Tramp inaqurasiyadan sonra Putinlə danışacaq

ABŞ-ın seçilmiş prezidenti Donald Tramp öz komandasına yanvarın 20-də keçiriləcək inaqurasiyasından sonra Rusiya prezidenti Vladimir Putinlə telefon danışığı təşkil etməyi tapşırıb. Bu barədə CNN məsələ ilə tanış mənbələrə istinadən xəbər verib.

CNN-in məlumatına görə, qarşıdakı danışığın məqsədlərindən biri iki lider arasında yaxın aylarda baş tutacaq görüş imkanını müzakirə etməkdir. Bu görüşün əsas mövzusunun Ukraynadakı münaqişənin həlli olacağı gözlənilir. Trampın komandası Ukrayna böhranının dinc yolla həlli üçün sürətli bir plan hazırlamağa ümid edir. Bu planın onun prezidentliyinin ilk aylarında həyata keçirilə biləcəyi və bura Putinlə birbaşa danışıqların daxil ola biləcəyi ehtimal edilir.

Bundan əvvəl Trampın milli təhlükəsizlik üzrə müşaviri Maykl Uolts bildirib ki, Tramp və Putin arasında telefon danışığı “növbəti günlərdə və ya həftələrdə” baş tuta bilər. O qeyd edib ki, bu, Ukraynadakı münaqişənin dayandırılmasına yönəlmiş növbəti addımlar üçün ilkin addım olacaq.

Kreml Donald Tramp ilə dialoqa hazır olduğunu ifadə edib. Rusiya prezidentinin mətbuat katibi Dmitri Peskov bildirib ki, Putin və Tramp arasında telefon danışığı “istisna edilmir” və hətta inaqurasiyadan əvvəl də baş tuta bilər. Lakin o vurğulayıb ki, Rusiya ilk addımı atmayacaq, çünki onun sözlərinə görə, münasibətlərin pozulmasında günahkar Moskva deyil, Vaşinqtondur.

Seçki kampaniyası zamanı Donald Tramp dəfələrlə Ukraynadakı münaqişəni tez bir zamanda həll etmək niyyətində olduğunu bəyan edib və bunun qısa müddətdə mümkün ola biləcəyini iddia edib. Lakin onun planının konkret detallar hələ açıqlanmayıb.