Arutyunyan Gəncənin raket atəşinə tutulmasına görə üzr istəyib

Ötən gün Bakı Məhkəmə Kompleksində Qarabağ separatçılarının keçmiş liderlərinin işi üzrə hazırlıq iclası başlayıb.

İşə Bakı Hərbi Məhkəməsinin hakimi Zeynal Ağayevin sədrliyilə hakim heyəti baxır.

AZƏRTAC bildirib ki, müttəhimlər vəkillərlə və erməni dili tərcüməçilərilə təmin olunublar.

Məhkəmədə 6 nəfər prokurorluq əməkdaşı dövlət ittihamçısı kimi iştirak edib.

Azərbaycan dövləti adından zərərçəkmiş qismində  Nazirlər Kabineti Aparatının rəhbəri Rüfət Məmmədov iştirak edib.

Cinayət işi üzrə 531 mindən çox zərərçəkmiş və onların nümayəndələri var.

Müttəhimlərin hüquq və vəzifələri izah edildikdən sonra iclasda fasilə elan edilib.

Fasilədən sonra separatçı rejimin keçmiş rəhbərlərindən biri, 2020-2023-cü illərdə ona rəhbərlik etmiş şəxs söz istəyib.

O deyib ki, 44 günlük müharibə zamanı Gəncənin raketlərlə vurulması ilə bağlı onun bəyanatı olub və buna görə təəssüflənir:

“Azərbaycan xalqında belə bir fikir var ki, bu əmri mən vermişəm. Bu qərar mənim tərəfindən verilməyib. Bəli, mənim bu hadisə ilə bağlı bir bəyanatım var idi. İndi bu bəyanata görə təəssüflənirəm, üzrxahlıq edirəm. Mənim elə bir hüququm, elə bir səlahiyyətim, rəy bildirməyə də imkanım olmayıb. Bu bəyanatı vaxtilə niyə vermişəm, onu da istintaq zamanı verdiyim ifadəmdə izah etmişəm”.

Hazırlıq iclası yanvarın 21-də davam edəcək.

Yanvarın 17-də Bakı Məhkəmə Kompleksində separatçı rejimin keçmiş "dövlət naziri", digər separatçılarla yanaşı eyni cinayətlərdə ittiham olunan Ruben Vardanyanın işi üzrə  hazırlıq iclası başlayıb.

Vardanyan və müqavilə əsasında hüquqi yardım göstərən müdafiəçisi iki vəsatət qaldırıb.

Onlardan biri Vardanyanın barəsində cinayət işinin Azərbaycan xalqına qarşı ağır cinayətlərin törədilməsində ittiham olunan erməni əsilli 15 şəxsin barəsində işə birləşdirilərək bir icraatda baxılması, digər vəsatət isə cinayət işinin materialları ilə tanış olmaq üçün təqsirləndirilən şəxsə əlavə vaxtın verilməsi barədə olub.

Dövlət ittihamını müdafiə edən prokuror cinayət işlərinin bir icraatda birləşdirilməsi barədə vəsatətə etirazını bildirərək məhkəmədən təmin olunmamasını, cinayət işi ilə tanış olmaq üçün əlavə vaxt verilməsinə dair vəsatətin isə təmin olunmasını  xahiş edib

Azərbaycan Respublikasının Cinayət Prosessual Qanunvericiliyinə əsasən, məhkəmə icraatı zamanı cinayət işlərinin eyni icraatda birləşdirilməsi nəzərdə tutulmadığından məhkəmə tərəfindən bu vəsatət təmin olunmayıb.

İkinci vəsatət təmin edilib və məhkəmə  iş materialları ilə tanış olması  Vardanyana əlavə 10 gün vaxt verib.

Məhkəmənin hazırlıq iclası yanvarın 27-də davam edəcək.