Hüquq müdafiəçiləri: �50-dən çox siyasi məhbus əfv olunsa da, problem tam həll edilməyib�(YENİLƏNİB)

Bakı/16.03.19/Turan: Hüquq müdafiəçilərinin dəqiqləşdirilmiş məlumatına görə, Azərbaycan prezidentinin əfv barədə fərmanı 51 siyasi məhbusa şamil edilib. Lakin fəallar hesab edirlər ki, sərəncam problemi həll etməyib və müxtəlf siyahılara görə, həbsxanalarda 74-dən 80-dək siyasi məhbus qalır.

Vətəndaş cəmiyyətinin siyasi məhbusların vahid siyahısının tərtib edilməsi üzrə İşçi Qrupunun üzvü Bəşir Süleymanlı Turan-ın müxbiri ilə söhbətində deyib ki, əfv sərəncamı 51 siyasi məhbusu əhatə edib.

Onun sözlərinə görə, Azərbaycanın Avropa Şurasına daxil olduğu vaxtdan bu yana siyasi məhbusların belə kütləvi şəkildə azadlığa buraxılması olmayıb.

O qeyd edib ki, təkcə tanınmış gənc və müxalifət fəalları, keçmiş dövlət məmurları yox, həm də İsmayıllı, Siyəzən, Mingəçevir şəhərlərində sosial xarakterli aksiyalarda iştiraka görə mühakimə olunmuş bütün şəxslər əfv edilib.

Bloger Rəşad Ramazanov (Ağəddin), azadxeber.org saytının redaktoru Nicat Əliyev əfv ediliblər. Müxtəlif dindarlar kateqoriyası, həmçinin 2015-ci il Nardaran hadisələrilə bağlı, "Səid Dadaşbəylinin işi" üzrə həbs olunanlar arasında əfv edilənlər var.

Bundan öncə martın əvvəlində iki nəfər - bloger Mehman Hüseynov və Müsavat Partiyası gənclər təşkilatının rəhbəri, şərti olaraq həbs edilmiş Əbülfəz Sadıqbəyli siyasi məhbuslar siyahısından çıxıblar.

Beləliklə, İşçi Qrupun fevralda elan etdiyi 127 nəfərlik siyasi məhbus siyahısından 53 məhkum çıxır. Lakin 74 nəfər hələ də siyahıda qalır.

B.Süleymanlı təəssüflə qeyd edib ki, əfv jurnalistlər Əfqan Muxtarlı və Seymur Həziyə, AXCP fəalı Fuad Əhmədliyə və digərlərinə şamil edilməyib.

Sosial şəbəkələrdə "Azad et!" kampaniyasının təşəbbüsçüsü, İnsan Hüquqları Klubunun rəhbəri Rəsul Cəfərov əfvi "siyasi məhbuslar probleminin həlli yönündə düzgün addım" adlandırıb. "Lakin problem tam həll olunmayıb", - o, Turan-a bildirib.

R.Cəfərov qeyd edib ki, sərəncam demək olar ki, siyasi məhbusların bütün kateqoriyasını əhatə edib.

İslam Partiyasının işi üzrə mühakimə olunmuş bir qrup (partiya lideri Mövsüm Səmədov başda olmaqla) və "ömürlük həbs olunanlar" istisna təşkil edib.

Söhbət 1990-cı illərdə ölüm hökmünə məhkum edilənlərdən gedir. Ölüm hökmünün ləğvindən sonra məhkumları avtomatik olaraq ömürlük həbsə məhkum ediblər ki, bu da qanunsuz olub, çünki onların məhkum olunduğu vaxtda ölüm hökmünə alternativ cəza 15 il müddətinə azadlıqdan məhrumetmə olub.

R.Cəfərov hesab edir ki, hakimiyyət siyasi məhbuslar probleminin tamamilə həll olunması üçün addımları davam etdirməlidir.

Onun fikrincə, indiki əfvi alqışlayan beynəlxalq təşkilatlar bir müddət sonra qalan siyasi məhbusların azadlığa buraxılmasını tələb edəcəklər.

"AŞPA Azərbaycanda siyasi məhbuslar üzrə məruzəçi təyin edib və istənilən halda hesabat hazırlanacaq. Ölkənin tənqid edilməsinə birdəfəlik son qoymaq üçün bütün siyasi məhbuslar azadlığa buraxılmalıdır", - R.Cəfərov vurğulayıb.

O, hakimiyyətin əfvə yanaşmasında məntiqlilik və ardıcıllığın olmadığını qeyd edib.

