Həbsdə olan jurnalist hələ də xəstəxanaya yerləşdirilməyib

Həbsdə olan jurnalist Seymur Həzidə revmatizm xəstəliyinin kəskinləşməsinə baxmayaraq, onu həbsxana xəstəxanasına köçürmürlər. Bunu onun həyat yoldaşı Nigar Həzi bildirib.

“Noyabrın 16-da Seymurla telefonla danışdım. Onun sözlərinə görə, koloniyada tibbi yardım almır”, - N.Həzi qeyd edib.

Ədliyyə Nazirliyi Baş Tibb İdarəsinin rəis müavini İftixar Qurbanov “Meydan” TV-yə bildirib ki, noyabrın 15-də S.Həzidən qan analizi götürülüb və revmatizmin kəskinləşməsi müəyyən edilib.  O, “xüsusi müalicə” olunacaq.

Tanınmış həkim Adil Qeybulla hesab edir ki, revmatizmin kəskinləşdiiyi dövrdə xəstə mütləq  stasionar müalicədə olmalıdır. Rütubətin çox olduğu həbsxana şəraitində xəstəliyin kəskinləşməsi riski böyükdür. “Odur ki, xəstənin heç olmasa, koloniyanın tibbi-sanitariya hissəsinə köçürülməsi lazımdır. Ancaq yaxşı olardı ki, Ədliyyə Nazirliyinin müalisə müəssisəsinə yerləşdirilsin”, - A.Qeybulla Turan agentliyinə bildirib.

Dustaq xəstəxanaya yerləşdirilməsə mənfi nəticələrə gəlincə, həkim deyib ki, revmatizm birləşdirici toxumaların sistemli iltihabi xəstəliyidir. Effektiv müalivə olmasa ürək qüsuru, oynaqlarda problemlər və digər  fəsadlar törədə bilər.–06D-