"Gürcü arzusu"nun qələbəsi Cənubi Qafqazı sabit regiona çevirib - İ.Əliyev

İlham Əliyev İrakli Kobaxidzeni "Gürcü arzusu" partiyasının seçkilərdə qələbəsi münasibətilə təbrik edib və ona yeni uğurlar arzulayıb.

"Sizin partiyanızın qələbəsi bütövlükdə Cənubi Qafqazın bundan sonra sabit region olması üçün xüsusi əhəmiyyət daşıyır və biz bu qələbəyə Sizin dostunuz, qardaşınız kimi sevinirik. Sizin hökumətinizə fəaliyyətində yeni uğurlar arzulayırıq", deyə Əliyev danışıqların yekunlarına və ikitərəfli sənədlərin imzalanmasına həsr olunmuş birgə brifinqdə bildirib.

"Hesab edirəm ki, bizim siyasi əlaqələrimiz bütün qonşular üçün nümunə ola bilər. İqtisadi sahədə yaxşı nəticələr var. Azərbaycan Gürcüstan iqtisadiyyatına 3,6 milyard dollar sərmayə qoyub", deyə Əliyev qeyd edib.

O, energetika sahəsində əməkdaşlığı xüsusilə vurğulayıb. "Birgə həyata keçirdiyimiz neft-qaz layihələri bu gün bir çox ölkələrin enerji təhlükəsizliyinin əsasını təşkil edir. Təkcə onu demək kifayətdir ki, Gürcüstan tranziti vasitəsilə Azərbaycan hazırda 11 ölkəyə öz təbii qazını ixrac edir, ildən-ilə ixrac artır. Keçən il bu, 25 milyard kubmetrə çatmışdır və bunun 10 faizi - ümumi ixracımızın 10 faizi Gürcüstanın payına düşür. Mənə verilən məlumata görə, Gürcüstanın istehlak etdiyi təbii qazın 80 faizdən çoxu Azərbaycan mənşəlidir", deyə Əliyev qeyd edib.

Danışıqlar zamanı "Orta dəhliz" layihəsi də müzakirə edilib, burada Gürcüstan və Azərbaycan Avropa və Asiya arasında körpü rolunu oynayır, deyə Əliyev qeyd edib.

Öz növbəsində, İrakli Kobaxidze təbriklər üçün təşəkkür edib.

"Bu, bizim bölgəmizdə sabitliyin və təhlükəsizliyin təmin edilməsi, ölkələrimizin münasibətləri baxımından əhəmiyyətlidir. Bu, müstəsna əhəmiyyətə malikdir. Siz regionda fərqli bir Lidersiniz və bizim üçün də nümunəsiniz", deyə Kobaxidze qeyd edib.

"Biz regionda cərəyan edən prosesləri və qlobal hadisələri müzakirə etdik. Əlbəttə, bütün bu proseslərin bizim ölkələrə təsiri var, bu, bizim siyasi mövqeyimizə də təsir edir. Vacib məqam ondan ibarətdir ki, biz hər bir çağırışla bağlı birlikdə çalışmalıyıq", deyə Kobaxidze əlavə edib.

İqtisadiyyata toxunan Gürcüstan naziri kommunikasiya layihələrini qeyd edib. "Biz Asiyanı Avropa ilə birləşdiririk və bu potensialdan maksimal dərəcədə istifadə etməliyik", deyə o bildirib.