İran sərhədində 43 kq-dan çox narkotik vasitə saxlanılıb

Bakı/06.01.23/Turan: Ötən gün İran-Azərbaycan sərhədində 43 kq-dan çox müxtəlif narkotik vasitələr müsadirə edilib, bu barədə Dövlət Sərhəd Xidmətinin mətbuat xidmətinin məlumatında deyilir.

Belə ki, yanvarın 5-də səhər saat 10 radələrində Beyləqan rayonunun Birinci Şahsevən kəndi yaxınlığında yerləşən sərhəd zastavasının xidməti ərazisində 2 nəfər naməlum şəxsin İran İslam Respublikasından Azərbaycan Respublikası istiqamətində dövlət sərhədini pozması sərhəd naryadı tərəfindən müşahidə olunub. Havaya xəbərdarlıq atəşinin açılmasına baxmayaraq, sərhəd pozucuları ərazinin sıx qamışlıq olmasından istifadə edərək geri, İran ərazisinə qaçıblar.

Xidməti ərazidə pilotsuz kəşfiyyat uçuş aparatı vasitəsi ilə keçirilmiş sərhəd axtarışı və əməliyyat tədbirləri nəticəsində 2 ədəd bağlamada 21 kiloqram 600 qram "marixuana" aşkar olunaraq götürülüb.

Həmin gün saat 20:20-də Füzuli rayonunun Birinci Mahmudlu kəndi yaxınlığında yerləşən sərhəd zastavasının xidməti ərazisində 2 nəfər naməlum şəxsin İran tərəfindən dövlət sərhədini pozması müşahidə olunub. Onlar da "Dayan" komandasına və xəbərdarlıq atəşinə məhəl qoymayaraq qaçmağa cəhd göstəriblər. Sərhəd naryadı təlimata uyğun hərəkət edərək sərhəd pozucusunu yaxalamaq məqsədilə silah tətbiq edib və sərhəd pozucularından birini ayağından yaralayıb. Saxlanılan şəxsin üzərindən 1 (bir) ədəd xəncər aşkar edilib. Yaralanmış şəxsə sərhədçilər tərəfindən ilkin tibbi yardım göstərildikdən sonra Füzuli rayon Mərkəzi Xəstəxanasına təxliyə olunub.

Ərazidə aparılmış axtarış tədbirləri nəticəsində qamışlıqda gizlənmiş digər sərhəd pozucusu saxlanılıb, baxış zamanı 1 (bir) ədəd bağlamada 6 kiloqram 400 qram "marixuana" (xırda bükümlərdə "metamfetamin", 1000 (min) ədəd psixotrop tərkibli "gapaprel" həbləri) və 1 (bir) ədəd bıçaq aşkar olunaraq götürülüb.

Araşdırma zamanı saxlanılan şəxlərin İran İslam Respublikasının Parsabad şəhər sakinləri 1989-cu il təvəllüdlü Şeyxniya Əli Cəmşid oğlu və Əlipur Poya Qəşəm oğlu olduqları müəyyən edilib.

Yanvar ayının 6-na keçən gecə Beyləqan rayonunun İmamverdili kəndi yaxınlığında keçirilmiş tədbirlər nəticəsində Bakı şəhər sakini 1992-ci il təvəllüdlü Həsənova Solmaz Saləddin qızı saxlanılıb və şəxsin üzərinə baxış keçirilərkən 1 ədəd bağlamanın içərisində 14 kq 500 qram "marixuana", 600 qram "tiryək", 1300 ml maye halında "metadon M-40", 1560 ədəd psixotrop tərkibli həblər və 10 ədəd "sinarolac" göz damcısı aşkar olunaraq götürülüb.

Qeyd olunan faktlar üzrə əməliyyаt-istintaq tədbirləri dаvаm еtdirilir. 02D