Fenol Padarda faciələr törətməkdə davam edir

QHT-lərin Vətəndaş Nəzarəti Şəbəkəsinin (VNŞ) rəhbəri Əli Məmmədov Hacıqabul rayon Padar qəsəbəsində kimyəvi birləşmə olan fenolla bağlı hadisələrin faciəli xarakter aldığını bildirir. 

Hadisənin tarixinə toxunan Ə.Məmmədov deyib ki, 1986-cı ildə bu kimyəvi üzvi birləşmə termoz tipli sisternlərdə daşınıb. Qatarın aşması nəticəsində bu sistern qəsəbə tərəfə düşüb. Daha sonra həmin fenol dolu sisterni torpağa basdırıblar. Müəyyən müddət hər-hansı problem olmayıb. İki ay öncə isə onun qoxusu qəsəbədə hiss olunmağa başlayıb. Bu haqda ekologiya nazirliyinə məlumat verilib. Yerə baxış keçirən nazirliyin əməkdaşları bu işə Fövqəladə Hallar Nazirliyinin (FHN) cəlb olunmasını təklif ediblər. FHN ərazini yoxlayaraq, sisterndə korroziya nəticəsində sızma baş verdiyini və fenolun qəsəbənin torpaq qatına hopduğunu təsdiqləyib. Torpaq qatını fenoldan təmizləmək üçün 4 metr dərinlikdə torpaq qatı götürülməli, həmin yerə ekoloji baxımdan təmiz torpaq tökülməldir. FHN nə etmək lazım olduğunu bildirib, amma nəticənin aradan qaldırılması üçün əməli tədbir görməyib.      

Torpaq qatında olan fenolun qoxusu hava sakit olanda hiss edilmir. Amma səhər və axşam çağlarında azacıq külək olanda belə bu qoxu özünü göstərir və insnaların səhhətinə ölümcül təsir edir. Belə ki, çərşənbə günü qəsəbəyə səfər edən Şəbəkə təmsilçilərinə qəsəbə sakinlərindən birnin fenolla zəhərlənmə nəticəsində dünyasını dəyişdiyi deyilib. Kənd sakinləri, mərhumun qonşuları ölüm hadisəsinin nəfəs yollarının tutularaq boğulma verməsi nəticəsində törəndiyini deyiblər. Kənd sakinləri əsasən kiçik yaşlı məktəblilər arasında zəhərlənmə, ürək tutmaları, qusma və qıc olma hallarının geniş yayıldığını nəzərə çatdırıblar. Qəza yerinə yaxın evlərdə yaşayanlar bu təsirlərə daha güclü məruz qalırlar. Fenolla zəhərələnmə haqqında “Zerkalo” qəzeti ətraflı məqalə dərc edib. 

Durumun təəssüf doğuran hissəsi budur ki, sakinlər qəzanın nəticələrinin aradan qaldırılması ilə bağlı ölkə başçısına müraciət etmək haqda Şəbəkə təmsilçilərinin təklifini müsbət saymayıblar. Bələdiyyə sədri və İcra nümayəndəsi iş yerində olmadığı üşün Şəbəkə təmsilçiləri onlarla danışıqlar apara bilməyiblər. -05B-