“Gəncə məhbusları” aclığa başlayıblar

Bakı/23.12.19/Turan:  “Gəncə işi” üzrə mühakimə olunan 7 nəfər ötən gün 2 saylı koloniyada aclıq elan edib.

Onların qohumları bildirib ki, aksiyada Əli Rzayev, Toğrul Verdiyev, Zabil Məmmədov, Elvin Nazarov, Elman Quliyev, Orxan Yağnəliyev və Kamal Quliyev iştirak edirlər.

Onlar günahsız olmalarına baxmayaraq, uzun müddətə həbs olunmalarına etiraz edirlər.

Məhkumların valideynləri hesab edirlər ki, övladlarına qarşı ədalətsizliyə yol verilib, gənclər günahsız olaraq uzun müddətə həbs edilir.

Penitensiar Xidmətin ictimaiyyətlə əlaqələr şöbəsinin rəisi Mehman Sadıqov Turan-a bildirib ki, aclıq barədə məlumat təsdiqlənmir.

“Hazırda cəzaçəkmə müəssisəsində heç bir məhbus aclıq etmir”, - M.Sadıqov deyib.

 *2018-ci il iyulun 3-də Gəncədə şəhərin o zamankı icra başçısı Elmar Vəliyevə qarşı sui-qəsd törədilib. Əslən Gəncədən olan Yunis Səfərov onu və onun cangüdənini yaralayıb.

Bundan sonra sosial şəbəkələrdə iyulun 10-na Gəncə administrasiyasının binası qarşısında E.Vəliyevə etiraz olaraq aksiya təyin edilib. Həmin gün DİN Gəncədə iğtişaşlar barədə məlumat yayıb. Hadisələr zamanı iki polis əməkdaşı öldürülüb. Bunun ardınca dindarlar və digər şəxslər arasında kütləvi həbslər baş verib.

2019-cu il iyulun 31-də baş prokuror Zakir Zaralov bu qurumda keçirilən müşavirədə bildirib ki, E.Vəlyevə sui-qəsdlə bağlı mütəşəkkil cinayətkar qrupun 29 üzvü cinayət məsuliyyətinə cəlb edilib, 11 nəfərin barəsində isə axtarış elan edilib.

10 iyul hadisələri ilə bağlı istintaq işi başa çatıb və 60 nəfərin barəsində 8 cinayət işi məhkəmələrə göndərilib. Müttəhimlər müxtəlif müddətə azadlıqdan məhrum ediliblər.06С-