Jurnalist Elçin Həsənovun işi üzrə məhkəmə prosesi təxirə salınıb

Bu gün Nizami Rayon Məhkəməsində xuliqanlıqda ittiham olunan  jurnalist Elçin Həsənovun işi üzrə növbəti iclas baş tutmayıb.  İclasda müttəhim son sözlə çıxış etməliydi. İclasın başqa vaxta keçirilməsinə dövlət ittihamçısının prosesə gəlməməsi səbəb olub. Hakim iclası 1 iyun saat 11:45-ə təyin edib.

13 may iclasında prokuror E.Həsənovun 3,5 il müddətinə azadlıqdan məhrum  edilməsini istəmişdi. Mayın 18-də vəkil F.Namazlı məhkəməni E.Həsənova qarşı cinayət işini bəraətverici əsaslarla dayandırmağa çağırıb.

Cinayət işi bir il öncə baş vermiş hadisə ilə əlaqədardır.  Belə ki, E.Həsənov “Asiya” agentliyinin keçmiş rəhbəri Cəfər Cəfərovun hücumuna məruz qalıb (sonuncu hazırda zorla pul tələb etmək ittihamı ilə istintaq altındadır).

İnsidentdən sonra E.Həsənov polisə şikayət edib və bir qədər sonra C.Cəfərov E.Həsənovun şikayəti üzrə deyil, zorla pul tələb etmək faktı ilə əlaqədar DİN Baş Mütəşəkkil Cinayətkarlıqla Mübarizə İdarəsinin əməkdaşları tərəfindən saxlanılıb.

Lakin bu ilin martında bu fakt üzrə E.Həsənovun özünə qarşı   CM-in  221.1-ci maddəsi (xuliqanlıq) ilə cinayət işi qaldırılıb. E.Həsənov mətbuata bu barədə məlumat verdikdən  sonra xuliqanlıq ittihamı daha ağır maddəyə - 221.3-ə (odlu silah tətbiq etməklə xuliqanlıq) tövsif edilib.

E.Həsənov hesab edir ki, o, jurnalist və müxalifət fəaliyyətinə görə təqib olunur. Belə ki, o, Sumqayıtda nəşr edilən “Yüksəliş naminə” İnternet-qəzetin  redaktor müavinidir ( https://www.facebook.com/Elcin.Hasanov?fref=ts)

Bundan əlavə, E.Həsənov AXCP Ali Məclisinin üzvü, “Sumqayıt Gənclərinin Hüquqi Maarifləndirilməsi” qeyri-hökumət təşkilatı sədrinin müavinidir.

E.Həsənova qarşı cinayət işinin qaldırılması onun orduda korrupsiya və mənimsəmələrlə bağlı yazılarının dərcilə eyni vaxta təsadüf edir.–06B—