İmişlidə növbəti kütləvi zəhərlənmə olduğu deyilir

Баку/21.06.18/Turan: Bu gün, iyunun 21-də İmişlinin Aranlı kəndindəki pambıq tarlalarının birində də kütləvi zəhərlənmənin olduğu deyilir.

Bu barədə AzadlıqRadiosuna yerli sakinlər məlumat verib. Onların sözlərinə görə, hadisə yerinə təcili yardım çağrılsa da, zəhərlənən şəxslər Rayon Mərkəzi Xəstəxanasına aparılmayıb.

İmişli Rayon Mərkəzi Xəstəxanasından bildirilib ki, zəhərlənən şəxslər Aranlı və Qızılkənd kəndlərindəki xəstəxanalara yerləşdirilib.

"Dəqiq say deyə bilmərəm. İki gün əvvəlki hadisə zamanı zəhərlənənlərin isə bir qisminin Mərkəzi Xəstəxanada stasionar şəraitdə müalicəsi davam etdrilir. Başqa xəstələrimiz də var. Ona görə də, həkim və tibb bacılarından ibarət briqada yaradıb ora göndərmişik. Baş həkim özü də oradadır", xəstəxanadan bildiriblər.

İmişli Rayon İcra Hakimiyyəti başçısının Aranlı kəndi üzrə nümayəndəsi Əlihümbət Alıkişiyev isə deyilənləri yalanlayır:

"Belə şey olmayıb. İki gün əvvəl kənddən bir-iki nəfər xəstələnmişdi. Yəqin bunu deyirlər. Həmin şəxslərin də vəziyyəti yaxşıdır."

Aranlı kənd bələdiyyəsinin sədri Nadir Vəliyev isə pambıqçıların səhhəti ilə bağlı təhlükəli durumun olmadığını bildirib. O, AzadlıqRadiosuna açıqlamasında bu gün Aranlıda pambıq sahəsində çalışanların səhhətində pozulmaların olduğunu qeyd edib.

"Başgicəllənməsi, ürəkbulanması olanlar vardı. Hamısı gəldilər, kənddəki tibb məntəqəsində müayinə olundular. Kənd məntəqəsində lazımi şərait yaradılıb. Başqa yerdə müalicə olunmalarına gərək olmayıb. Nə gərək idisə edildi, yardım aldılar, evlərinə getdilər. Təhlükəli heç nə yoxdur".

Bələdiyyə sədrinin sözlərinə görə, sağlığında probelem yarananların sayı 23-24 nəfər olub. Hazırda onların hamısının durumu qaydasındadır.

İmişli Rayon Xəstəxanasının baş həkimi Cəsur Paşayev isə bu barədə danışmaq istəməyib.

Ancaq yerli sakinlərin iddiasına görə, artıq kəndə polislər də gəlib.Onlar məlumatın təkzib edilməsini düzgün saymırlar.

Son 2 hıəftədə buna qədər Azərbaycandakı pambıq sahələrində 4 kütləvi zəhərlənmə hadisəsinin qeydə alndığı bildirilir.

İyunun 20-də 20-dən çox şəxs Yevlax Şəhər Xəsətxanasına müraciət edib. Onların Tərtər rayonunun Xoruzlu kəndindəki pambıq tarlasında çalışdıqları deyilirdi.

İyunun 19-da da İmişli rayonundakı pambıq sahələrinin birində günəmuzd işləyənlər zəhərlənmə ilə bağlı kütləvi şəkildə xəstəxanaya üz tutmuşdular.

Xəstəxanadan verilən məlumata görə, onlara müraciət edənlərin sayı 140 nəfəri keçmişdi. Sonrakı günlərdə də müraciətlər davam edib.

Bu iki hadisədən əvvəl, iyunun 10-da da Saatlı rayonunun Simadakənd kəndi ərazisində 24 nəfər, iyunun 17-də isə Tərtər rayonunun Seydimli kəndində 14 nəfər xəstəxanaya gətirilmişdi.

Saatlı rayonunda zəhərlənənlərin hamısının artıq evlərinə buraxıldığı açıqlanıb.

Bu rayonda baş verən zəhərlənmə ilə bağlı Baş Prokurorluğun Ağır cinayətlərə dair işlər üzrə istintaq idarəsində cinayət işi açılıb.

Söhbət Cinayət Məcəlləsinin 249.2 (bitki xəstəliklərinə və ziyanvericilərinə qarşı müəyyən edilmiş mübarizə qaydalarını pozma - ağır nəticələrə səbəb olduqda) və 314.2-ci (səhlənkarlıq, yəni vəzifəli şəxsin işə laqeyd münasibəti nəticəsində öz xidməti vəzifəsini yerinə yetirməməsi - ağır nəticələrə səbəb olduqda) maddələrindən gedir.

Sonrakı zəhərlənmələrlə də əlaqədar oxşar cinayət işlərinin açıldığı deyilir.--0--