Leyla Yunus NATO PA-nın seminarında etiraz aksiyası keçirib

Sülh və Demokratiya İnstitutunun  direktoru Leyla Yunus NATO Parlament Assambleyasının “Cənubi Qafqaz: çağırışlar və imkanlar” mövzusunda seminarında etiraz aksiyası keçirib.

Qısa fasilə zamanı L.Yunus Repressiyalara Müqavimət Mərkəzinin bəyanatının mətnini xarici iştirakçılar arasında yayıb. Onun tərəfdarları isə “Vicdan məhbuslarına azadlıq!” plakatını qaldırıblar.

“Ölkədə 130 siyasi repressiya qurbanının olduğu halda hansı avrointeqrasiyadan danışırsınız?”-o, qonaqlara müraciət edib. L.Yunus deyib onlardan 40-ı vicdan məhbusu, 90-ı siyasi məhbusdur. Bura 11 jurnalist və 4 hüquq müdafiəçisi daxildir.

Xarici nümayəndələrə müraciət edən L.Yunus qeyd edib ki, korrupsiya, avtoritarizm şəraitində yaşayan Azərbaycanın gələcəyi yoxdur.

ABŞ-ın keçmiş səfiri Metyu Brayzaya müraciət edən hüquq müdafiəçisi ümidvar olduğunu bildirib ki, Azərbaycanı tanıyan şəxs kimi o, öz çıxışında baş verənlərə qiymət verəcək.

“Hər il Azərbaycanda işğəncələrdən 10 nəfər həlak olur və bu cinayətlərə görə heç kim cavabdehlik daşımır. Məhkəmə sistemi korrupsiyaya uğrayıb və icra hakimiyyətinin nəzarəti altındadır”, - o vurğulayıb.

L.Yunus qeyd edib ki, “xalq diplomatityası” olmadan münaqişələrin nizamlanması mümkün deyil, lakin Azərbaycan hakimiyyəti repressiyalar yolu ilə bunu neytrallaşdırmağa çalışır.

“Jurnalist Rauf Mirqədirov Azərbaycan-Ermənistan birgə saytının layihəsində iştirakına görə casusluqda ittiham olunaraq həbs edilib.

Bu layihəni maliyyələşdirən Britaniya diplomatik missiyasının rəhbəri İrfan Siddit L.Yunusun “ayrılan vəsaitin Azərbaycan hakimiyyətinin bildirdiyi kimi “casusluq” fəaliyyətinə yönəldiyini hesab edirmi” sualına cavab verə bilməyib.

Sonra L.Yunus sərbəst hərəkət hüququnun pozulduğunu qeyd edərək özünün və Qadın Krizis Mərkəzinin rəhbəri Mətanət Əzizovanın ailə üzvlərinin ölkədən çıxışına qadağa qoyulmasını göstərib. M.Əzizova ona olan təzyiqlərə görə Azərbaycanı tərk etməli olub.

L.Yunus deyib: “Əliyev rejimi sizin susqunluğunuz şəraitində demokratiya ideyalarını məhv edir ki, bu da ölkəni acınacaqlı sonluğa gətirib çıxaracaq”.

Qeyd edək ki, L.Yunusun hərəkətinin qarşısını almaq üçün tədbir görülməyib. –0—