Media-icmal 22.06.18

Dünya neft bazarında Azərbaycanın rolu, məhsul istehsalçılarının biçin problemi, cəmiyyətdə "sevgi qıtlığı" bugünkü (22 iyun, 2018-ci il) medianın aparıcı mövzularındandır.

Neft bazarında Azərbaycanın rolu

"Azərbaycan" qəzetində "Azərbaycan neft bazarının sabitləşdirilməsi prosesinin fəal iştirakçısıdır" sərlövhəli məqalədə müəllif neft ölkəsi kimi Azərbaycanın perspektivini dəyərləndirir.

Müəllif bu dəyərləndirməni Avstriyanın paytaxtı Vyanada keçirilən Neft İxrac Edən Ölkələr Təşkilatının (OPEC) "Neft - dayanıqlı gələcək üçün əməkdaşlıq" mövzusunda VII beynəlxalq seminarda energetika naziri Pərviz Şahbazovun çıxışına istinadən aparır.

Müəllif deyir ki, nazir "Dünya iqtisadiyyatı və neftin gələcəyi" adlı beşinci sessiyada məruzə ilə çıxış edib və gələcəkdə dünya iqtisadiyyatında neftin rolu, neft bazarında mövcud tendensiyalar və Azərbaycanın neft ölkəsi kimi gələcək inkişaf strategiyasından bəhs edib.

Müəllif nazirə istinadən deyir ki, OPEC+ formatında əməkdaşlıq dünya bazarında neftin qiymətinin sabitləşdirilməsi məqsədinə nail olub.

Amma nazir hesab edir ki, əməkdaşlıq bununla kifayətlənməyib, neft sənayesindəki yeni vəziyyət yeni prioritetlər müəyyən edib.

Müəllif deyir ki, bərpa edilən enerji mənbələri nefti əvəz edə bilməyəcək və enerji balansında nefitn aparıcı mövqeyi dəyişməyəcək,

Mqəalə müəllifi deyir ki, bununla belə P.Şahbazov hasilatın kəskin azalması və bazara çıxışda gözlənilən məhdudiyyətlər, eləcə də son illərdə aşağı neft qiymətləri ilə əlaqədar transmilli şirkətlərin neftə marağının itməsi perspektivdə qlobal tələbatın ödənilməsində çətinliklər vəd edir.

"Enerji bazarının yenidən balanslaşması, neft sənayesinə gələcəkdə tələbata uyğun investisiyaların qoyulmasını təmin etmək OPEC+ formatında əməkdaşlığı vacib edir", deyə nazir bu sahədə gördüyü perpektiv çərçivəsini göstərib.

Müəllif deyir ki, dünya neft sənayesi və neft bazarının yaratdığı yeni həqiqətlər OPEC+ çərçivəsində əməkdaşlığı labüd edir və investorların bu sektora maraq və inamını artırmaq, bazarın davamlığını təmin etmək üçün daha da sıx əməkdaşlığa ehtiyac var.

Müəllif vurğulayır ki, nazir bu prosesdə Azərbaycanın iştirakı və bu proseslərdə rolu barədə də danışıb: "Azərbaycanın qlobal neft bazarının sabitləşməsinə yönəldilmiş proseslərdə iştirakı ölkəmizin daxili neft siyasətinə müsbət təsir göstərib. Azərbaycan yeni proseslər kontekstində də tarixi mövqeyini möhkəmləndirir".

Müəllif deyir ki, neftin qiymətinin aşağı düşməsi fonunda qlobal neft bazarında baş verən narahatlıqlar son zamanlar neft qiymətlərinin artması kimi yeni proseslə əvəz edilib, bu da OPEC və qeyri-OPEC ölkələri arasında xüsusi bir əməkdaşlığın sayəsində baş verib.

Kombaynların 52%-i biçinə yararsızdır

"Yeni Müsavat" qəzetində isə "Rayonlarda taxıl sahələrdə batır- kombayn tapılmır" sərlövhəli məqalə oxumaq olar.

Müəllif taxıl biçimilə bağlı ölkədəki durumu müzakirə edir.

Müəllif deyir ki, artıq bir neçə həftədir Azərbaycanda taxıl biçini başlayıb, əlverişsiz hava şəraiti biçin prosesini xeyli ləngidib: "Bir sıra rayonlarda isə məhsulun toplanması üçün kombayn qıtlığı yaranmaqdadır. Bununla bağlı sosial şəbəkələrdə aparılan müzakirələrdən, həmçinin redaksiyamıza daxil olan müraciətlərdən aydın olur ki, Göyçay, Bərdə, Tərtər, Ağcabədi, Zərdab və digər rayonlarda kombayn çatışmazlığı var".

Müəllifin deməsinə görə, hətta bəzi rayon sakinləri Kənd Təsərrüfatı Nazirliyi "Aqrolizinq" ASC-nin filiallarının texnikanı ilk növbədə yerli icra hakimiyyətlərinə yaxın şəxslərin zəmilərini biçməyə yönəltməsi iddialari da var.

