Gürcüstan məhkəməsinin Fərman Ceyranlının işi üzrə qərarı dekabrda açıqlanacaq

Bakı/20.11.18/Turan: Tbilisidə "Lanset" klinikasının həmtəsisçisi, azəbaycanlı cərrah Fərman Ceyranlının apellyasiya şikayəti üzrə məhkəmə araşdırması başa çatıb.

Onun qızı Lalə Hüseynli bildirib ki, prosesdə prokuror, vəkillər və F.Ceyranlı özü son sözlə çıxış ediblər.

Müdafiə tərəfi F.Ceyranlıya bəraət verilməsini xahiş edib. Məhkəmə heyəti bildirib ki, qərar elan olunmağa hazır deyil. Yekun qərar məhkəmə tərəfindən dekabrın 6-da elan olunacaq.

F.Ceyranlının ailəsi güman edir ki, məhkəmə qərarının yubadılması Gürcüstanda prezident seçkiləri ilə əlaqədardır.

Xatırladaq ki, F.Ceyranlı 2017-ci il mayın 22-də həbs olunub. Ona qarşı CM-in 247-ci maddəsinin 1-ci bəndi (insanların həyatı və sağlamlığına təhlükə yaradan informasiyanı gizlətmək) və 180-cı maddənin 3-cü hissəsinin b yarımbəndi (kütləvi dələduzluğa cəhd) maddələri ilə ittiham irəli sürülüb. Nəticədə altı il azadlıqdan məhrum edilib.

O, özünü günahkar saymayıb, işin siyasi motivli olduğunu bildirib. F.Ceyranlı hesab edir ki, Gürcüstan ərazisində müxalifət fəallarını dəstəklədiyinə görə onu Azərbaycan hakimiyyətinin sifarişi ilə həbs ediblər.-03D06---