Hökumət pambıqçılıqdan əl çəkmək niyyətində deyil

Bakı/21.06.18/Turan: İyunun 20-də Bakıda fitosanitar nəzarət və diaqnostik xidmət müfəttişləri və Gömrük Komitəsinin müfəttişləri üçün bitkilərin ilkin müayinəsinə və zərərvericilərin diaqnostikasına həsr olunmuş treninq başlayıb. Treninq Kənd Təsərrüfatı Nazirliyi tərəfindən Birləşmiş Millətlərin Ərzaq və Kənd Təsərrüfatı Təşkilatı (FAO) ilə birgə keçirilir və iyunun 22-də başa çatacaq.

Treninqin mövzusu "Azərbaycanda fitosanitar nəzarətin və diaqnostik xidmətlərin gücləndirilməsi"dir, xəbəri Kənd Təsərrüfatı Nazirliyinin saytı yayıb.

Elə bu gün İctimai telekanal pambıq sahələrində pambıqçı fermerlər üçün treninqlərin keçirilməsi haqqında telesüjet nüamyiş etdirib. Kənd Təsərrüfatı Nazirliyinin eksperti bitkilərin zərərvericilərdən müdafiəsi üçün kimyəvi vasitələrin suda həll olunması və tarlalarda tətbiq olunması qaydalarını izah edirdi. Pambıqçıların zəhərlənməsinə bitkilərin müdafiəsi üçün kimyəvi vasitələrdən yanlış istifadənin səbəb olduğu ehtimal olunur. Ekspert iddia edirdi ki, bu vasitələr səpilərkən tarlalarda və qonşuluqdakı yaşayış məntəqələrində insanlar və ev heyvanları olmamalıdır.

Bakıda təcili treninq keçirilməsi və pambıqçılara yerlərdə təlim verilməsi göstərir ki, pambıqçıların kütləvi zəhərlənmələrinə baxmayaraq, hökumət 13 iyul 2017-ci il tarixində təsdiq edilmiş "Azərbaycanda 2017-2022-ci illər üçün pambıqçılığın inkişafı üzrə Dövlət Proqramı"na əsasən, Azərbaycanda pambıq əkinlərinin artırılması planlarından əl çəkmək niyyətində deyil. Xammal pambığın istehsalı 2015-ci ildə 35,2 min tondan 2022-ci ilə qədər 500 min tona qədər artırılmalıdır. 2017-ci ildə Azərbaycanda 200,8 min ton pambıq məhsulu yığılıb.

İyunun 20-də qısa müddət ərzində pambıq tarlalarında kəndlilərin dördüncü dəfə kütləvi zəhərlənməsi haqqında məlumat verilib. Yevlax rayonunda 24 nəfər zəhərlənib, onlar arasında uşaqlar da var. Ümumilikdə bir ay ərzində pambıq sahələrində zəhərlənənlərin sayı 200 nəfərdən çoxdur. Ekspertlər zəhərlənmələrin səbəbinin pambıq tarlalarında zərərvericilərə qarşı mübarizə üçün istifadə olunan kimyəvi reagentlər olduğuna şübhə etmir.

Bir gün əvvəl kənd təsərrüfatı naziri Nazirliyin fitosanitar nəzarət idarəsinin rəisi Camal Quliyevi tutduğu vəzifədən azad edib. O, tezliklə nazirliyin şöbə müdiri təyin edilib. Kənd Təsərrüfatı Nazirliyinin mətbuat xidməti isə 2018-ci il iyulun 1-dən etibarən Azərbaycana Qida Təhlükəsizliyi Agentliyində dövlət qeydiyyatından keçmiş, keyfiyyət və mənşə sertifikatları olan pestisidlərin, bioloji preparatların və aqrokimyəvi maddələrin idxalına icazə veriləcək. -0-