Hüquq müdafiəçisi Tərtərdəki işgəncə faktlarını açıqlayıb

Bakı/27.03.19/Turan: Siyasi Məhbusların Monitorinq Mərkəzinin koordinatoru Oqtay Gülalıyev Tərtər Hərbi Məhkəməsinin 31 yanvar 2019- cu il tarixli 1(098)-7/2019 saylı hökmünü dərc edib. Bu, ermənilərlə əməkdaşlıqda ittiham olunan bir neçə hərbçinin qətlindən və işgəncələrdən xəbər verir. Həmin şəxslər 2017-ci ilin mayında həbs olunublar və həbsdə həlak olublar. Qeyd edək ki, həlak olan səkkiz hərbçidən dördü sonradan bəraət alıb, onlara əziyyət verənlər isə həbs olunublar, ancaq məhhusların qətlinə görə yox.

"Bu, necə olur, məhbusları amansızlıqla öldürənlər 6 il azadlıqdan məhrum olunur, həm də qətl maddəsi ilə yox. Eyni zamanda siyasi məhbusların ailəsinə maddi yardım göstərən Saleh Rüstəmov 7 il 3 ay, əsgər ölümlərinə etiraz edən İlkin Rüstəmzadə 8 il azadlıqdan məhrum edilir", - O.Gülalıyev bildirib.

"Belə çıxır ki, "xəyanət"in baş verdiyi korpus, briqada komandanlığı vəzifədə qalır, sıravilər isə əziyyətə düçar olur və ciddi cəzalandırılır", - O.Gülalıyev vurğulayıb.

O.Gülalıyevin yazısı ilə bağlı Müdafiə Nazirliyinə və Baş Prokurorluğa sorğular cavabsız qalıb. Turan agentliyi şərh ala bilməyib.

Xatırladaq ki, 2017-ci il mayın 7-də Baş Prokurorluq, Dövlət Təhlükəsizliyi Xidməti, Müdafiə Nazirliyi və DİN birgə bəyanatla çıxış edərək Tərtər rayonunda ermənilərə işləyən bir qrup hərbçi və mülki şəxsin ifşa olunduğunu bildirmişdi. Fakt üzrə CM-in 274-cü maddəsi (dövlətə xəyanət) ilə cinayət işi açılmışdı. Araşdırmanın nəticələri barədə ictmaiyyətə açıqlama verilməmişdi. -03D-