İddiaçı jurnalistə qarşı məhkəməyə gəlməyib (yenilənib)

Bakı/07.01.20/Turan:  Bu gün Ağdam Rayon Məhkəməsində “Lombard N1” firmasının sahibi  Məlahət Qurbanovanın criminal.az saytının redaktoru Anar Məmmədova qarşı iddiası üzrə məhkəmə iclası keçirilib.

Jurnalist bildirib ki, prosesə nə iddiaçı gəlib, nə də onun nümayəndəsi. “O, lombardçı Məlahət ifadəsində təhqirin olub- olmamasının müəyyən edilməsi üçün ekspertiza təyin olunması barədə vəsatət qaldırmışdı. Vəsatət hələlik baxılmamış saxlanılıb”, - A.Məmmədov bildirib.

Onun sözlərinə görə, məhkəmə ona dövlət hesabına vəkil təyin edib.

“Mən imtina etdim. Vəkilim Elçin Sadiqovun orderini məhkəməyə təqdim etdim. Növbəti məhkəmə baxışı yanvarın 10-na təyin olundu”, - A.Məmmədov bildirib. 06D-

*   *   *

2020 Yanvar 07 (Çərşənbə axşamı) 18:13:16

Fəallar jurnalist Anar Məmmədovu müdafiə ediblər

Bakı/07.01.20/Turan: Vətəndaş cəmiyyəti fəallarından, mətbuat nümayəndələrindən və ekspertlərdən ibarət böyük bir qrup criminal.az saytının rəhbəri Anar Məmmədova qarşı yeni cinayət işi ilə əlaqədar bəyanat yayıblar.

Bəyanatda qeyd edilir ki, Məmmədov əvvəllər də qanunsuz dindirmə və hədələrə məruz qalıb, həmçinin, 2018-ci ilin iyulunda Gəncədə baş verən hadisələri işıqlandırdığına görə sübutsuz olaraq 5.5 il müddətinə şərti azadlıqdan məhrumetmə cəzasına məhkum edilib.

"Aydın görünür ki, müstəqil saytın fəaliyyəti hakimiyyət dairələrini narahat edir və müxtəlif basqılarla onun fəaliyyətini dayandırmaq istəyirlər", deyə sənəddə bildirilir.

Hazırda Məmmədov "Lombard N1" firmasının sahibi Məlahət Qurbanovanın iddiası ilə Qurbanovanın sabiq əmək naziri Fizuli Ələkbərovla məhkəmə çəkişməsini işıqlandırdığına görə təqsirləndirilən şəxs qismində cəlb edilib.

İddiaçı yalnız məqalənin sərlövhəsində "Lombard Məlahət" kimi təqdim edildiyinə görə jurnalistin "böhtan" və "təhqirə" görə mühakimə olunmasını tələb edir.

İddia Ağdam rayon məhkəməsində icraata qəbul edilib və dinləmələr yanvarın 7-nə təyin edilib. Bu ittihamla jurnalisti hazırda şərti olaraq çəkdiyi 5,5 il azadlıqdan məhrumetmə cəzasına əlavə olaraq 2 ilə qədər həbs cəzası gözləyir.

"Biz vətəndaş cəmiyyəti olaraq bu məhkəmə işini A.Məmmədova qarşı təzyiqlərin davamı kimi qiymətləndiririk və müstəqil mediaya basqı sayır, müstəqil KİV-i təmsil edən A.Məmmədova qarşı təzyiqlərin dayandırılmasını tələb edirik", deyə 25 nəfərin imzaladığı bəyanatda qeyd edilir.

Bəyanatı imzalayanlar arasında jurnalistlər Şahvələd Çobanoğlu, Xədicə İsmayılova, Rövşən Hacıbəyli, Rauf Mirqədirov, Natiq Cavadlı, hüquq müdafiəçiləri Samir Kazımlı, Elçin Məmməd, ekspertlər Ərəstun Oruclu, İlham İsmayıl, Nazim Bəydəmirli, hüquqşünaslar Ələsgər Məmmədli, Xalid Ağaliyev, Cavad Cavadov və başqaları var. –07В-