Faiq Əmirovun işi üzrə məhkəmə prosesində

Bakı/04.07.17/Turan: Dünən Səbayel Rayon Məhkəməsində Aytən Əliyevanın sədrliyilə "Azadlıq" qəzetinin maliyyə direktoru Faiq Əmirovun işi üzrə məhkəmə prosesi davam edib.

Yerli müşahidəçilər, jurnalistlər və diplomatik missiyaların nümayəndəliklərinin iştirak etdiyi proses təyin olunduğu vaxtdan gec başlayıb.

Məhkəmədə ilk ifadəni polis əməkdaşı Həsən Əliyev verib. O bildirib ki, F.Əmirovu şəxsən tanımır. "Ötən ilin avqustunda operativ qrup yaradıldı və axtarış üçün bizi müəyyən edilmiş ünvana göndərdilər. Biz ünvana getdik, axtarış barədə qərarı ev sahibəsinə təqdim etdik. O bildirdi ki, özü şahidləri dəvət etmək istəyir. Biz etiraz etmədik. Biz şahidlərin iştirakı ilə axtarış apardıq və zirzəmidə diskləri tapdıq. Sonra məlum oldu ki, F.Əmirovun maşını var və biz orada da axtarış apardıq. Maşında da diskləri və kitabları tapdıq və götürdük".

Sonra prokuror şahidə suallar verib:

Axtarış zamanı Faiq evdə idi?

Xeyr. Həyat yoldaşı evdə idi?

F.Əmirov bildirir ki, kitabları və diskləri özləri qoyublar.

Bu, mümkün deyil. Şahidlər, hətta jurnalistlər axtarış zamanı bizim yanımızda olublar.

Sonra Vergilər Nazirliyinin nümayəndəsi şahidə sual verib:

Maşında F.Əmirovun qəzetin maliyyə direktoru olduğunu təsdiqləyən vəsiqə tapılıb?

Bu sual vəkil Aqil Layıcovun etirazına səbəb olub. "Onun işin mülki hissəsinə və vergi məqamlarına aid olmayan ittiham xarakterli suallar vermək hüququ yoxdur. Bu, birinci dəfə deyil ki, baş verir. Xahiş edirəm, sualı çıxarın". Hakim vəkilin xahişini təmin edib.

Sonra A.Layıcov suallar verib:

F.Əmirov saxlandıqdan neçə saat sonra axtarış aparmısınız?

Mən həbs barədə bilmirdim.

Maşın hansı rəngdə idi?

Yadımda deyil. Məncə, qara.

Bəlkə siz başqa maşında axtarış aparmısınız? Faiqin maşını qara rəngdə deyil.

Onun həyat yoldaşı maşını bizə göstərdi.

Siz öz ifadənizdə bu barədə deməmisiniz.

Maşının rəngini xatırlamıram, nə olsun?

Sonra hakim A.Əliyeva bildirib ki, şahid Elvin Quliyev səhhətilə əlaqədar məhkəməyə gələ bilməyəcək və məhkəməyə göndərdiyi teleqramda bildirib ki, istintaqa verdiyi ifadəsini təsdiqləyir.

Hakim tərəflərin fikrini öyrəndikdən sonra ifadəni oxuyub: "Mən kənd təsərrüfatı məhsullarının satışı ilə məşğul oluram və qəzetə elan vemək qərarına gəldim. Redaksiyaya getdim və orada Elşən adlı şəxslə görüşdüm. Ona 30 manat verdim. Biz hər ay 300 manat ödəmək barədə razılığa gəldik. Mən 100 manat ödədim və buna görə qəbz almadım".

Bundan sonra hakim məhkəməyə məcburən gətirilməli olan şahidlərin gəlib-gəlmədiyini soruşdu. Məlum oldu ki, onlar bu dəfə də gəlməyiblər.

Prokuror onların istintaq zamanı verdikləri ifadələrin açıqlanmasını xahiş edib. Hakim vəkillərin fikrini öyrənib və A.Layıcov bildirib ki, bununla bağlı vəkil Fəxrəddin Mehdiyevlə məsləhətləşməlidir. Ancaq o, səhhətilə əlaqədar iştirak etmir. Hakim bildirib ki, bu, səbəb deyil və şahid ifadələri ilə tanış olmaq üçün vaxt verə bilər. Vəkil vaxt istəyib və hakim vəsatəti təmin edib. Növbəti proses iyulun 4-nə təyin edilib.

Ancaq bu gün məhkəmə təxirə salınıb.0-