"Aqrolizinq" ASC-nin şöbə müdiri İsrafil İsmayılov isə qəzetə yerlərdə kombayn qıtlığı olması iddiasını təkzib edib: "Bu gün Azərbaycanda 2700-dək kombayn var və 2400 ədəd kombayn biçin aparır. Amma "Aqrolizinq"də olan kombaynların 52 faizi istismar müddəti bitmiş maşınlardır".

İ.İsmayılov deyir ki, yağıntılı hava şəraiti ölkədə arpa biçinini də xeyli yubadıb: "Bu il ölkə üzrə arpa əkinləri keçən ilkindən xeyli çoxdur. Bunun da səbəbi budur ki, keçən il arpa baha qiymətə satıldı, vətəndaşlar da bu il onu daha çox əkdilər. Arpa kövrək bitkidir, vaxtında yığılmayanda sünbül qırılıb düşür".

Müəllif deyir ki, şöbə müdiri hava şəraitinin əlverişsizliyi səbəbindən arpa biçini ilə buğda biçininin üst-üstə düşdüyünü və buna görə yerlərdə sıxlıq yarandığını bildirib və qurumun imanları haqda deyib: "Aqrolizinq"in kombaynları ilə ölkədə əkilmiş 990 min hektar taxılın yalnız 37-38 faizi biçilə bilər. Amma müraciətlərin hamısı "Aqrolizinq"in rayon bölmələrinə yönləndirilir deyə sıxlıq yaranır".

İ.İsmayılov rayonlarda yerli icra strukturlarının ASC-nin bölmələrinin fəaliyyətinə təsir etməsi faktı olmadığını və indiyədək qurumun rayon bölmələrindən icra strukturlarının təsir göstərməsi barədə hər hansı məlumat alınmadığını bildirir.

"Sevgisizlik" faciəsi

"Lent.az"da "Şortik qalmaqalı, Lerikdə zorlanan qız, pambıq tarlasında zəhərlənmə - Bizi bu kökə nə saldı?" sərlövhəli məqalə diqqəti cəlb edir.

Müəllif bu günlərdə Bakı metrosunda bir qıza şortik geyindiyinə görə olan mənəvi hücumları dəyərləndirir.

Bu sahəyə rejissor Andrey Zvyagintsevin "Sevgisizlik" filminin süjetləri bucağından baxan müəllif deyir ki, mövcud mənəvi-psixoloji durumun, xaotik əhvalın, kütləvi psixozun əsa səbəbi sevgisizlikdir.

Müəllifə görə, son vaxtlar Azərbaycan gündəmini zəbt edən Lerikdəki zorlanma, pambıq tarlalarındakı zəhərlənmə, elə "şortik" qalmaqalının da kökündə sevgisilzik durur: "Yuxarıda sadaladığım olaylar ilk baxışdan ayrı, fərqli laylarda görünən kimi olsalar da əslində olanlar bütöv bir zəncirin qırılmaz halqalarıdır".

Yazı müəllifi hesab edir ki, ictimai rəydə də səsləndiyi kimi, qiyafətə müdaxilə, fərdin özəl, intim ərazisinə təcavüzdür və toplumda fərdlərin özəl azadlıqlarının tez-tez pozulması artıq normaya dönür.

Müəllifə görə, belə münasibətin ortaya çıxması yeniliyi, fərqliliyi, alternativliyi, azadlığı faciə kimi, az qala fizioloji ağrıyla qəbul etməyin nəticəsidir.

Yazı müəllifi deyir ki. burada ""şortikli" qıza kişi və qadın xeylağı da hücum edir, öz növbəsində isə "şortikli" qız da özünü haqlı sayaraq mövqeyini müdafiə edir.

Müəllif vurğulayır ki, bir yerin ki adı ictimaidirsə orada istəsək də, istəməsək də müəyyən etik normalar gözlənilməlidir və ictimai nəqliyyatda o xanım kimi rahat, saymazyana oturmaq, hamının gözü qarşısında küçəyə bəlğəmi tüpürmək qədər etik deyil.

Müəllif hesab edir ki. burada maraqlı bir nüans da var, yəni, istənilən qiyafəti daşımaq həm də bir xarakter məsələsidir və onu necə daşıya bilmək önəmlidir: "Qısa ətək, şortik geyinib davranış baxımdan qapalı da görünmək olar. Ancaq qapalı geyinib vulqar davranışla çılpaqlaşmaq da olar".

Bütün bunlardan sonra ümumiləşdirmə aparan müəllifə görə, istər kişinin aqressiyası, istər qızın qəzəbi, istər qadının hücumu da geniş kontekstdə sevgisizlik kompleksinin təzahürüdür.

Müəllifə görə, Azərbaycanda sevgi hissi gerçək yaşanmaqdan daha çox məhz imitasiya edilir.