"Bu iş üzrə mühakimə olunmuş adamları aydın olmayan məntiqə əsasən ayırırlar - bəzilərini buraxırlar, bəzilərini yox. Ya da eləsini buraxırlar ki, hələ 8-10 il cəzası qalıb, amma bir ay cəza müddəti qalanı buraxmırlar", - R.Cəfərov qeyd edib.

O hesab edir ki, cəza müddətinin bitməsinə az qalmış şəxsləri vaxtından əvvəl şərti azadlığa buraxma mexanizmi vasitəsilə azad etmək olar.

"Parlament amnistiyasına təşəbbüs göstərmək olar. İndiyədək ağır olmayan cinayətlərə görə mühakimə olunanların barəsində amnistiya elan edilib. İndi isə ağır cinayətlərə görə mühakimə olunanların müəyyən kateroriyasına amnistiya tətbiq etmək olar", - R.Cəfərov deyib.

Azərbaycanda Siyasi Məhbusların Azadlığı Uğrunda İttifaqın koordinatoru Elşən Həsənov deyib ki, "əfv siyasi məhbuslar problemini həll etmədi". "Əlbəttə, siyasi məhbusların bir hissəsinin azad edilməsi yaxşıdır. Ancaq həbsxanalarda hələ 80 siyasi məhbus var.

Təəssüf ki, ölüm hökmünün ləğvindən sonra avtomatik olaraq ömürlük həbs cəzasına məhkum edilmiş 14 nəfərdən heç kim əfv edilməyib. Əfv olunanlar arasında Nardaran hadisələri ilə əlaqədar mühakimə olunmuş, yataq xəstəsi Əbülfəz Bünyadov yoxdur. Bu, siyasi məhbuslar probleminin natamam həll olunmasıdır", - E.Həsənov Turan-a bildirib. -0-

* * *

2019 Mart 16 (Şəmbə) 23:15:07

Bir qrup siyasi məhbus əfv edilib

Şənbə günü prezident İlham Əliyev bir qrup məhbusun əfv edilməsi barədə sərəncam imzalayıb. Sənədə əsasən 399 nəfər cəzasının qalan hissəsini çəkməkdən azad edilib.

Ömürlük həbs edilmiş iki nəfərin cəza müddəti 20, digərinin 25 il ilə əvəzlənib.

Azadlıqdan məhrumetmə cəzasına məhkum edilmiş və cəzasının çəkilməsi təxirə salınmış bir məhkum cəzadan azad edilib, azadlığın məhdudlaşdırılması cəzasına məhkum edilmiş digər bir nəfər cəzasının çəkilməmiş hissəsindən azad edilib.

Bundan əlavə, 11 nəfər şərti cəzadan, 3 nəfər islah işləri cəzasından, 1 nəfər ictmai işlərdən, 12 nəfər cərimədən azad edilib.

Beləliklə, əfv 431 nəfəri əhatə edib.

Əfv olunanlar arasında bir sıra tanınmış siyasi məhbus da var.

Əsasən NİDA Hərəkatının fəalları İlkin Rüstəmzadə, Elgiz Qəhrəman, Bayram Məmmədov, Qiyas İbrahimov cəzasının qalan hissəsindən azad edilib. Sonuncu iki nəfər 2016-cı ilin mayında Heydər Əliyevin abidəsinə siyasi şüarlar yazdıqlarına görə 10 il həbs olunmuşdular.

Keçmiş səhiyyə naziri, 73 yaşlı Əli İnsanov, satirik-şair Tofiq Həsənov, İsmayıllı hadisələrinə görə həbs olunmuş Vasif İbrahimov, prokurorluğun keçmiş müstəntiqi Rüfət Səfərov, jurnalist Fikrət Fərəməzoğlu azadlığa çıxıb.

Həmçinin AXCP sədrinin müavinləri Fuad Qəhrəmanlı və Gözəl Bayramlı, partiya fəalı Murad Ədilov, Müsavat Partiyasının üzvü Əlikram Xurşidov azadlığa buraxılıb.

Bundan əlavə, əfv olunanlar arasında AXCP lideri Əli Kərimlinin qaynı Elnur Seyidov da var.

Bundan əlavə, ilahiyyatçı Zülfüqar Mikayılov (Mikayılzadə), Nardaran hadisələri ilə əlaqədar həbs olunmuş "Müsəlman Birliyi" Hərəkatının sədr müavini Elçin Qasımov və bu təşkilatın fəalı Elman Ağayev də əfv edilib.