Hilal Məmmədov Nizami polisində təzyiqlərə məruz qaldığını bildirib

Bakı/20.09.16/Turan: “Tolışi sado” qəzetinin baş redaktoru, keçmiş “vicdan məhbusu” Hilal Məmmədov sentyabrın  19-da Nizami polisinə çağırılıb. Ona müxalifətin mitinqində iştirakla bağlı irad bildirilib və müxalifətlə əlaqələrini kəsmək tələb olunub. H.Məmmədov bunun cavabında bildirib ki, o, özünün azadlıq hüququndan istifadə edir və onu məhdudlaşdırmaq fikrində deyil.

H.Məmmədov Turan-a bildirib ki, ötən gün saat 15:00-a yaxın sahə müvəkkili onu Nizami Rayon Polis İdarəsinin 25-ci bölməsinin rəis müavini Elnur Əliyevin yanına söhbətə çağırıb.

Onlar birlikdə bölməyə gediblər. Bir saatdan sonra E.Əliyev H.Məmmədovu qəbul edib. Onların arasında 2-3 dəqiqəlik qısa söhbət olub. Söhbət zamanı zabit H.Məmmədovun bundan öncə nədən ötrü mühakimə olunduğu ilə maraqlanıb.

Sonra E.Əliyev H.Məmmədova deyib ki, rəislə görüşmək üçün bir az gözləsin. Məlum olub ki, hazırda bu bölmənin rəisi yoxdur və E.Əliyev özü qurum rəhbərinin səlahiyyətlərini icra edir.

İki saatdan sonra H.Məmmədovu yenidən E.Əliyevin yanına çağırıblar. Kabinetdə Etibar adlı əməliyyatçı da olub.

H.Məmmədova müxalifətin mitinqlərində iştirakla bağlı irad bildirilib. Etibar adlı əməkdaş H.Məmmədovu təhqir etməyə başlayıb.

H.Məmmədova deyiblər ki, polis “qul bazarı”nı bağlayıb ki, müxalifət mitinqlərdə iştirak etmək üçün oradan 5-10 manatın, hətta qəpik-quruşun müqabilində adam toplamasın.

Buna cavab olaraq H.Məmmədov deyib ki, belə vəziyyət bir daha göstərir ki, əgər adamlar  qəpik-quruşa görə mitinqə çıxırlarsa deməli ölkədə ciddi problemlər var. Ümumiyyətlə, işsizlər də öz hüquqlarının müdafiəsinə qalxmalıdır.

Etibar adlı əməkdaş isə az qala H.Məmmədova hücum etmək istəyib.

Sonra H.Məmmədovu daha bir saat saxlayıblar. Sonra başqa kabinetə çağırıblar və onun ailə tərkibi, qardaş-bacıları haqda məlumat alıblar.

H.Məmmədovun sözlərinə görə, polis bu məlumatları onun qohumlarına təzyiq göstərmək üçün aldığını gizlətməyib.

Sonra H.Məmmədovu Nizami Rayon Polis İdarəsi rəisinin müavininin yanına aparıblar.

O, H.Məmmədova deyib ki, bir ziyalı kimi ona “dövlət əleyhinə” mitinqlərdə iştirak etmək yaraşmır. Ondan təkidlə tələb ediblər ki, müxalifətdən uzaq dursun.

H.Məmmədov deyib ki, əvvəla, müxalifətin mitinqləri razılaşdırılıb, ikincisi, o, azad insan kimi  öz hərəkətlərini heç kimlə razılaşdırmaq və öz hüquqlarını məhdudlaşdırmaq niyyətində deyil.

Sonda H.Məmmədova deyiblər ki, onu yenidən çağıra bilərlər.

H.Məmmədov Turan-a bildirib ki, həbsdən buraxıldıqdan sonra vaxtaşırı ona təzyiqlər olur, polis və xüsusi xidmət orqanları onun yaşayışı, kimlərlə ünsiyyətdə olması, evinə kimin gəlib-getməsi ilə maraqlanır.

H.Məmmədov 2012-ci ilin iyununda populyar “Tı, kto takoy, davay  do svidaniya” meyxanası youtube-də yerləşdirildikdən bir neçə gün sonra həbs edilib. H.Məmmədov öz şərhində yazıb ki, o, bir klip ilə  Azərbaycana daha çox şöhrət qazandırıb, nəinki “Eurovision” müsabiqəsinə böyük pullar xərcləyən hakimiyyət.

H.Məmmədov 2013-cü il sentyabrın 27-də Bakı Ağır Cinayətlər Məhkəməsində narkotik maddə alveri, dövlətə xəyanət, millətlərarası ədavətin qızışdırılması ittihamları ilə 5 il azadlıqdan məhrum edilib.

“Amnesty İnternational” H.Məmmədovu “vicdan məhbusu” kimi tanıyıb. 2016-cı ilin fevralında Avropa İnsan Hüquqları Məhkəməsi H.Məmmədovun 3-cü maddə ilə (işgəncələrin qadağan edilməsi)  zəmanət verilmiş hüquqlarının pozulduğunu tanıyıb. Bu ilin martında H.Məmmədov dövlət başçısı tərəfindən əfv edilib.—06b-