AMİP Azərbaycan hökumətinin istefasını tələb edib

Bakı/01.02.21/Turan: Azərbaycan Milli İstiqlal Partiyası (AMİP) Tarif Şurasının fevralın 1-dən su təchizatı və kanalizasiya xidmətləri tariflərinin ikiqat artırılması haqqında qərarını pisləyib.

“Tarif Şurasının milyonlarla isterhlakçının rəyini nəzərə almadan belə qərar verməsi hər hansı bir məntiqə sığmamaqla yanaşı, onsuz da pandemiya və işsizlik səbəbi ilə ağır sosial-iqtisadi durumla üzləşmiş insanımızın vəziyyətinin daha da ağırlaşmasına səbəb olacaqdır. Yüz minlərlə insanın işsiz qaldığı, əhalinin gəlirlərinin azaldığı bir dövrdə verilən məntiqsiz və heç bir çərçivəyə sığmayan bu tip qərarlar birmənalı olaraq xalqa sayqısız yanaşmanın və etinasız münasibətin təzahürü kimi qiymətləndirilir”, deyə partiyanın bəyanatında bildirilir. 

Qiymətlərin artırılmasının su infrastrukturunun yaxşılaşdırılması, əməkdaşların əməkhaqqının artırılması, habelə su sərfiyyatına qənaətlə əsaslandırılması vətəndaşların aldadılmasından başqa bir şey deyil, partiya belə hesab edir.

AMİP Tarif Şurasının qərarını işsizlikdən, yoxsulluqdan, ehtiyacdan əziyyət çəkən xalqımıza qarşı təhqir kimi qiymətləndirir və hökumətin dərhal istefa verməsini tələb edir. -06D-