İctimai bilrik həm Nazirlər Kabinetinə, həm də Müdafiə Nazirliyinə etiraz edəcək

Cümə axşamı “Ehtiyatda və İstefada olan Zabitlər” İctimai Birliyi öz ofisində hərbi qulluqçuların məzuniyyət problemləri ilə bağlı “dəyirmi masa” keçirib.

  Birliyin sədri Yaşar Cəfərli bu sahədə ciddi problemlərin olduğunu bildirib. Belə ki, Azərbaycan qanunvericiliyində hərbi qulluqçuların istifadə etmədikləri əlavə məzuniyyət və istirahətlə bağlı müddəa əksini tapmır.

Y.Cəfərli qeyd edib ki, 1995-ci ildən 2010-cu ilin iyuluna kimi bu məsələni az da olsa məhkəmələr vasitəsilə həll ediblər. 2010-cu ilin iyulunda bu məsələ ilə bağlı qanun qəbul edilib. Dövlət başçısının fərmanı ilə Nazirlər Kabinetinə 2 ay ərzində bu məsələ ilə bağlı əməli addımlar atmaq tapşırılıb. Nazirlər Kabineti bu haqda 2 ay ərzində yox, yalnız 2 ildən sonra, yəni, 2012-ci ilin sentyabrında qərar qəbul edib. Həmin qərarda adı çəkilən müddəa 2010-cu ilin iyuluna kimi ordudan tərxis edilən hərbçilərə şamil edilmir. İctimai birlik Nazirlər Kabinetinin bu qərarını hərbi qulluqçular arasında bərabərlik hüququnun pozulması kimi dəyərləndirir. Bu azmış kimi, bu il noyabrın 25-də verdiyi əmrlə müdafiə naziri Nazirlər Kabinetinin qərarını dəstəkləyib. İctimai birlik  nazirin əmrinin də əsassız olduğunu bildirib. Hər iki sənədə etiraz olaraq bilrik həm Nazirlər Kabineti, həm də Müdafiə Nazirliyinin önündə etiraz aksiyası keçirməyə hazırlaşır, bununla bağlı Bakı meriyasına müraciət göndərib.  

Y.Cəfərli son vaxtlar Silahlı Qüvvələrdə baş verən ölüm halları ilə bağlı faktlara da münasibətini bildirib. Son vaxtlar orduda artan ölüm hallarının səbəbinin ordu rəhbərliyində, hərbi hissə komandirlərində olduğunu deyib. Müdafiə Nazirliyi və Baş Qərargah ordudakı itikilərə dövlətə, orduya, ailələrə dəyən zərbələr kimi yox, sadəcə statistika kimi baxmaqda ittiham edilib. 2003-cü ildən bu yana bu məsələnin daim gündəmdə saxlanmasına baxmayaraq, itkilərin ilbəil artmasına diqqət çəkilib. Bu durumdan çıxış yolu kimi müdafiə nazirinin, Baş Qərargah rəisinin dəyişdirilməsi, orduya vətəndaş cəmiyyəti institutlarının nəzarətinin artırılması təklif edilib. Hər hansı dəyişikliyin olmadığı halda belə itkilərin sayının gələcəkdə daha da artacağı barədə xəbərdarlıq edilib.