Gədəbəy rayonunun keçmiş icra başçısının məhkəmə prosesi

Bakı/15.01.19/Turan: Bakı Ağır Cinayətlər Məhkəməsində Eldar İsmayılovun sədrliyilə Gədəbəy rayonunun keçmiş icra başçısı Saleh Rüstəmovun, onun qardaşı oğlu Vidadi Rüstəmovun və Azərbaycan Xalq Cəbhəsi Partiyasının (AXCP) üzvləri Babək Həsənov, Aqil Məhərrəmov və Ruslan Nəsirovun işi üzrə prosees keçirilib.

Onlar AXCP-nin qeyri-leqal maliyyələşdirilməsində ittiham olunurlar.

Müttəhimlərin anket məlumatları açıqlandıqdan sonra sədrlik edən hakim onların vəkillərini təqdim edib. Bundan sonra S.Rüstəmovun vəkili Bəhruz Bayramov müdafiə etdiyi şəxsin qardaşının və həyat yoldaşının əlavə şahid qismində dindirilməsi barədə vəsatət qaldırıb.

Belə ki, S.Rüstəmovun sözlərinə görə, o, avtomobildə ailə üzvləri ilə birlikdə gələrkən patrul postunun yaxınlığında saxlanılıb. Ancaq istintaq S.Rüstəmovun Şəmkir şəhər parkında saxlandığını bildirir.

Bundan əlavə, vəkil Nəqliyyat, Rabitə və Yüksək Texnologiyalar Nazirliyinə vəsatətlə müraciət edərək S.Rüstəmova məxsus mobil nömrə vasitəsilə həmin an onun olduğu yerin müəyyən edilməsini xahiş edib. Dövlət ittihamçısı Əli Əliyev məhkəmədən vəsatətlərin təmin olunmamasını xahiş edib. Qısa məşvərətdən sonra məhkəmə heyəti vəkilin vəsatətinin irəlidə baxılması üçün təxirə salınması barədə qərar qəbul edib.

Vidadi Rüstəmovun vəkili Orxan Yusubov vəsatətlə məhkəməyə müraciət edərək müdafiə etdiyi şəxsin ev dustaqlığına keçirilməsilə bağlı həbs qətimkan tədbirinin dəyişdirilməsini xahiş edib. Bundan əlavə, vəkil məhkəmədən xahiş edib ki, onun doğmaları ilə görüşünün və telefon zənglərinin təmin olunması üçün Bakı İstintaq Təcridxanasına məktub göndərilsin. Vəkil məhkəmədən V.Rüstəmovun S.Rüstəmovun işi üzrə şahid kimi dindirilməsinə dair protokolun iş materiallarından çıxarılmasını xahiş edib. Çünki dindirmə vəkilin iştirakı olmadan keçirilib. Birinci vəsatəti təmin etməyən hakim ikinci vəsatəti təmin edib, üçüncünü baxılmaq üçün təxirə salıb.

Vəsatətlərin verilməsi və baxılması başa çatdıqdan sonra söz prokurora verilib. O, ittiham aktını oxuyub. Bundan sonra müttəhimlərdən özlərini müqəssir hesab edib-etmədiklərini soruşub. Beşi də mənfi cavab verib. Bundan sonra məhkəmə müttəhimlərin dindirilməsinə başlayıb.

Saleh və Vidadi Rüstəmovlar ilkin mərhələdə ifadə verməkdən imtina ediblər. Ona görə də məhkəmə Babək Həsənovun ifadəsini dinləyib.

Öncə o, məhkəmədən xahiş edib ki, növbəti iclasları böyük zalda keçirsinlər: "Ona görə ki, burada baş verənlərə daha çox adam şahid olsun".

Bundan sonra B.Həsənov ifadə verib: "2018-ci il mayın 25-də taksi kimi istifadə etdiyim şəxsi avtomobilimdən müştərini Nərimanov metro stansiyasının yanında düşürdüm. Həmin vaxt mənim maşınımın qarşısını iki avtomobil kəsdi. Onlardan mülki geyimli 8-10 nəfər çıxdı. Onlar məni maşından çıxmağa məcbur etdilər. Mən xahiş etdim ki, sənədlərini təqdim etsinlər, ancaq onlar buna diqqət etmədilər və məni öz maşınlarına oturmağa məcbur etdilər. Bildirdilər ki, məni Baş Mütəşəkkil Cinayətkarlıqla Mübarizə İdarəsinə aparacaqlar. Bunun səbəbləri barədə sualıma cavab vermədilər. Bir müddət sonra məlum oldu ki, məni axtarış aparmaq üçün evə, Yeni Günəşli qəsəbəsinə aparırlar. Buna qədərsə məni təxminən iki saat şəhərdə gəzdirdilər. Axtarışdan sonra məni idarəyə gətirdilər və telefonun kodunu tələb etdilər. Mən imtina etdim və vəkil tələb etdim. Bundan sonra məni xüsusi otağa saldılar və elektrik cərəyanı ilə işgəncə verdilər. Sonda dözməyərək şifrəni verdim. Sonra etirafedici ifadə verməyimi tələb etdilər, mən bunu da etdim. Hazırda ümumi məbləği 1100 manat həcmində pulu çatdırmağımla bağlı üç faktı etiraf edirəm. Bundan əlavə, heç kimə heç nə verməmişəm. Dörd gündən sonra məni Kürdəxanıya təcridxanaya apardılar".

Sonra prokuror və vəkillər B.Həsənova S.Rüstəmovu haradan tanıması, pulları verərkən qəbz alması və s. barədə suallar veriblər. B.Həsənov deyib ki, V.Rüstəmov ona telefon edərək görüşməyi xahiş edib. Görüş zamanı pulu zərfsiz, açıq şəkildə verib və o, bunu AXCP sədri Əli Kərimliyə aparıb. O qeyd edib ki, S.Rüstəmovu cəmi bir dəfə, Cəmil Həsənlini rayona toya apararkən görüb.

Növbəti proses 22 yanvar saat 14:00-a təyin edilib.--0--