Gəncə hadisələri üzrə həbs edilənlərin ailələri işgəncə faktlarının araşdırılmasını tələb edirlər

Bakı/04.05.19/Turan: Hüquq müdafiəçisi Oqtay Gülalıyev üzvləri 2018-ci ilin Gəncə hadisələrində ittiham olunan 98 ailənin adımdan Azərbaycan prezidentinə müraciət göndərib. Onlar həbs olunanların polisdə dəhşətli işgəncələrə məruz qaldığını bildirirlər. Məktub həmçinin birinci vitse-prezident Mehriban Əliyevaya, baş prokurora, ədliyyə nazirinə və s. göndərilib.

" Düşünə bilərsinizmi, bir atanın qollarını qandalla istilik radiatoruna bağlasınlar və özünü amansızcasına döyməkləri bir tərəfə, 21 yaşlı övladını onun gözü önündə çılpaq soyundurub əl-ayağını skoçla bağlayıb vəhşicəsinə döysünlər, bədəninin müxtəlif yerlərinə cərəyan versinlər, alışqanla ayağının altını, belini yandırsınlar, atanın barmaqlarını məngənə arasına salıb sıxsınlar, yalançı və qurama izahata imza atmadığına görə əllərini kəsik-kəsik etsinlər...", deyə müraciətdə bildirilir.

Saxlanılan şəxslər əvvəlcə Gəncənin Nizami rayon polis şöbəsinə aparılıblar, burada amansız və ləyaqəti alçaldan davranışa məruz qoyublar. "Onlara "siz bizim rəisimizi öldürdünüz, biz də sizi ayağımızın altında asfalt edəcəyik" deyirlərmiş və bütün koridor boyu uşaqları ayaq altında əzirmişlər, polis idarəsində elə bir işçi qalmamışdır ki, həmin uşaqları təpikləməsin, döyməsin və alçaltmasın", deyə müraciətdə bildirilir.

DİN-in Mütəşəkkil Cinayətkarlığa qarşı Mübarizə Baş İdarəsində də döyülmə və işgəncə davam edib. "Maskalı cəlladlar" oraya gələrək, həbs edilənlərə işgəncəni davam etdiriblər.

"Hadisədən 9 ay keçməsinə baxmayaraq, almış olduqları xəsarətlərin izləri bir çox uşaqların bədənlərində hələ də qalıbdır: Məmmədov Urfanın əlinin baş barmaqları işləmir, Quliyev Kamalın qulağının pərdəsi zədəlidir, Məhərrəmov Kamalın belində yırtıq əmələ gəlib, Cavadov Asifin qollarında siqaret kötüklərinin yanıq izləri qalıb və sair və ilaxır, övladlarımız fiziki sağlamlığını itirib, keçirtdikləri mənəvi və psixoloji sarsıntılar onların həyatında sağalmaz izlər buraxıb. Övladlarının haqsız tutulmasına və işgəncəyə məruz qalmasına dözməyib bir çox valideynlər sağalmaz xəstəliyə düçar olub, bir ana dünyasını dəyişib digər bir ana intihar etməyə cəhd etmişdir", deyə müraciətdə bildirilir.

Müəllif işgəncələrin məhkəmələr tərəfindən araşdırılmasını və işgəncə verən şəxslərin məsuliyyətə cəlb edilməsini tələb edir.

* 2018-ci il iyulun 3-də Gəncədə şəhər icra başçısı Elmar Vəliyevə qarşı sui-qəsd olub. Gəncə sakini Yunis Səfərov şəhər icra başçısını və onun cangüdənini yaralayıb. Bundan sonra sosial şəbəkələrdə iyulun 10-da Gəncə administrasiyası qarşısında Vəliyevə qarşı etiraz aksiyası təyin edilib.

İyulun 10-da DİN Gəncədə iğtişaşlar baş verdiyini, iki polis əməkdaşının qətlə yetirildiyini bildirib. Bunun ardınca dindarlar arasında kütləvi həbslər aparılıb. Ümumilikdə 77 nəfər cinayət məsuliyyətinə cəlb edilib. Daha 6 nəfər silahlı müqavimət göstərərkən öldürülüb.

Martın 1-də ümumilikdə 14 nəfər təqsirləndirilən şəxsdən ibarət iki qrup barəsində 5 ildən 8 ilə qədər azadlıqdan məhrumetmə hökmü çıxarılıb. Məhkəmə prosesləri davam edir. -06D-