Jurnalist Fikrət Fərəməzoğlunun işi üzrə ekspertiza təyin edilib

Bu gün Bakı Ağır Cinayətlər Məhkəməsində jurnalist Fikrət Fərəməzoğlunun işi üzrə prosesdə imzaların ekspertizaya göndərilməsi ilə bağlı vəkilin vəsatəti təmin edilib.

Vəkil Elçin Sadıqov Turan-a bildirib ki, materiallarda “Əməliyyat-axtarış fəaliyyətinin keçirilməsi və maddi sübutların götürülməsi haqda protokol” var.

Söhbət F.Fərəməzoğludan guya hədə yolu ilə aldığı 3 min manatın götürülməsindən gedir. 

F.Fərəməzoğlu deyib ki, bu protokoldakı imza onun deyil. 

“Odur ki, biz ekspertizanın keçirilməsi və imzanın müəllifliyinin müəyyən edilməsi üçün vəsatət qaldırdıq”, - E.Sadıqov bildirib.

Məhkəmə bu vəsatəti təmin edib, lakin jurnalistin mobil telefonuna gəlib-gedən zənglərin müəyyənləşdirilməsi üçün mobil operatora sorğu göndərilməsi haqda vəsatət təmin etməyib.

Məhkəmə əlavə şahidlərin çağırılması barədə vəsatəti təmin etməyib.

* Fikrət Fərəməzoğlu 2016-cı il iyunun 30-da həbs olunub. Onun hazırda iş üzrə üç zərərçəkəndən biri olan Mehman Həsənovdan 3 min manat alarkən saxlanıldığı bildirilir.

Ona qarşı Cinayət Məcəlləsinin 182-ci (hədə-qorxu ilə tələb etmə) maddəsi ilə ittiham irəli sürülüb.

Jurnalist isə ittihamı qəbul etmir, əxlaqsızlıq yuvalarını ifşa etdiyinə görə sifarişlə həbs olunduğunu bildirir.06D--