Bakı/10.01.22/Turan: Həbsxanada yanvarın 6-dan aclığa başlayan xeberman.com saytının rəhbəri Polad Aslanov bu gün, yanvarın 10-da özünə qəsd edib. Jurnalist 1 saylı Cəzaçəkmə Müəssisəsinin tibb-sanitar hissəsində qol nahiyyəsini lezva ilə doğrayıb.
Bu barədə Polad Aslanovun həyat yoldaşı Gülmirə Aslanova axşam saatlarında onunla telefonla danışdıqdan sonra Amerikanın Səsinə müsahibəsində bildirib.
“Bu gün Poladın zəng günü idi. Lakin axşam saat 9:10 dəqiqəyədək zəng etmədi. Gün ərzində Ombudsman Aparatına, cəzaçəkmə müəssisəsinə, Penitensiar Xidmətə zəng edib Poladın zəng hüququnun bərpa edilməsini xahiş etdim. Lakin bu mümkün olmadı. Polada da qadağalar qoymuşdular. Ona su, siqaret vermirdilər. O, hüquqlarının bərpa olunmasını tələb edib, bu mümkün olmadıqda bir lezva tapıb və tibb məntəqəsində bir qolunu doğrayıb. İkinci qolunu doğramağa cəhd edəndə lezvanı alıblar. Yalnız bundan sonra telefonla əlaqə saxlamağa imkan veriblər. O, telefon danışığı zamanı bunları mənə dedi,” o qeyd edib.
Gülmirə Aslanovanın sözlərinə görə, həyat yoldaşı aclıq etdiyi müddətdə 3 kiloqram çəki itirib.
“Onun çəkisi 49 kiloqramdan 46 kiloqrama düşüb. Qollarında və əllərində üyüşmə yaranıb, təzyiqi aşağı düşüb. Dedi ki, həkim təzyiqini yoxlayır. O danışarkən səsi zəif idi, tez-tez təngənəfəs olurdu,” Aslanova qeyd edib.
Onun sözlərinə görə, jurnalist aclığı ədalət bərpa olunanadək davam etdirəcəyini bildirib.
“Bir də tələb edir ki, qanunsuz həbsinə səbəb olan insanlar həbsxanada ona baş çəksin.”
Jurnalistin özünə qəsd etməsi ilə bağlı məlumatla bağlı Penitensiar Xidmətdən məlumat almaq mümkün olmayıb.
Aslanov bundan öncə cəzaçəkmə müəssisəsində ona qarşı təzyiqlərə son qoyulması tələbi ilə 2021-ci ilin iyun-iyul aylarında otuz günədək aclıq edib.
2019-cu il noyabrın 16-da Xeberman.com saytının təsisçisi Polad Aslanov məhkəmə tərəfindən İranın xeyrinə casusluqda təqsirli bilinərək 16 il müddətinə azadlıqdan məhrum edilib. O, 12 iyun 2019-cu ildə həbs edilib və Cinayət Məcəlləsinin 274-cü maddəsi (dövlətə xəyanət) ilə ittiham olunub. İstintaq iddia edir ki, Aslanov jurnalist həmkarlarını İran xüsusi xidmət orqanları ilə əməkdaşlığa sövq edib.
Jurnalist ittihamı qəbul etmir və bunun jurnalist fəaliyyətinin məhdudlaşıdırılmasına yönəldiyini bildirir.
Sərhədsiz Reportyorlar, Jurnalistləri Müdafiə Komitəsi kimi beynəlxalq hüquq- müdafiə təşkilatları Azərbaycan hakimiyyətini jurnalist Polad Aslanovla bağlı ədalətli məhkəmə təhqiqatını təmin etməyə çağırıb.-03B-
Cəmiyyət
-
Çərşənbə axşamı paytaxtda yağış gözlənilir, bəzi yerlərdə intensiv olacaq, şimşək çaxacaq. Mülayim şimal-qərb küləyi əsəcək. Proqnozlara görə, yağışlı hava çərşənbə axşamına qədər davam edəcək.
-
Google, Ambition Loop, Azercell və “Azərbaycan Dəmir Yolları” QSC kimi qlobal və yerli şirkətlərin nümayəndələri dayanıqlı inkişafın təşviqində korporativ məsuliyyət, innovasiya və tərəfdaşlıqların rolunu müzakirə ediblər
-
Bakıda keçirilən COP29 konfransı mübahisələr və tənqidlərin kölgəsində başa çatdı. Tanınmış tarixçi Cəmil Həsənli bu tədbiri Prezident İlham Əliyevin rəhbərliyi altında Azərbaycanın idarəçilik problemlərinin parlaq əks olunması kimi xarakterizə etdi. Administrasiyanın qatı tənqidçisi olan Həsənli, COP29-u bahalı bir tamaşa adlandıraraq sistemli çatışmazlıqları üzə çıxardığını və Azərbaycanın siyasi və iqtisadi strukturlarına beynəlxalq diqqəti artırdığını vurğuladı.
-
Avropa Parlamenti Prezidenti Roberta Metsola azərbaycanlı iqtisadçı və siyasi məhbus, professor Qubad İbadoğlunu 2024-cü il Saxarov Mükafatı təqdimetmə mərasimində iştirak etmək üçün Strasburqa dəvət edib. Dəvət məktubu COP29 iqlim konfransı zamanı Avropa Parlamenti üzvü Maykl Bloss tərəfindən çatdırılıb. Lakin İbadoğlu hazırda ev dustaqlığında olduğu və Azərbaycandan çıxmasına qadağa qoyulduğu üçün dəvəti qəbul edə bilmir.
Rəy yaz