İsveçrədə Mehman Hüseynovun əməliyyatı uğurla keçib

Bakı/11.09.20/Turan: Cenevrə Universiteti hospitalının həkimləri azərbaycanlı hüquq müdafiəçisi və bloqer Mehman Hüseynovu uğurla əməliyyat edərək xərçəng şişini götürüblər. Bloqerin qardaşı, RATİ-nin direktoru Emin Hüseynov Turan-a bildirib ki, əməliyyat sentyabrın 8-də keçirilib və 10 saata yaxın davam edib.

Sentyabrın 9-da xəstəni palataya köçürüblər, orada iki-üç həftə həkimlərin nəzarəti altında olacaq və bundan sonra xəstəxanadan evə buraxılacaq. Əməliyyatdan öncə M.Hüseynov ikiaylıq şüa (radio) terapiyası kursunu keçib ki, bu da şişi əhəmiyyətli dərəcədə lokallaşdırıb.

Xatırladaq ki, M.Hüseynovun vəziyyəti dekabrın 27-də polis əməkdaşları tərəfindən amansızcasına döyüldükdən sonra pisləşmişdi. O, saxta ittiham ilə həbs olunmuş musiqiçi Pərviz Quluzadənin azad edilməsi tələbilə DİN-in binası qarşısında keçirilən etiraz aksiyasından sonra saxlanılmışdı.

Sonrakı iki həftə ərzində bloqer döyülmə izlərini Bakı klinikalarında sənədləşdirə bilməyib, müayinə və müalicə təyinatı ala bilməyib. Bu səbəbdən M.Hüseynov Gürcüstanda müayinədən keçməli olub, orada həkimlər onda nadir onkoloji xəstəlik aşkar ediblər, təcili olaraq Avropada müalicəyə başlamağı məsləhət görüblər.

Martın əvvəllərində o, Cenevrə Universitetinin hospitalında müayinə olunub, orada onkoloji diaqnoz təsdiq edilib.

Böyük müalicə xərclərini ödəyə biləcək tibbi sığortanın olmaması səbəbindən, həmkarları və tərəfdaş beynəlxalq təşkilatlar görünməmiş həmrəylik kampaniyası keçirərək lazımi məbləği toplayıblar. Bunun sayəsində M.Hüseynov sağlamlığını bərpa etmək imkanı əldə edib.

M.Hüseynov, həmçinin onun ailəsi, Reportyorların Azadlıq və Təhlükəsizlik İnstitutundan olan həmkarları Azərbaycanda və digər ölkələrdə GoFundMe platforması vasitəsilə onun müalicəsi üçün 83 min dollara yaxın vəsait toplamış minlərlə adama öz minnətdarlıqlarını bildirirlərlər. ( https://gf.me/u/yk37i6 )

Hüquq müdafiəçisi və yaxınları 50 min dollara yaxın  əlavə maliyyə yardımını səfərbər edə bilən İnsan Hüquqları Evləri Fondu (Norveç), Tbilisi İnsan Hüquqları Evi (Gürcüstan), Turan İnformasiya Agentliyi (Azərbaycan), Danimarka Jurnalistlər Birliyi, International Media Support (Danimarka), Foundation Inden Vreemde (Niderland), Helsinki Foundation for Human Rights (Polşa), İsveçrə, Almaniya və Norveçdən donorlar (adlarının anonim qalmasını istəyiblər) və INGOs Conference of the Council of  Europe prezidentinə dərin təşəkkürlərini bildirirlər.

M. Hüseynov növbəti bir neçə həftə ərzində Cenevrə Universiteti hospitalında stasionar (əməliyyat sonrası) müalicənin son mərhələsində qalacaq və bundan sonra oktyabrın ortalarına qədər ambulator reabilitasiya üçün evə buraxılacaq.

M.Hüseynov oktyabrın sonlarında Azərbaycana qayıtmağı, hüquq- müdafiə və jurnalist fəaliyyətini davam etdirməyi planlaşdırır.—06D—