Gürcüstanda gənclər üçün Avropa məktəb yay düşərgəsi açılacaq

Bakı/05.04.19/Turan: Aİ və altı Şərq ölkəsindən (Azərbaycan, Ermənistan, Belarus, Gürcüstan, Moldova və Ukrayna) gənclər 2019-cu il Avropa məktəb yay düşərgəsində iştirak üçün ərizə verməyə dəvət olunur. Düşərgə avqustun 16-dan 30-dək olacaq. İştirakçılar 14-18 yaş arasında olmalıdır. Bu barədə Aİ nümayəndəliyindən Turan-a daxil olan məlumatda deyilir.

Yay düşərgəsində 100-dək gənc toplaşacaq. Onlar müxtəlif interaktiv və tədris tədbirlərində iştirak edəcəklər. Tədbirlər Avropa vətəndaş dəyərlərinin vurğulanmasına yönəldiləcək, Şərq tərəfdaşlığı regionunda mədəniyyətlərarası qarşılıqlı anlaşmaya, gənclər arasında dözümlülüyə xidmət edəcək.

Düşərgə Avropa Şərq tərəfdaşlığı məktəbinin potensial tələbələri və maraqlanan digər gənclər üçün hazırlıq mərhələsi kimi xidmət göstərəcək. Düşərgədə Şərq ölkələri-Aİ qonşuları və Aİ üzv dövlətləri arasında iştirak əmsalı 80:20-yə yaxın olacaq.

Ərizələr 2019-cu il aprelin 30-dək qəbul ediləcək. Daha ətraflı məlumat üçün aşağıdakı linkə daxil olmaq olar:

https://docs.google.com/forms/d/e/1FAIpQLSeuBJvOzf2siJN7Sb4TZGug8bpkqTNgtn69z_xP0Ib4HvswrQ/viewform?fbclid=IwAR1iAnAWY9ZA_STI8l0K2A4kBwvYd4z33-IeFCwkcLzWaQmmP7D74bgj_Lg

Avropa Şərq tərəfdaşlığı məktəbinin yaradılması orta təhsilə xüsusi diqqət yetirməklə gənclərin tələbatının təmin edilməsi üzrə daha geniş regional səylərin tərkib hissəsidir. Avropa Komissiyasının Şərq qonşuluğu regionunda bu layihəsi Şərq tərəfdaşlığı üzrə "2020-ci ildə 20 nəticə"dən biridir. 06D--