Keçmiş deputatlar prezidentə müraciət hazırlayır

Noyabrın 12-də Bakıda 1990-1995-ci illər Azərbaycan parlamenti deputatlarının  toplantısı keçirilib. Xatırladaq ki, bu özünəməxsus deputat forumu Müstəqillik gününün iyirmi illiyi ərəfəsində formalaşıb. 

Toplantı ölkənin bütün regionlarını əhatə edir. Onun tərkibinə görkəmli dövlət və ictimai xadimlər, iri sənaye müəssisələrinin rəhbərləri, iş adamları, elmi işçilər və jurnalistlər daxildir. Ənənəvi hala çevrilən iclas zamanı iştirakçılar ölkənin cari problemlərini müzakirə edirlər, mühüm və tənqidi məqamlarla bağlı öz fikirlərini söyləməyi, onlara ictimaiyyətin, hökumət dairələrinin diqqətini cəlb etməyi vacib sayırlar.

Bu dəfə keçmiş deputatlar respublikadakı sosial-iqtisadi durumu müzakirə ediblər. Bu barədə Turan-a toplantı ağsaqqalı, Qubadlı rayonunun nümayəndəsi Şahsuvar Yəhyayev bildirib. 

“Çıxış edənlərin əksəriyyətinin fikrincə, demək olar ki, bütün rayonlarda xeyli qrup əhalinin durumu pisləşməkdə davam edir. Keçid dövrünün parlament deputatları arasında ölkədə sosial-iqtisadi durumun monitorinqini həyata  keçirənlər az deyil. Onlar məşğulluğun, həyat səviyyəsinin və keyfiyyətinin yaxşılaşması barədə rəsmi statistikanı təkzib edən rəqəm və faktlara malikdir. Artan işsizliyin ardınca gənclərin respublikanı tərk etməsi baş verir, ailələrin əksəriyyətinin maliyyə durumu çətinləşir. Bizim analitiklərin fikrincə, Azərbaycanda orta ömürlülük demokratik islahatların əvvəlində olduğu vaxtlardan çox aşağıdır”, - Ş.Yəhyayev qeyd edib.

Toplantı hesab edir ki, bəzi müstəsna durumlar keçmiş deputatlara narahatlıq doğurur: Birincisi, əhalinin əmlak baxımından təbəqələşməsi. Varlı, çox varlı və olduqca varlı təbəqələr əmələ gəlib. Bu fonda kütlənin lümpenləşməsi gedir.

İkincisi, vətəndaşların neft və qaz gəlirlərindən daxil olan mənfəətdəki paylarından məhrum olmaları.

Üçüncüsü, 1 mln. 200 min pensiyaçının cəmiyyətin məzlum hissəsinə daxil edilməsi. Azərbaycanda pensiya təminatı vətəndaşların əmək fəaliyyətinin nə miqyasını, nə xarakterini nə də xüsusiyyətini əks etdirmir.

Toplantıda səslənən fikirlərə görə, iri müəssisə rəhbərlərinin, yüksək ixtisaslı mütəxəssislərin, elm və yaradıcı şəxslərin əmək haqları mahiyyətcə ixtisası olmayan adamların əməyinin qiymətləndirilməsini ötmür. 

Bu kontekstdə iclas iştirakçıları hesab edirlər ki, vaxtilə müstəqillik aktını qəbul etmiş deputatların durumu hakimiyyətin əhalinin aztəminatlı hissəsinə münasibətini əks etdirir.

1990-1995-ci il çağırışdakı 349 deputatdan yarıya qədəri sağdır. Onların əksəriyyətinin maddi durumu çox ağırdır.  

Müstəqillik bəyannaməsi müəlliflərinin layiqli pensiya və imtiyazla təmin olunması barədə ictimaiyyət nümayəndələrinin dəfələrlə çıxışlarına baxmayaraq, məsələ həll olunmamış qalır. 

Keçmiş deputatların toplantısı qərara alıb ki, bu sosial ədalətsizliyin aradan qaldırılması çağırışı ilə dövlət başçısına müraciət qəbul olunsun.  -0-