Fuad Əhmədli: Mənim bir vəzifəm var - haqq, ədalət uğrunda mübarizə aparmaq (YENİLƏNİB)

Bakı/25.04.17/Turan: Aprelin 25-də Bakı Ağır Cinayətlər Məhkəməsində hakim Fikrət Qəribovun sədrliyi ilə Azərbaycan Xalq Cəbhəsi Partiyasının (AXCP) fəalı Fuad Əhmədlinin işi üzrə hazırlıq iclası keçirilib. Məhkəmə baxışı mayın 2-də saat 10.30-a təyin edilib.

Fuad Əhmədli 2016-cı il avqustun 18-də saxlanılıb. Dövlət Təhlükəsizlik Xidməti və Baş Prokurorluq bildirib ki, F.Əhmədli “Azərfon” MMC-də çalışdığı müddətdə abonentlərin şəxsi məlumatlarını üçüncü şəxsə ötürüb.

Həmçinin bildirilib ki, F.Əhmədlinin mənzilində axtarış zamanı Türkiyəli din xadimi Fətullah Gülənin çıxışlarının olduğu kitablar, CD-disklər tapılıb.

Martın 6-da F.Əhmədlinin barəsində ittiham Cinayət Məcəlləsinin 302.1-ci maddəsindən (əməliyyat-axtarış fəaliyyəti haqqında qanunvericiliyin pozulması) 308.1-ci maddəsinə (vəzifə səlahiyyətlərindən sui-istifadə) tövsif edilib.

F.Əhmədli ittihamı rədd edir. Əgər əvvəlki ittiham üzrə F.Əhmədlini 3 il həbs gözləyirdisə, yeni maddələrlə onu 8 ilədək həbs cəzası gözləyir.

Bugünki hazırlıq iclası zamanı zalda olan tərəfdarları Fuad Əhmədlini alqışlarla qarşılayıblar.

Vəkil Əsabəli Mustafayev cinayət işinin icraatının dayandırılması, işə xitam verilməsi, Fuad Əhmədliyə bəraət verilməsi və nəhayətdə həbs-qətimkan tədbirinin ev dustaqlığı ilə əvəz edilməsi barədə vəsatətlər qaldırıb. 

Dövlət ittihamçısı Anar Tanrıverdiyev vəsatətlərin təmin edilməməsini istəyib və hakim vəsatətləri təmin etməyib.

Vəkil bildirib ki, Fuad Əhmədliyə qarşı irəli sürülən  ittiham əsassızdır və istintaq qanunsuz aparılıb.

“Cinayət materiallarından görünür ki, Fuad Əhmədliyə ittiham elan edildikdən 6 ay sonra guya zərəçəkmişlər tapılıb. Zərəçəkmiş yox idisə, ittiham hansı əsasla irəli sürülüb? Guya müstəntiq zərərçəkənlərə məlumat verəndə onlar həyacan keçirib. Həyəcan keçirilsə belə, bu, cinayət tərkibi yaratmır. Amma Fuad Əhmədliyə qarşı irəli sürülən ittihamlar ağır cinayətlər kateqoriyasına aiddir. Bunlar istintaqın necə aparıldığından xəbər verir”, deyə o qeyd edib.

Vəkil hesab edir ki, Fuad Əhmədli vəzifəli şəxs olmadığı halda ona qarşı Cinayət Məcəlləsinin 308-ci (vəzifə səlahiyyətlərindən sui-istifadə) maddəsi ilə ittiham irəli sürülüb.

“Fuad Əhmədliyə qarşı 308-ci maddə ilə cinayət işi qaldırılması sadəcə absurddur. O, operator olub, zənglərə cavab verib. Onun hərəkətləri üçüncü şəxsə qarşı hüquqi məsuliyyət yaratmır və o, vəzifəli şəxs sayıla bilməz. Əslində onda hər hansı məxfi və fərdlərə aid məlumat olmayıb. İstintaq materiallarında yazılır ki, Əhmədli məxfi məlumatlar toplanan avadanlıqla məlumat toplayıb. Onda yalnız abonentlərin ad-familiyası, telefon nömrələri olub. Bunlar açıq məlumatlardır. Şirkət isə hansı avadanlığı veribsə, Fuad da həmin avadanlıqla işləyib”, deyə Mustafayev qeyd edib.

Vəkil istintaq müddətinin 8 ay çəkməsindən də  narazıdır.

