Fuad Ələsgərov məşhur hüquq müdafiə təşkilatlarına qarşı mübarizəyə çağırıb

Azərbaycan Prezident Administrasiyasının hüquq-mühafizə orqanları ilə iş şöbəsinin müdiri Fuad Ələsgərov məşhur beynəlxalq hüquq-müdafiə təşkilatları – “Freedom House”, “Human Rights Watch”, “Amnesty İnternational” və “Transparency İnternational” ilə əməkdaşlığa son qoymağa çağırıb.

Martın 17-də hakim Yeni Azərbaycan Partiyasının (YAP) beynəlxalq əlaqələr komissiyasının iclasında çıxış edən Ələsgərov bu təşkilatları Azərbaycana qarşı “ikili standartlar” tətbiq etməkdə ittiham edib. Onun sözlərinə görə, sözügedən təşkilatların hesabatları reallığı əks etdirmir.

YAP-dakı mənbələrin verdiyi məlumata görə, Ələsgərov bildirib ki, belə təşkilatlarla əməkdaşlıq etməmək, “onlara qarşı mübarizə aparmaq və Azərbaycan haqqında yalan məlumatların yayılmasının qarşısını almaq” lazımdır.

Eyni zamanda, Ələsgərov partiya üzvlərini YAP-ın beynəlxalq əməkdaşlıq coğrafiyasını genişləndirməyə və Şimali və Cənubi Amerika ölkələrini bu coğrafiyaya daxil etməyə çağırıb.

Ələsgərov həmçinin Avropanı iki istiqamətə - Qərbi və Şərqi Avropaya bölməyi təklif edib.

Qeyd edək ki, Azərbaycan hakimiyyəti “Freedom House”, “Human Rights Watch”, “Amnesty İnternational” ilə heç vaxt əməkdaşlıq etməyib və həmişə Azərbaycana qarşı “qeyri-obyektiv” münasibətə görə kəskin şəkildə tənqid edib.

Maraqlıdır ki, əvvəllər Bakı Transparency İnternational ilə əməkdaşlıq edirdi, Ələsgərov özü isə dəfələrlə onun “korrupsiyaya qarşı uğurlu mübarizəni göstərən” hesabatlarına istinad edib.

Ələsgərov təşkilatın “2013-cü il Qlobal Korrupsiya Barometri” hesabatını belə qiymətləndirib: “Hesabat bir daha Azərbaycanda korrupsiyaya qarşı mübarizə sahəsində böyük uğurlar olduğunu təsdiq edib. Bununla əlaqədar olaraq hesabatdan iki statistik göstəriciyə istinad etmək istərdim. Azərbaycanda rəyi soruşulanların 68%-i ölkədə korrupsiyaya qarşı mübarizə üzrə görülən tədbirləri səmərəli hesab edir. Bu göstərici başqa ölkələr üçün olan orta göstəricidən – 22%-dən üç dəfə çoxdur. Başqa bir misal dünyada korrupsiyanın səviyyəsi ilə bağlıdır. Bütün dünyada respondentlərin 50%-dən çoxu hesab edir ki, son bir ildə ölkədə korrupsiyanın səviyyəsi iki dəfə artıb. Azərbaycanda isə rəyi soruşulanların 73%-i hesab edir ki, ölkədə korrupsiyanın səviyyəsi artmayıb”. -06В-