, lazım gəlsə həbsxanadan kənarda tibb müəssisəsində müalicə olunmasına çağırır.

 Ə.Zeynallının səhhətinin ağırlaşması barədə məlumatı RATİ-nin qaynar xəttinə (+994 12 408 75 30) “Xural” qəzetinin direktoru Nizami Həsənov bildirib. N.Həsənovun sözlərinə görə, Penitensiar Xidmətin tibb-sanitar şöbəsinin məlumatında Ə.Zeynallının müayinəsi zamanı ona “xroniki hepatoxolesistit, hepatomeqaleya, böyrəkdə duzların kristallaşması, bel fəqərələrinin ostreanxondrozu, radikulinevralgiya, xroniki sobatrofik rinit” diaqnozu təyin edilib.

 Ə.Zeynallının səhhəti ilə bağlı Penitensiar Xidmətin tibb-sanitar hissəsi  onun ailə üzvlərinə rəsmi məlumat verib. N.Həsənovun sözlərinə görə, Ə.Zeynallı Penitensiar Xidmətin tibb-sanitar hissəsində müalicə alsa da səhhətində ciddi problemlər qalmaqdadır. Kürək nahiyəsində xala infeksiya düşdüyü üçün şiş əmələ gəlib, burun çəpərinin də təcili əməliyyata ehtiyacı var.

 Ə.Zeynallı 10 aydır Bakı İstintaq Təcridxanasında saxlanılır. O, deputat Gülər Əhmədovanın şikayəti əsasında 2011-ci il oktyabrın 28-də həbs edilib. Korrupsiyaya Qarşı Mübarizə İdarəsində baş redaktora cinayət məcəlləsinin 311.3.3 (külli miqdarda rüşvət alma) və 311.3.4-cü (hədə-qorxu tətbiq olunmaqla rüşvət alma) maddələri ilə cinayət işi başlanıb. Daha sonra isə ona cinayət məcəlləsinin 306-cı (məhkəmə qərarlarını icra etməmə) və 213-1-ci  (vergidən yayınma) maddələri ilə ittiham irəli sürülüb.

Bir çox beynəlxalq və yerli hüquq müdafiə qurumları bu ittihamları saxta sayaraq Ə.Zeynallının iqtidarı tənqid edən yazılarına görə həbs olunduğunu bildirilər.-05D-