İnsanlar vaksinasiya prosesindən qorxmamalıdır - deputat

Bakı/31.03.21/Turan: Azərbaycanın həm peyvənd alışı həcminə, həm də ondan istifadə sürətinə görə MDB ölkələri arasında lider olduğu deyilir.

Ölkədə ümumilikdə 600 min nəfərə yaxın vaksinasiya prosesindən keçib.

Bununla yanaşı son zamanlar sosial şəbəkələrdə vaksinasiya prosesi ilə bağlı müxtəlif xəbərlər dolaşmağa başlayıb.

Bildirilir ki, bəzi yerlərdə tibb işçiləri vaksinin bir dozasını iki nəfərə bölür. «Peyvəndlənmənin birinci hissəsi qaydalara uyğun aparılsa da, indi poliklinikalara lazım qədər peyvənd verilmir və ona görə də 1 peyvənd iki nəfərə vurulur».

Digər tərəfdən peyvəndi vurmaq istəməyən, lakin immunizasiya pasportunu (vaksinasiyadan keçməsi haqqında sənəd) almaq istəyən, bununla bağlı həkimlərə müraciət edən və hətta müxtəlif yollarla buna nail olan şəxslərin peyda olması barədə da xəbərlər yayılıb.

Həqiqətənmi belə faktlara rast gəlinir? Belə hallar varsa bunun nəticələri nə olacaq?

Səhiyyə Nazirliyinin mətbuat xidmətindən Turana bildirilib ki, kimdəsə bu kimi neqativ halların baş verməsi haqqında məlumatı varsa, dərhal bununla bağlı Səhiyyə Nazirliyinə məlumat verməlidir. «Fakt varsa, buna yol verən tibb müəssisəsinin, işçinin adını bizə təqdim etsinlər, biz də bunu araşdıraq. Sosial şəbəkələrdə milyonlarla insan var və hamı ürəyi nə istəyir yaza bilir. Konkret fakt olmayandan sonra bu kimi məlumatların əsası yoxdur».

Milli Məclisin deputatı Rüfət Quliyev Turana bildirib ki, vaksinasiyadan keçmədən saxta sənəd almaq istəyən şəxslərin olması istisna edilmir. «Həmin şəxslərin buna nail olması da istisna edilmir. Məndə də bu barədə məlumatlar var. Həmin şəxslərin arasında elələri da var ki, niyəsə peyvənd vurdurmaqdan qorxurlar, amma hər hansı səbəblərə görə xaricə getmək planlaşdırırlar və bunun üçün həmin saxta sənədi almağa çalışırlar».

Deputat bunu səhv addım kimi qiymətləndirib. «Bu, faciəvi bir səhvdir. Birincisi ona görə ki, həmin şəxslər vaksinadan qaçır, ikincisi isə saxta sənəd əldə etmək üçün cinayətə əl atırlar».

Deputat qeyd edib ki, insanlar vaksinasiya prosesindən qorxmamalıdır. «Bütün dünyada insanlar vaksini vurdurmaqdan qorxur. Bu, təkcə Azərbaycanda deyil. Lakin burada qorxulu heç nə yoxdur, vaksin tamamilə ziyansızdır, əksinə koronavirusun fəsadlarından qoruyur. Milli Məclisin bütün deputatları artıq vaksinasiyadan keçib, deputatlar ölkədə hamıya tədbiq olunan vaksinlə peyvəndlənib».

Ṛ.Quliyev aidiyyatlı dövlət orqanlarını həm vaksinasiya prosesinə, həm də koronavirus xəstələrin qeydiyyatı ilə bağlı proseslərə daha ciddi nəzarət etməyə çağırıb. «Həmçinin yaxşı olardı ki, Səhiyyə Nazirliyi və TƏBİB təlimat hazırlasınlar. Həmin təlimatda göstərilməlidir ki, əgər kimdəsə qanunsuz yolla sənəd əldə etmək haqqında hətta fikir belə yaransa o, inzibati və cinayət məsuliyyətinə cəlb oluna bilər. Bu, həm vətəndaşlara, həm tibb işçilərinə aiddir».

Deputat qeyd edib ki, son vaxtlar bəzi koronavirusa yoluxmuş şəxslər rəsmi qeydiyyata düşməmək üçün müxtəlif üsullardan istifadə etməyə çalışırlar. «Belə şəxslər kompyuter tomoqrafiyadan keçirlər, qan analizini verirlər və məlum olanda ki, onlar koronavirusa yoluxub başlayırlar həkimlərə yalvarmağa ki, adlarını portala salmasınlar. Buna qətiyyən yol vermək olmaz. Koronavirusun simptomları olan bütün şəxslər PCR testindən keçməlidir. Vaksinasiya prosesinin aparılması ilə paralel yoluxanların sayının azaltmalıyıq. Dövlət bunun üçün dünya səviyyəsinə uyğun praktiki olaraq hər şeyi təqdim edib».

R.Quliyev vurğulayıb ki, PCR testlərin qiyməti ilə bağlı məsələ Milli Məclisdə dəfələrlə qaldırılıb. «Hökümət isə bizə bildirib ki, qiymətləri aşağı salması üçün özəl klinikalara təsir göstərəcək. Bildiyim qədər, artıq qiymətlər 100 manatdan 80 manata düşüb. Mən özəl klinikaları qiymətləri daha da ucuz etməyə çağırıram. Bundan əlavə bütün dövlət tibb müəssisələrində həmin testlərin aparılması təşkil olunsa yaxşı olar. Qiymətlər isə özəl klinikalardakı qiymətlərindən daha aşağı – 40-50 manat civarında olmalıdır».

Tibbi elmləri doktoru Adil Qeybulla AzadlıqRadiosuna bildirib ki, belə bir şayiələr dolaşır. «Bütün bunları bir-bir araşdırmaq lazımdır. Səlahiyyətli qurumlar bununla məşğul olsun. Qeyd olunmuş məsələlər varsa, bunlar cinayətdir və buna yol verən adamlar varsa, onlara qarşı ciddi tədbirlər görülməlidir. Vaksinasiya genefondun təhlükəsizliyi məsələsidir. Sabah bu korrupsiya faktları üzə çıxsa, bu heç kəsə baş ucalığını gətirməyəcək. Həm də bu, insanların taleyi ilə oynamaqdır».—21D-