Lapşinin vəkili hökmdən qismən razıdır (YENİLƏNİB)

Bakı/20.07.17/Turan: Müdafiə tərəfi bloger Aleksandr Lapşin barəsində hökmdən apellyasiya şikayəti verilməsi haqqında qərarı vəkilin təqsirləndirilən şəxsin özü ilə məsləhətləşməsindən sonra qəbul edəcək. Bu barədə Turan-a Lapşinin vəkili Eduard Çernin bildirib.

Məhkəmə istintaqının yekunlarını şərh edən Çernin onun "normal" və prosessual qanunvericiliyə uyğun olduğunu deyib.

"Məhkəmə (cinayət işinə) kifayət qədər obyektiv yanaşıb. Çıxarılmasını istədiklərimizin heç olmasa 50 faizini çıxarıblar. Bu, az deyil", deyən vəkil Çernin 281.2-ci maddə üzrə ittihamın ləğv edilməsini nəzərdə tutub.

Apellyasiya şikayəti verilib-verilməyəcəyi barədə suala cavabda Çernin deyib ki, bu, Lapşinin özündən asılı olacaq.

"Növbəti addımlarım müvəkkilimin qərarından asılı olacaq. Əlbəttə, onunla razılaşdırmadan biz heç bir addım atmayacağıq", deyə Çernin bildirib.

Vəkil özü hesab edir ki, apellyasiya şikayəti verilməlidir.

Vəkil məhkəmədə son çıxışında Lapşinə tamamilə bəraət verməyi xahiş etmişdi.

Lapşin cəzasını çəkmək üçün vətəndaşı olduğu ölkələrə verilə bilər? Bu suala cavabda vəkil deyib: "İsraillə Azərbaycanın razılaşması yoxdur. Rusiya və Ukrayna ilə belə razılaşmalar var və o, təhvil verilə bilər",

Qeyd edək ki, məhkumun vətəndaşı olduğu ölkəyə təhvil verilməsi məsələsinə hökmün qanuni qüvvəyə minməsindən sonra baxıla bilər.

Hələlik isə müdafiə tərəfin hökmdən şikayət vermək üçün 20 gün vaxtı var.

Lapşin Azərbaycanın işğal edilmiş ərazilərinə qanunsuz səfər etdiyinə görə cinayət məsuliyyətinə cəlb edilib.

O, dekabrın 16-da Azərbaycanın sorğusu əsasında Belarus hakimiyyəti tərəfindən saxlanılıb və 2017-ci il fevralın 7-də Bakıya təhvil verilib.

Ona qarşı Azərbaycan Cinayət Məcəlləsinin 281.2 (dövlət əleyhinə yönəlmiş açıq çağırışlar) və 318.2-ci (Azərbaycan Respublikasının dövlət sərhədini qanunsuz keçmə) maddələri ilə ittihamlar irəli sürülüb.

Məhkəmə istintaqının yekunlarına görə ona qarşı 281.2-ci maddə ilə ittiham ləğv edilib, belə ki, məhkəmə onun Azərbaycanın ərazi bütövlüyünün pozulmasına açıq çağırışlar etməkdə təqsirli bilinməsi üçün dəlillərin kifayət qədər olmadığını hesab edib.

Məhkəmə Lapşini yalnız 318.2-ci (sərhədi qanunsuz keçmə) maddəsi ilə təqsirli bilib.

Məhkəmə cəza təyin edərkən yüngülləşdirici halı - Lapşinin azyaşlı övladının olmasını rəhbər tutub.

Eyni zamanda, məhkəmə ağırlaşdırıcı hallar müəyyən etməyib.

Sonda məhkəmə Lapşini cəzasını ümumi rejimli cəzaçəkmə müəssisəsində çəkməklə, 3 il müddətinə azadlıqdan məhrum edib. Bu zaman cəza onun Minskdə saxlanıldığı tarixdən - 15 dekabr 2016-cı ildən hesablanır. -06C-

* * *

2017 İyul 20 (Cümə axşamı) 13:58:40

Məhkəmə Lapşinə 3 il həbs cəzası verib

Bakı/20.07.17/Turan: Bakı Ağır Cinayətlər Məhkəməsində Azərbaycanda həbsdə olan bloqger Aleksandr Lapşinin cinayət işi üzrə məhkəmə prosesi yekunlaşıb.

Hakim Əlövsət Abbasovun sədrliyi ilə keçirilən iclasda hökm elan olunub.

Məhkəmə onu 318.2 (sərhədi qanunsuz keçmək) maddəsi ilə təqsirli bilərək

A. Lapşin cəzasını ümumi rejimli cəzaçəkmə müəssisəsində çəkməklə 3 il müddətinə azadlıqdan məhrum edib

Eyni zamanda məhkəmə hökmünə görə A.Lapşin Cinayət Məcəlləsinin 281.2 (dövlətə qarşı açıq çağırışlar) maddəsi sübuta yetirilmədiyindən onun üzərindən götürülüb.

Qeyd edək ki, ayrı-ayrı dövlətlərin vətəndaşlığını daşıyan A. Lapşin Azərbaycanın dövlət sərhədini qanunsuz olaraq keçmə, ərazi bütövlüyünü parçalamağa yönələn açıq çağırışlar etmə əməllərinə görə Azərbaycan Baş Prokurorluğunun Ağır Cinayətlərə Dair İşlər üzrə İstintaq İdarəsində istintaqı aparılan cinayət işi əsasında təqsirləndirilən şəxs qismində cəlb edilərək beynəlxalq və dövlətlərarası axtarışa verilməsi ilə əlaqədar 2016-cı il dekabrın 15-də Belarus Respublikasının hüquq-mühafizə orqanları tərəfindən Minskdə saxlanılaraq, 2017-ci il fevralın 7-də Azərbaycan Respublikasına ekstradisiya edilib. -06/16B--