Lənkəranda fəal tələbə saxlanılıb

Bakı/01.02.21/Turan: Fevralın 1-də Tələbə Güc Mərkəzinin (TGM) sədri Əhməd Məmmədli Lənkəran Dövlət Universitetinin qarşısında təşkilatın bəyanatını səsləndirməyə gedərkən saxlanılıb. Bu barədə Turan-a TGM-dən məlumat veriblər.

Mənbənin məlumatına görə, Məmmədli Universitet tərəfindən əraziyə çağırılmış polis əməkdaşları tərəfindən saxlanılıb.

Onun oxumaq istədiyi bəyanat tələbələrin hüquqlarının pozulması ilə bağlı idi.

“Yanvar ayıərzindəki imtahan sessiyası boyunca bütün ölkə universitetlərinin tələbələrininimtahan prosesi, illik ödənişlə bağlı problemlər yaşanıb. Tələbələrin ən çətin və ədalətsiz şərtlər altında imtahan verdiyi universitetlərdən biri Lənkəran Dövlət Universiteti idi.

İmtahan sessiyası başlayan kimi müəyyən çətinliklər səbəbindən illik ödənişləri tamamlaya bilməyən tələbələrin imtahana buraxılmayacağı, ərizə yazmalarının isə əbəs yerə olduğu onlara bildirilib”, deyə tələbələrin nümayəndələri Turan-a bildiriblər.

Tələbələrin fikirlərinin nəzərə alınması xahişlərinə universitet rəhbərliyi rədd cavabı verib. Buna görə tələbələr fevralın 1-də öz etirazlarını bildirmək, LDU qarşısında etiraz bəyanatını səsləndirmək qərarına gəliblər.

DİN-dən Turan-ın müxbirinə bildiriblər ki, bu məsələ ilə bağlı məlumat veriləcək. -06D-