Koka-Kola Azərbaycan şirkətinə ABŞ Dövlət Katibinin Korporativ Mükəmməllik Mükafatı təqdim edilib

Bakı/11.03.21/Turan: Martın 10-da ABŞ-ın Azərbaycandakı səfiri Li Litzenberger Koka-Kola Azərbaycan şirkətinin baş meneceri Rəna Məmmədova və Coca-Cola şirkətində digər rəhbər vəzifələrdə çalışan şəxslərlə birlikdə "Qadınları Gücləndirmək üçün Tərəfdaşlıq" təşəbbüsünün əhəmiyyətini qeyd edən tədbirə qatılıb.

ABŞ Səfirliyi Feysbuk səhifəsində bildirib ki, bugünki tədbir zamanı səfir Koka-Kola Azərbaycan-a Dövlət Katibinin Korporativ Mükəmməllik Mükafatını təqdim edib.

"Mükafat hər il yerli icmaların həyatını yaxşılaşdırmaq üçün üstün öhdəlik nümayiş etdirən üç qlobal şirkətə verilir. Mart ayı boyunca Qadınların Tarixi Ayını qeyd etməyə davam edərkən, Koka-Kola Azərbaycan-ın qadınların gücləndirilməsi kateqoriyasında qalib gəldiyi üçün qürur duyuruq. Koka-Kola Azərbaycanda bu nüfuzlu mükafatı qazanan ilk şirkətdir. Koka-Kola Azərbaycan təlim proqramları ilə kənd yerlərində azərbaycanlı qadınları gücləndirməklə yanaşı, istedadlı və bacarıqlı qadınları təşkilat daxilində də rəhbər vəzifələrə gətirmişdir", deyə səfirliyin məlumatında qeyd edilir.

Koka-Kola Amerika Birləşmiş Ştatları mənşəli, karamelizə şəkərlə dadlandırılmış spirtsiz içki markasıdır. Koka-Kola və müxtəlif spirtsiz içki markalarının sahibi, mərkəzi ABŞ-ın Corcinya ştatının Atlanta şəhərində olan çoxmillətli şirkətdir. 1886-cı ildə qurulan şirkətin səhmləri Nyu York Birjasında KO qısaltması ilə əməliyyat göstərir.

İkinci Dünya Müharibəsindən sonra Amerika həyat tərzinin bir simvolu olaraq əvvəl Avropada, sonra bütün dünyada məşhur reklam kampaniyaları ilə böyük bazar payı qazanıb. Soyuq Müharibənin ardınca Sovet İttifaqında və Şərqi Avropada istehsal və satışa başlayıb, bu bölgələrdə spirtsiz içki bazarında güclü vəziyyətə gəlib.

Koka-Kola Azərbaycan şirkəti 1996-cı ildə yaradılıb. -03-