İ.Əliyev: Ciddi ictimai nəzarət olmalıdır

Bakı/24.04.19/Turan: Hər yerdə, hər bir dövlət məmuru, icra başçısı, bələdiyyə sədri, hər bir dövlət təşkilatında çalışan məmur vətəndaşlara xidmət etməlidir, bu sözləri Azərbaycan prezidenti İlham Əliyev dünən Mərdəkan-Qala avtomobil yolunun açılış mərasimində yerli sakinlərlə görüşündə bildirib.

"Bunu dəfələrlə demişəm. Əfsuslar olsun ki, hər yerdə belə deyil. Elə hallar var ki, vətəndaşları incidirlər, onların haqları tapdalanır, onların problemlərinə biganə yanaşılır... Hər bir dövlət məmuru bilməlidir ki, onun başlıca vəzifəsi vətəndaşlara xidmət etməkdir. Ancaq buna nail olmaq üçün çox ciddi ictimai nəzarət olmalıdır", deyə Əliyev qeyd edib.

"Ona görə insanları narahat edən məsələlər, harada ki, nöqsanlar, çatışmazlıqlar var, onlar deyilməlidir. Onlar müraciətdə öz əksini tapmalıdır ki, biz bunları həll edək. Əminəm ki, belə də olacaq. Bütün dövlət məmurları bilməlidirlər ki, onlar vətəndaşlara vicdanla xidmət etməlidirlər. Təyin edilmiş hər bir icra başçısının qarşısına qoyduğum birinci vəzifə bundan ibarətdir", deyə prezident bildirib. -06D-