Hakimiyyət metroda ticarət edənləri sakitləşdirməyə çalışır

Metrodakı ticarət köşklərinin satıcıları martın 13-də  Bakı Şəhər  İcra Hakimiyyətinin  nümayəndələri ilə görüş keçiriblər. Bu barədə Turan-a adının çəkilməsini istəməyən ticarətçilərdən biri bildirib.

Onun sözlərinə görə, meriya işçiləri onlara üç yer təklif ediblər:   AMAY  Ticarət  Mərkəzi,  Keşlə bazarı və Nərimanov rayonunda yeni tikiləcək obyekt.

Razılıq əldə olunarsa, üçaylıq icarə haqqı  alınmaması  və ticarətçilərin  banklarda olan  borclarının ödənilməsi də  vəd olunub.

Mənbənin sözlərinə görə, ticarətçilər bu təkliflə razı deyil, çünki alıcılarını itirməkdən ehtiyat edirlər. Eyni zamanda onlara etiraz aksiyasının keçirilməsinin yolverilməzliyi barədə xəbərdarlıq olunub.

Xatırladaq ki, martın 12-də ticarətçilər aksiya keçiriblər. Aksiya zamanı saxlananlar olub. Onlar 40 manat cərimə ediliblər.

Milli Məclinin bugünkü plenar iclasında  deputatlar da bu məsələni qaldırıblar. Fazil Mustafa bildirib ki, metroda ticarət səbəbindən antisanitariya hökm sürür, sərnişinlərin hərəkəti çətinləşib. Eyni zamanda deputat hesab edir ki, hakimiyyət öz ticarət köşklərinə görə haqq ödəyən ticarətçilərin problrmini həll etməlidir. Onun fikrincə, dövlət öz vətəndaşlarının problemlərini həll etməlidir.

Bakı meriyasından, Bakı metropolitenindən və Prezident Administrasiyasından hər hansı şərh almaq mümkün olmayıb.. -16D04-