Jurnalist Pərviz Həşimli 8 il azadlıqdan məhrum edilib

 Mayın 15-də Bakı Ağır Cinayətlər Məhkəməsində jurnalist və hüquq müdafiəçisi Pərviz Həşimlinin barəsində hökm oxunub. Məhkəmə onu 228.2.1 (qabaqcadan bir qrup şəxslə əlbir olaraq silah və hərbi sursatın qanunsuz əldə edilməsi, daşınması, satışı, saxlanması, gəzdirilməsi) , 228.2.2 (həmin hərəkətlərin təkrar törədilməsi) və 206.3.2 (qabaqcadan bir qrup şəxslə əlbir olaraq qaçaqmalçılıq) madələri ilə təqsirli bilərək 8 il azadlıqdan məhrum edib.

Bu iş üzrə keçən digər müttəhim Təvəkkül Qurbanov da həmin maddələrlə təqsirli bilinib. O 8,5 il müddətinə azadlıqdan məhrum edilib.

Öncə prokuror onların 9 il azadlıqdan məhrum olunmasını istəmişdi.

Ötən gün P.Həşimli məhkəmədə yekun sözlə çıxış edib. O bildirib ki, özünü təqsirli saymır, günahsız olduğunu subuta yetirdiyini hesab edir.

“Bura ağır cinayətlər məhkəməsidir. Burada terrorçuları, başkəsənləri, dələduzları, qatilləri mühakimə edirlər. Odur ki, hakimlərdən tələb edirəm ki, mənə həmin cinayətkarlar kimi baxmasınlar. Mən təqsirkar deyiləm. Mən sübut etdim ki, cinayət törətməmişəm. Əsl cinayətkarlar MTN rəhbərliyindədir. Bunlar Antiterror Mərkəzinin rəisi Elçin Quliyev, onun müavini İlqar Əliyev, müstəntiq Elçin Murtuzovdur. Onların niyə məni  məni böhtan xarakterli ittihamla həbs etdiklərini bilirəm və proses zamanı bu barədə dəfələrlə söyləmişəm. Onlar özlərinə düşmən hesab etdikləri adamların qisasını alırlar. Onların Nağıyev qardaşlarına nifrətlərinin həddi-hüdudu yoxdur. Əgər mənim həbsimə geniş yerli və beynəlxalq reaksiya olmasaydı, xarici mətbuat bu haqda yazmasaydı, MTN-də məni öldürərdilər”, -o bildirib.

Həbsdən sonra 20 gün ərzində o, təkadamlıq kamerada tam təcrid olunmuş vəziyyətdə saxlanılıb, onun yanına vəkil buraxılmayıb, fiziki və psixoloji təzyiqlərə məruz qalıb. “Bu generallar utanmadan mənə dedilər ki, görürsən də sənin başına nə iş açdıq”..Doğmalarımla uzun müddət əlaqəm olmayıb. Həbsimdən 40 gün sonra beşyaşlı qızımın fotosunu mənə veriblər. Allah mən güc verdi ki, mən bu ağrıların, dəhşətlərin qarşısında davam gətirdim”, - o vurğulayıb.

Müttəhimin fikrincə, ən dəhşətlisi odur ki, istintaqa nəzarət  edən prokurorlar MTN-in qarşısında aclzdirlər. “Onlar mənim şikayətlərimi, işgəncələrə dair vəsatətlərimi araşdırmırlar. Vəkillərin bütün vəsatətləri rədd edilib.

Vəsatətin biri Həşimlinin evində qurulmuş müşahidə kamerasından yaddaş kartının götürülməsinə aiddir. Onun fikrincə, bu, “silahı  MTN işçilərinin özlərinin qoyduğuna açıqlama gətirəcəkdi, hamı onların mənim həyat yoldaşıma və qızıma hücum çəkdiyini görəcəkdi”. İkinci vəsatət jurnalistin həbs olunduğu gün İran vətəndaşlarının Azərbaycan sərhəddini keçməsinə dair Sərhəd Xidmətinin məlumat alması ilə bağlı idi. “O zaman məlum olacaqdı ki, istintaqın uydurduğu kimi guya İrandan silah gətirən Hüseyn adlı adam olmayıb. Əgər mobil rabitə operatorlarının hamısından sorğu alınsaydı bəlli olardı ki, mən İranda heç kimə telefon etməmişəm və oradan mənə zəng daxil olmayıb”, - Həşimli bildirib.

İş üzrə digər müttəhim T.Qurbanov proses zamanı özünü müdafiə etməyə cəhd göstərməyib, ittiham materialları ilə razılaşıb.

“Bizim yol” qəzetinin əməkdaşı,  moderator.az  saytının, Siyasi və Vətəndaş Hüquqlarının Müdafiə Mərkəzinin rəhbəri  Pərviz Həşimli 2013-cü il sentyabrın 17-də MTN əməkdaşları tərəfindən həbs olunub. O qaçaqmalçılıqda (206.3.2-ci maddə) və qanunsuz silah saxlamaqda (228.2.1) ittiham olunub. Sonradan 228.2.1-ci maddədə nəzərdə tutulan hərəkətlərin təkrar törədilməsində ittiham olunub. —06D--