Media-icmal 16.01.19

Ölkədə aparılan islahatlarda prezidentin rolu, əmanətlərin sığortalanması müddətinin başa çatmaqda olmasına baxış, M.Rəsulzadə barelyefinin oğurlanmasına münasibət bugünki (16 yanvar, 2019-cu il ) medianın aparıcı mövzularındadır...

Ən islahatçı preizdent, ən islahatçı ölkə

"Azərbaycan" qəzeti "Ən islahatçı Prezident" sərlövhəli məqalədə ölkədə başlayan struktrur islahatlarında dövlət başçısının rolunu dəyərləndirir.

Müəllif həmin islahatların başlaması anonsunu dövlət başçısı İlham Əliyevin Nazirlər Kabinetinin "2018-ci ilin sosial-iqtisadi inkişafının yekunlarına və qarşıda duran vəzifələrə" dair yanvarın 11-də keçirilmiş iclasında verdiyini xatırladır: "İndi struktur islahatı gözlənilir. Çünki indi idarəetmədə struktur köhnəlib. Yeni idarəetmə strukturu olmalıdır - daha çevik, daha yığcam, daha məqsədyönlü".

Yazı müəllifi deyir ki, yanvarın 14-də isə dövlət başçısı artıq struktur islahatları istiqamətində fərmanlar imzalayıb, bu sənədələrə əsasən, bir neçə qurum ləğv olunub, bəzi təşkilatların fəaliyyətləri özünümaliyyələşdirmə prinsipi əsasında yenidən təşkil edilir.

Müəllifə görə, bu strukur islahatları Azərbaycanın dinamik inkişafı, iqtisadi və sosial sferada əsaslı pozitiv dəyişikliklərin həyata keçirilməsi, çevik və məqsədyönlü fəaliyyət göstərən yeni idarəetmə strukturunun formalaşdırılması üçün zəruridir.

Yazıda deyilir ki, Prezidentin həyata keçirdiyi struktur islahatları məhz idarəetmə sisteminin təkmilləşməsinə xidmət edir: "Bu islahatlar nəticəsində idarəetmə sistemindəki paralelliyin və təkrarlığın aradan qaldırılması, dinamik, mobil, daha çevik, operativ idarəçilik mexanizminin formalaşması həyata keçirilir".

Müəllif 2018-ci ildə də yeni rekordlara imza atılmasına səbəb kimi Prezidentin güclü siyasi iradəsi və dəstəyi sayəsində ölkədə aparılan kompleks islahatları göstərir.

Yazı müəllifinin fikrincə, buna görə, Dünya Bankının "Doing Business-2019" hesabatı İlham Əliyevi ən islahatçı Prezidenti, Azərbaycanı isə dünyanın ən çox islahat aparan ölkəsi elan edib.

Yazı müəllifi vurğulayır ki, dövlət aparatının optimallaşması, paralel strukturların aradan qaldırılması və mövcud strukturların yenidən təşkili büdcə vəsaitinə qənaət, dövlət və bazar tənzimlənməsinin optimal nisbətini müəyyən edərək, özəl sektorun lokomotiv olduğu iqtisadi inkişafı təmin etmək deməkdir.

Müəllif vurğulayır ki, islahatlar zamanı iş yerləri ilə təminat diqqətdə saxlanılır və fəaliyyəti dayandırılmış strukturların əməkdaşları üçün yenidən işlə təmin olunmaq imkanları maksimum təmin olunur.

Məqalənin sonunda isə oxuyuruq: "Struktur islahatları ilə bağlı Prezident İlham Əliyevin qəbul etdiyi qərarlar bir daha göstərir ki, Azərbaycanda çevik idarəetmə sisteminə böyük maraq var və dövlət başçısı bu siyasəti davam etdirəcək".

Əgər sığortalanma müddəti uzadılmasa

"Yeni Müsavat" qəzetində isə "Müddət uzadılmayacağı təqdirdə 4 martdan sonra bağlanacaq bankda 30000 manatdan çox əmanət saxlayanlar faktiki olaraq bu məbləğdən çox olan hissəni itirəcəklər" sərlövhəli məqalə oxumaq olar.

Müəllif deyir ki, hüquqşünas Əkrəm Həsənov ölkə banklaırnda əmanətlərin tam sığortalanması ilə bağlı 2016-cı ildən qüvvədə olan 3 illik müddətin martın 4-də başa çatmaqda olması, qalan iki aya yaxın vaxt ərzində hökumətin hər hansı qərarı olmadığı halda əmanətlərin tam sığrotalanmasının ləğv olunacağı xəbərdarlığı edir.

Hüquqşünas deyir ki, milli valyutadakı əmanətinin illik dərəcəsi 15%-dən, xarici valyutadakı əmanətinin illik faizi 3%-dən yuxarı olmayan əmanətlər martın 4-nə kimi tam sığortalıdır.

Amma həmin müddət başa çatdığı, artırılmadığı və ya bank bu il martın 4-dən sonra ləğv edildiyi halda əmanətçi hansı yüksək məbləğ qoymuş olsa da, 30 min manat kompensasiya ala biləcək.