“İttiham aktında araşdırılmalı bir şey yoxdur. Amma istintaqı xüsusi olaraq 10 nəfərdən ibarət, tərkibində prokurorluğun, Dövlət Təhlükəsizlik Xidmətinin müstəntiqləri olan istintaq qrupu aparıb. Bu qədər adam istintaq aparıb, amma ittiham sübut olunmayıb. Məhkmənin də özünə əziyyət verməməsini, işə xitam verməsini xahiş edirəm”, deyə Mustafayev bildirib.

Fuad Əhmədli də ittihamın əsassız və sifarişli olduğunu bildirib.

“Mən vəzifəli şəxs deyiləm. Mənim bir vəzifəm var, haqq, ədalət uğrunda mübarizə aparmaq vəzifəm. Liderim də burada, zalda oturub”, deyərək o zalda olan AXCP sədri Əli Kərimlini göstərib.

Bu zaman sədrlik edən hakim Fikrət Qəribov Fuad Əhmədlinin sözünü kəsib və mahiyyəti üzrə danışmasını istəyib.

“Siz televiziyaya, qəzetə müsahibə vermirsiniz”, deyə hakim qeyd edib.

Fuad Əhmədli isə məhkəmədə  özünü müdafiə etmək hüququnun olduğunu və çıxışını qurmaqda sərbəst olduğunu məhkəmə heyətinin diqqətinə çatdırıb.

Vəkilin müdaxiləsindən sonra Əhmədli çıxşını davam etdirib.

“Mən Azərfon”a işə qəbul olunarkən imza atmışam ki, şirkətdaxili məlumatları belə sosial şəbəkələrdə yamayacağam, üçüncü şəxsə verməyəcəyəm. Məlumatları yalnız birbaşa mənim işimə rəhbərlik edən Şahin Əfəndiyevə çatdırmışam. Həmçinin şirkətdaxili monitorinq qrupu işləyirdi, qaydaları pozma halı aşkarlandıqda həmin işçi inzibati qaydada cəzlandırılır və ya əmək haqqından kəsilirdi. Bunlar mənə qarşı baş verməyib, deyə o qeyd edib.

Fuad Əhmədli həbsinin sifarişli olduğunu deyib.

“Buna sübut kimi deyə bilərəm ki, Apellyasiya Məhkəməsi hələ başa çatmamış müstəntiq zəng etdi ki, səninlə istintaq təcridxanasında istintaq hərkətləri apacağıq”, deyə o bildirib.

Fuad Əhmədli şüşə qəfəsdə olsa da, Turan-ın müxbiri onunla qısa söhbət edə bilib.

O, sağlamlığında problem olmadığını, saxlanma şəraitinin normal olduğunu deyib.

“Ancaq təcridxanada gecə saat 12-dən sonra  rozetkalara gələn elektrik cərəyanını kəsirlər. Bu səbədən də məhbuslar çay qoya bilmir. Görünür, elektrikin qiyməti bahalaşıb, qənaət rejimində işləyirlər”, deyə Əhmədli Turan-a bildirib.

Hazırlıq iclasından sonra vəkil Əsabəli Mustafayev Turan-a deyib ki, Fuad Əhmədlinin hərəkətində cinayət hadisəsi və cinayət tərkibi yoxdur.

“Səkkiz ay istintaq getdi, heç nə sübut edilmədi. Bir neçə iclas keçirməklə, məhkəmə də bunu sübut edə bilməz. Lakin bu, siyasi yönümlü bir işdir. Bunu o gəstərir ki, Fuad Əhmədli həbs olunduğu ilk gündə Dövlət Təhlükəsizlik Xidmətinin və Baş Prokurorluğun yaydığı məlumatda birbaşa göstərilib ki, Azərbaycan Xalq Cəbhəsinin üzvü Fuad Əhmədli həbs edilib. Göründüyü  kimi Əhmədlinin siyasi mənsubiyəti qeyd olunub. Bu, özü də açıq-aşkar nümayiş etdirir ki, Fuad Əhmədli niyə həbs olunub, istintaq nə üçün aparılır”, deyə o qeyd edib.

Onun sözlərinə görə, yaxın zamanda Avropa İnsan Hüquqları Məhkəməsi Fuad Əhmədlinin qanunsuz həbsi ilə bağlı şikayət üzrə kommunikasiyaya başlayacaq.

