İlkin Rüstəmzadə: �Əsas olan Azərbaycanın azadlığıdır� (YENİLƏNİB - FOTO/VİDEO)

Bakı/17.03.19 /Turan: Nida Hərəkatının fəalı Qiyas İbrahimov azadlığa çıxdıqdan sonra deyib ki, bütün siyasi məhbuslar azadlığa buraxılmayana qədər ədalətin qalib gəldiyini hesab etmək olmaz. "Ancaq bizə qarşı olan qüvvə geri çəkildisə biz irəliləməliyik və hamının azadlığa buraxılmasına nail olmalıyıq",- o deyib. Q.İbrahimov ümidvar olduğunu bildirib ki, "hər halda bu, ölkədəki pis şeylərin sona çatmasının başlanğıcıdır". O deyib ki, koloniya daxilində əfvlə bağlı təntənəli tədbirdə iştirakdan imtina edib, çünki orada adətən hakimiyyətin repressiyalarına bəraət qazandıran hökumətyönlü KİV iştirak edir.

6 il həbsdə qalan digər NİDA fəalı İlkin Rüstəmzadə bildirib ki, azadlığa məğrurcasına çıxır, çünki əfv barədə ərizə yazmayıb. "Mübarizə davam edir. Bizə dayanmaq olmaz. Mənim şəxsi azadlığım əsas deyil. Əsas olan bütün Azərbaycanın azadlığıdır, demokratik dəyərlərin bərqərar olmasıdır", - o vurğulayıb.

NİDA-nın daha bir fəalı Bayram Məmmədov deyib ki, mübarizəni dayandığı yerdən davam etdirəcək.

"Həbsxana insanı bərkidir və bu bərkimə bizə öz ideallarımız uğrunda mübarizəni davam etdirməyə imkan verir", - B.Məmmədov vurğulayıb.-0-

***
Bazar günü prezidentin əfv fərmanının icrasına başlanılıb. Digər əfv olunanlarla yanaşı artıq keçmiş siyasi məhbuslar da azadlığa çıxır.
Azadlığa çıxan keçmiş səhiyyə naziri Əli İnsanov bildirib ki, azad ediləcəyini gözləmirdi. "Güman edirdim ki, ömürlük həbsdə qalacağam. Mən azadlığa demokratik Qərb, Avropa, Avropa İttifaqı, Avropa Şurası, ABŞ-ın səyləri sayəsində çıxdım. Məndən qandalları ABŞ Konqresi, hökuməti, Avropa qurumları çıxardı", Ə.İnsanov azadlığa çıxdıqdan sonra koloniyanın qapısı yanında jurnalistlərə deyib. O qeyd edib ki, "rejimə qarşı müxalifətdə qalacaq".

Ə.İnsanov deyib ki, ölkədən getməyəcək və Azərbaycanda demokratiya uğrunda mübarizəni davam etdirəcək. "Ölkədəki ağır vəziyyətə" görə hakimiyyəti tənqid edən Ə.İnsanov deyib: "İndicə rejimin həbs düşərgəsini tərk etdim. Lakin mən kiçik türmədən böyük türməyə keçdim".
AXCP sədrinin müavini Gözəl Bayramlı jurnalistlərə bildirib ki, azaldığa buraxılacağını gözləmirdi, çünki əfv ərizəsi yazmayıb, ona görə ki, cinayət törətməmişdi ki, peşman olsun.

"İki il əsassız olaraq həbsdə qaldım. Mənim həbsim siyasi fəaliyyətimlə bağlı idi. Ancaq mən bu sınaqdan keçdim və bu gündən AXCP sədrinin müavini və Demokratik Qüvvələrin Milli Şurasının Koordinasiya Mərkəzinin üzvü kimi siyasi fəaliyyətimi davam etdirəcəyəm", - G.Bayramlı bildirib.-06D-