Hökumətə belə mətbuat katibi lazımdırmı?

Bakı/11.05.21/Turan: Bir aydan çox vaxt keçdikdən sonra Turan agentliyi Nazirlər Kabinetinin mətbuat katibi İbrahim Məmmədova ünvanlanmış informasiya sorğusuna cavab alıb. Ancaq onun özündən yox.

Cavab İcbari Tibbi Sığorta üzrə Dövlət Agentliyindən daxil olub və 5 sualdan 4-ü cavablandırılıb.

Beşinci sualı birbaşa AZAL aviaşirkətinə ünvanlamaq tövsiyə edilib: “AZAL xaricə gedən sərnişinlərin testdən keçməsini tələb edir və öz saytında test keçmək üçün lazım olan klinikaların  siyahısını dərc edir. Bu klinikaların  çoxu özəldir. AZAL-ın PSR testi üçün klinikanı müstəqil olaraq öz təyin etməsi normaldırmı?»

Turan ilk üç suala cavabları artıq dərc edib. 4-cü suala " Operativ Qərargahda akkreditə olunmuş və PSR testini keçirən laboratoriya və klinikaların siyahısı varmı?" sualına cavab aşağıdakı kimi idi:

“COVID-19 analizlərinin yoxlanılması məqsədilə fəaliyyət göstərən 47 laboratoriyanın siyahısı məktuba əlavə olunub. Məlumat üçün bildirək ki, vətəndaş COVID-19 testinin aparılması üçün yaşadığı ərazi üzrə qeydiyyatda olduğu dövlət tibb müəssisələrinə və ya özəl xəstəxanalara müraciət edə bilər.

Qeyd edək ki, dövlət tibb müəssisələrində yalnız koronavirus infeksiyasının əlamətləri olduğu halda ödənişsiz testlərin götürülməsi təmin edilir. Əks halda vətəndaş tərəfindən ödənişli əsaslarla özəl xəstəxanalara müraciət oluna bilər.

Eyni zamanda bütün dövlət və özəl tibb müəssisələrində COVID-19 analizi üçün götürülən nümunələr yalnız siyahıda adları qeyd olunan laboratoriyalara təqdim edilir”.  

Turan agentliyi qanunvericiliklə müəyyən edilmiş çərçivədə konstruktiv əməkdaşlıq yaratdığına görə İcbari Tibbi Sığorta üzrə Dövlət Agentliyinə təşəkkürünü bildirir,  lakin Nazirlər Kabinetinin mətbuat xidməti haqqında belə bir şey deyə bilməz.

Bütün hallarda Məmmədov əlaqə yaratmayıb, hərçənd bildiyimiz qədərilə  Səhiyyə Nazirliyini və İcbari Tibbi Sığorta üzrə Dövlət Agentliyini  cavabla tələsdirib, bununla da öz vəzifə və səlahiyyətlərini onlara həvalə edib. Belə olan halda sual yaranır: hökumətə belə mətbuat katibi lazımdırmı?-0—