Gənc fəallar polisdə onlara işgəncə verildiyini bildiriblər

“Mayın 16-da Bakı İstintaq Təcridxanasında Bayram Məmmədov və Qiyas İbrahimovla görüşdük. Artıq kameraya köçürülüblər. saxlanma şəraitindən şikayətləri yoxdur. Bədənlərində işgəncə izləri var, xüsusilə də Bayram Məmmədovun bədənində, başında, ayaqlarında, qollarında işgəncənin izləri var”.  Bu barədə vəkil Elçin Sadıqov Facebook səhifəsində yazıb.

Həmçinin vəkil mayın 10-da saxlanılan, sonradan narkotik maddə ittihamı ilə barəsində 4 aylıq həbs qətimkan tədbiri seçilən gənc fəal Bayramın saxlama təcridxanasından göndərdiyi izahatını yayıb.

Gənc fəal yazır  ki, mayın 10-da saat 14.00-15.00 radələrində 3 nəfər mülki geyimli şəxs onu ağ rəngli "Jip"  avtomobilində zorla Nərimanov Rayon Polis İdarəsinin 12-ci polis bölməsinə aparıb.

“Məni rəisin otağına gətirdilər, otaqda 7-8 mülki geyimli şəxs var idi. Onlar məni yumruq, şillə və təpik zərbələri ilə döyməyə başladılar. Məndən nə üçün heykəlin şəklini çəkdiyimi, bu işdə kimlə əlbir olduğumu soruşaraq davamlı olaraq döyürdülər. Döyülməkdən demək olar ki, heç nə eşitmirdim və huşumu itirmişdim” - yazan gənc fəal qeyd edir ki, onu daha sonra Bakı Şəhər Baş Polis İdarəsinə aparıblar”.

Gəncin yazdıqlarına görə, orda onu yenidən döyməyə başlayıblar və narkotik maddə ittihamını etiraf etməsini tələb ediblər.

“İndiyə qədər narkotik maddə görmədiyimi bildirəndə məni heykəlin şəklini çəkdiyimə görə tuta bilməyəcəklərini bildirib daha şiddətlə döyməyə başladılar. Onlar məni hər döyəndə söyür, şalvarımı çıxarıb dubinka ilə əxlaqsız hərəkət edəcəklərini bildirdikdə məcbur qalıb saxta narkotik maddə ittihamını qəbul etdim. Onların tələb etdiyi məzmunda izahat-ifadə verdim. Sonra məni generalın yanına aparıb "əgər, heykəlin qarşısına gül qoyub və Az.TV-yə danışsan, heykəldən üzr istəsən məni buraxacaqlarını dedilər" - yazan gənc qeyd bundan imtina edəndə onu yenidən döyüblər.

Bayram Məmmədovun yazdıklarına görə, mayın 11-də Nərimanov rayon müvəqqəti saxlama yerinin rəisi ondan yeri təmizləməyi, siqaret kötüklərini yığmağı tələb edib.

“İmtina etdikdə məni şillə-yumruqla döyməyə başladı. Yenə imtina etdikdə işçilərə göstəriş verdi ki, aparın dubinkanı soxun buna, şəklini çəkin. Bundan sonra məcbur olub razılaşdım. Əlimə süpürgə və xəkandaz verib şəklimi çəkdilər”.

Gənc fəal mayın 12-də məhkəmədən qayıtdıqdan sonra yenidən döyüldüyünü deyir.

Gənc fəallar - Bayram Məmmədov və Qiyas İbrahimov mayın 11-də saxlanılıb. NİDA Vətəndaş Hərəkatı onların mayın 10-da Heydər Əliyevin Mərkəzi Bankın qarşısındakı abidəsinin postamentinə yazılan şüarlara görə saxlanıldığını açıqlayıb.

Sosial şəbəkələrdə Mərkəzi Bank ilə üzbəüz bağdakı abidənin fotosu yayılıb. Abidənin üzərində iki tərəfdən ağ boya ilə Azərbaycan və ingilis dillərində “Qul bayramınız mübarək!” sözləri yazılıb.

Mayın 12-də Xətai rayon Məhkəməsi gənc fəalların barəsində  4 aylıq həbs qətimkan tədbiri seçib.

Daxili İşlər Nazirliyinin məlumatına görə, gənclərin hər birinin üstündən 2 qram, evlərindən isə 1 kiloqramdan artıq heroin götürülüb.

Vəkilin sözlərinə görə, Məmmədov və İbrahimov bildiriblər ki, Qiyas İbrahimov qrafitt işini yerinə yetirib, Bayram Məmmədov isə şəklini çəkib Facebook-da paylaşıb.

“Həmçinin bunu əsgər ölümlərinə son verilməsi, 10 may tarixinin şəhidlər günü olmasına, ölkədə olan ədalətsizliyə görə etdiklərini dedilər”, - E. Sadıqov yazıb.

Onun sözlərinə görə, Bayram Məmmədovun bədənində işgəncə izləri hələ də qalır.

“Xüsusilə biləklərində və ayaqlarında açıq yaralar var idi. Qırmızı Xaçla əlaqə saxlamaq lazımdır ki, ona təcili baş çəksin”, -E.Sadıqov yazıb.

Vəkil onu da qeyd edib ki, B. Məmmədovun həbsindən verdiyi apellyasiya şikayətinə Bakı Apellyasiya Məhkəməsinin hakimi Qədim Babayev, Q. İbrahimovun həbsindən verilən apellyasiya şikayətinə isə Bakı Apellyasiya Məhkəməsinin hakimi  Faiq Qasımov tərəfindən baxılacaq.

Şikayətin baxılma tarixinə gəldikdə isə vəkil  bu gün və ya sabah baxılacağını deyib.

Hüquq- mühafizə orqanları vəkilin yazdıqları ilə bağlı hələ münasibət bildirməyib.-16D-