AXCP sədri Əli Kərimli isə bildirib ki, Fuad Əhmədliyə qarşı başlanmış cinayət işi repressiv rejimin Azərbaycanın əqidəli, mövqeli, savadlı gəncliyi ilə mübarizəsinin bir epizodudur.

“Müxtəlif bəhanələrlə Azərbaycan gənclərini repressiyaya məruz qoyurlar. Ölkənin sərvətlərini talan edirlər. Korrupsiya virusu ilə bütün dünyanı yoluxdurub ölkəni bədnam edirlər”, deyə o qeyd edib.

O, Fuad Əhmədlinin həbsinin səbəblərindən danışarkən deyib ki, həbsə səbəb onun ölkənin yaxşıya doğru dəyişməsi üçün mübarizə aparmasıdır.

“Azərbaycan gəncliyini bu yolla qorxutmaq istəyirlər. Amma reaksiyalar göstərir ki, onların bu cəhdi bumeranq kimi qayıdıb özlərinə dəyir. Fuad Əhmədlinin artan nüfuzu onu gəstərir ki, Azərbaycan gəncliyi mübarizə yolunu seçənləri seçir”, deyə Kərimli qeyd edib.

Öz növbəsində, rəsmi Bakı ölkədə hamının qanun qarşısında bərabər olduğunu, siyasi məqsədlərlə heç kimin həbs edilmədiyini bildirir. -03C-

*   *   *

2017 Aprel 25 (Çərşənbə axşamı) 14:19:45

Fuad Əhmədlinin işi üzrə hazırlıq iclası

Bakı/13.04.17/Turan: Çərşənbə axşamı Bakı Ağır Cinayətlər Məhkəməsində Fikrət Qəribovun sədrliyi ilə Xalq Cəbhəsi Partiyasının (AXCP) fəalı Fuad Əhmədlinin işi üzrə hazırlıq iclası keçirilib.

Vəkil Əsabəli Mustafayev cinayət icraatına xitam vermək və qətimkan tədbirini dəyişdirmək barədə vəsatət qaldırıb, amma hər iki vəsatət təmin edilməyib.

“Biz belə hesab edirik ki, F.Əhmədli hər hansı cinayətə yol verməyib, odur ki, cinayət işi ləğv edilməli, F.Əhmədli azadlığa buraxılmalıdır”, deyə vəkil bildirib.

Hakim Fikrət Qəribov vəsatəti təmin etməyib. Daha sonra vəkil qətimkan tədbirini ev dustaqlığı ilə dəyişdirməyi xahiş edib.

İstintaq F.Əhmədlinin həbsdə saxlanmasını “qaçıb gizlənməsi”, “istintaqa təzyiq etməsilə” əsaslandırırdı. Amma indi istintaq yekunlaşıb və ittiham tərəfin əsası qalmayıb. Amma hakim bu vəsatəti də təmin etməyib.

Növbəti iclas mayın 2-nə təyin edilib.

* AXCP fəalı Fuad Əhmədli 2016-cı il avqustun 18-də həbs edilib. O, CM-in 302 (əməliyyat-axtarış fəaliyyəti haqqında qanunvericiliyin pozulması) və 308-1-ci (vəzifə səlahiyyətlərindən sui-istifadə) maddələri ilə ittiham olunur.

Baş Prokurorluğun və Dövlət Təhlükəsizlik Xidmətinin birgə bəyanatında “Azərfon” MMC-nin “Zəng mərkəzi”ndə operator işləyən Əhmədli gizli məlumatların xususi şəxslərə ötürülməsində ittiham olunub.

Əhmədli həmçinin Türkiyədə dövlət çevrilişi hazırlamaqda ittiham olunan ilahiyyatçı Fətullah Gülənin şəbəkəsi ilə əlaqəsi olan şəxs adlandırılıb. F.Əhmədlinin mənzilində axtarış zamanı türkiyəli din xadimi Fətullah Gülənin çıxışlarının olduğu kitablar, CD-disklər tapıldığı iddia olunur.

Martın 6-da F.Əhmədlinin barəsində ittiham Cinayət Məcəlləsinin 302.1-ci maddəsindən (əməliyyat-axtarış fəaliyyəti haqqında qanunvericiliyin pozulması) 308.1-ci maddəsinə (vəzifə səlahiyyətlərindən sui-istifadə) tövsif edilib.

Amma Əhmədli bütün bu ittihamı təkzib edir, onu saxta və siyasi motivli hesab edir.

Hüquq-müdafiə təşkilatları onu siyasi məhbus kimi tanıyıb. -05B06-