Ə.Həsənov həm də deyir ki, Strateji Yol Xəritəsinə uyğun olaraq, bankların sağlamlaşdırılması prosesi 2018-ci ilin sonunadək başa çatdırılmadığı üçün hələ bankların bağlanması təhlükəsi qalır.

Mövzu ilə bağlı "Yeni Müsavat"a açıqlama verən iqtisadçı-ekspert Vüqar Bayramov bu müddətin uzadılmasını məqbul sayır, əks halda mənfi nəticələri olacağı xəbərdarlığı da edir: "Hələ martın 1-nə qədər zaman var və həm də bu müddətin uzadılmasına ehtiyac var. Əgər müddət uzadılmasa, bu, banklardan depozitlərin geri çəkilməsinə gətirib çıxara bilər. Xüsusən də böyük məbləğdə depozitlərin sığortalanması həyata keçirilməyəcək".

V.Bayramovun sözlərinə görə, qanunun müddəti uzadılmadığı halda istənilən məbləğdə olan əmanətlərin 30 min manatdan yuxarı hissəsi sığortalanmayacaq.

Ekspert riski aradan qaldırmaq üçün və müddət uzadılmadığı halda vətəndaşlara çıxış yolu kimi vəsaiti 30 min manatadək olmaq şərtilə bir neçə fərqli banklarda yerləşdirməyi təklif edir

V.Bayramov əmanətçilərə belə bir məqamı da xatırladır ki, gələcəkdə manatın məzənnəsində dəyişikliklər baş verərsə, o zaman 30 min manatın ekvivalenti sığortalanır, bu isə daha az məbləğdə valyutanın sığortalanması deməkdir.

Bankların bağlana bilməsinə gəlincə, V.Bayramov deyir ki, indi Maliyyə Bazarlarına Nəzarət Palatası problemli bankların sağlamlaşdırılmasını prioritet sayır: "Amma bütün hallarda müşahidələrimiz göstərir ki, problemli kreditlərin artması bank sektoruna və bəzi bankların fəaliyyətində mənfi tendensiyanın qalmasına gətirib çıxarır.

Rəsulzadənin 135 illiyinə az qalmış...

"Modern.az"da isə "Bu məsələ belə qalmamalıdır - Rəsulzadənin barelyefinin oğurlanmasına sərt etiraz" sərlövhəli məqalə diqqət cəlb edir.

Müəllif 1918-20-ci illərdə mövcud olmuş Azərbaycan Xalq Cümhuriyyətinin lideri Məhəmməd Əmin Rəsulzadənin anadan olduğu Bakının Novxanı kəndindəki evinin divarına vurulmuş mis barelyefin oğurlanmasına münasibətləri nəzərə çatdırır.

Yazı müəllifinin sözlərinə görə, Novxanı sakinləri hadisənin yanvarın 15-nə keçən gecə baş verdiyini deyiblər.

Müəllif deyir ki, Məhəmməd Əmin Rəsulzadənin nəvəsi Rəis Rəsulzadə hadisədən xəbərsiz olıduğunu bildirib: "Mənim bununla bağlı heç bir məlumatım yoxdur, hər halda mütləq araşdırmaq lazımdır. Üstəlik, Rəsulzadənin anadan olmasının 135-ci ilinə az qalmış belə hadisənin baş verməsi təəccüblüdür. Mən özüm də məlumat əldə etməyə çalışacağam".

Yazı müəllifi vurğulayır ki, tarixçi-alim, Rəsulzadə irsinin və Cümhuriyyət tarixinin araşdırmaçısı Nəsiman Yaqublu da bu hadisəni pisləyib və ölkədə "Cümhuriyyət ili" elan olunmuş 2018-ci il yenicə başa çatdığı halda, Rəsulzadənin evinin önündəki lövhənin çıxarılmasını çox mənfi hal adlandırıb: "Düşünürəm ki, hakimiyyət orqanları bununla ciddi məşğul olmalıdır. Novxanı ərazisinə cavabdeh Abşeron Rayon İcra Hakimiyyəti birbaşa məsuliyyət daşıyır. Bu əməli hər kim törədibsə, aşkarlanmalı, məsuliyyətə cəlb edilməlidir. Mən özüm də mütləq bunu araşdırıb, məlumat əldə etməyə çalışacağam. Bu məsələ belə qalmamalıdır".

Xatırladaq ki, Məhəmməd Əmin Rəsulzadənin vaxtilə yaşadığı həmin ev uzun müddətdir ki, uşaq bağçası kimi fəaliyyət göstərir.

Oğurlanmış mis barelyef Rəsulzadələrin həmin mülkünün divarına 1992-cü illərdə vurulub.

Müəllif bunu da vurğulayr ki, ölkənin bəzi tanınmış simaları dəfələrlə müvafiq qurumlar qarşısında M.Ə.Rəsulzadənin doğulub, boya-başa çatdığı həmin evin muzeyə çevrilməsi təşəbbüsü ilə çıxış ediblər, amma hər hansı reaksiya yoxdur. --0--