Hüquq müdafiəçiləri Gürcüstanda azərbaycanlı siyasi mühacirlərin izləndiyini və təzyiqə məruz qaldığını bildirirlər

Bakı/19.10.23/Turan: Gürcüstanda yerləşən Hüquq və Azadlıqların Müdafiəsi İnstitutu azərbaycanlı siyasi mühacirlərə gələn təhdidlərlə bağlı bəyanat yayıb.

Xüsusən, HAMİ rəhbəri Avtandil Məmmədov, Sərhədsiz Təqiblər və Repressiya Qurbanlarının Müdafiəsi Komitəsinin əməkdaşı Nuranə Aşurova və Müstəqil Reportyorlar Komitəsinin idarə heyətinin üzvü jurnalist Bəhruz Əliyev Gürcüstanda naməlum şəxslər tərəfindən təzyiqlərə məruz qalıb.

Nuranə Aşurovanın həyat yoldaşı Samir Aşurov siyasi baxışlarına görə təqiblərə məruz qaldığı üçün 2018-ci ildə Almaniyaya mühacirət edib. Lakin Aşurovlar ailəsi 2022-ci ildə Almaniyadan Azərbaycana deportasiya edilib və Aşurovlar deportasiya edildikdən sonra Samir Aşurov Azərbaycanda həbs edilib. Samir Aşurovun həyat yoldaşı Nuranə Aşurova ailəsinin və digər fəalların müdafiəsini təşkil etdiyinə görə Azərbaycanda təqiblərə və təhdidlərə məruz qalıb.

Nuranə Aşurova təhdid və təqiblərə məruz qalmamaq üçün müvəqqəti olaraq Gürcüstan Respublikasına köçüb. Gürcüstana köçdükdən bir neçə həftə sonra Aşurova oktyabrın 15-də saat 12:30 radələrində yaşadığı ərazidə naməlum şəxs tərəfindən yaxından izlənilib. Bəyanata Gürcüstanda Nuranə Aşurovanı izləyən şəxsin görüntüsü əlavə edilib.

Bundan başqa, həmin gün, oktyabrın 15-də, Avtandil Məmmədov evdə oladığı vaxtda, gecə 23:10 radələrində, Avtandil Məmmədovun ailəsi ilə yaşadığı mənzilin qapısı çalınmaqla ailə üzvləri və azyaşlı uşaqları qorxudulub. Hadisə baş verən zaman Nuranə Aşurova azyaşlı uşaqları ilə birlikdə Avtandil Məmmədovun evində olub. Hadisədən bir neçə dəqiqə sonra, saat 23:53 radələrində Nuranə Aşurovanın Facebook hesabına saxta Facebook profili ilə təhdid mesajları daxil olub. Həmin təhdid mesajları bəyanatda təqdim edilib.

Oktyabrın 15-dən 16-na keçən gecə saat 00:30 radələrində Azərbaycanda məruz qaldığı təqiblərdən yaxa qurtarmaq üçün Gürcüstana gələn təşkilatın digər əməkdaşı, keçmiş siyasi məhbus, jurnalist Bəhruz Əliyev "Opel" markalı avtomobillə təqib edilib.Belə ki, bu zaman onun üzərinə "Opel" markalı avtomobil sürülüb və o, müvəqqəti yaşadığı ünvana qaçaraq hadisədən xilas olub.Təşkilatın əməkdaşı jurnalist Bəhruz Əliyev Gürcüstanda təqiblərə məruz qaldığı üçün oktyabrın 17-də Gürcüstanı tərk etməli olub.

Bundan sonra oktyabrın 16-da saat 03:00 radələrində Hüquq və Azadlıqların Müdafiə İnstitutunun rəhbəri, hüquq müdafiəçisi Avtandil Məmmədova məxsus Facebook profilinin messencer bölməsinə təhdid mesajı daxil olub. Qeyd edək ki, Avtandil Məmmədov əvvəllər həmin saxta profildən təhdid mesajları alıb. İlkin mesaj və sonrakı təhdid mesajları bəyanata əlavə edilib.

Oktyabrın 17-də səhər saat 08:30 radələrində Avtandil Məmmədovun həyat yoldaşı uşaqları məktəbə apararkən o, avtomobillə naməlum şəxslər tərəfindən təqib edilib. Təqib edən edən şəxs, Avtandil Məmmədovun həyat yoldaşı və uşaqlarını, yaşadığı ərazidən məktəbə qədər təqib edib.

Bəyanatda xatırladılır ki, 2017-ci ildə jurnalist Əfqan Muxtarlı Tbilisidə oğurlanıb və Azərbaycana gətirilib. Bakıda o, həbs edilib və cinayət ittihamları ilə mühakimə olunub. 06B