Manatın ucuzlaşması ticarətdə ajiotaj və bahalanma yaradıb

İqtisadiyyat və Sənaye Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti süni qiymət artımının qarşısını alacağını bəyan etsə də, şənbə və bazar günü istehlak bazarında bir sıra mal və xidmətlər bahalanıb.

Daha çox siqaret bahalanıb. Onların qiyməti markasından asılı olaraq 0,2 - 0,6 manat artıb. Bəzi yerlərdə siqaret 2 dəfə bahalanıb.

Bir çox supermarketlərdə kəskin bahalanma gözləyən əhali ilkin tələbat mallarını daha çox həcmdə almağa başlayıb. Bir sıra mağazalar isə ümumiyyətlə bağlanıb. Aviabiletlər kəskin bahalanıb. Bakı-İstanbul –Bakı və Bakı-Moskva-Bakı aviareyslərinə biletlər 260 manatdan 340 manata və 350 manatdan 470 manata bahalanıb.

Turizm firmaları turpaketlərin bahalanacağını bəyan edir.

Şənbə günü bir sıra apteklər də bağlanıb. Məlumdur ki, Azərbaycana əczaçılıq malları əsasən idxal edilir.

Şənbə günü axşamtərəfi banklar və mübadilə məntəqələri işini bərpa edib.

Dollar 1,04 manata alınıb, 1,055 manata satılıb. Avro ilə ticarət daha çox olub. Bu valyutanı banklar 1,18 manata alıb, satış 1,21-1,23 manata olub.

Müxalifət AMB-nin devalvasiya qərarını kəskin pisləyib.

AXCP sədri Әli Kərimli Mərkəzi Bankın qərarını “xalqın dövlət səviyyəsində aldadılaraq, soyulması” adlandırıb. "Bu gecə milyonlarla azərbaycanlı dövlət səviyyəsində qarət olunub”, deyə o, özünün facebook səhifəsində bildirib..

“Bu qərar o deməkdir ki, təkcə banklarda əmanətini manatla saxlayan əmanətçilər bu gecə 1 milyard dollardan artıq ziyana düşdülər. Əgər dünənə qədər vətəndaşlarımızın banklarda saxladığı 4 milyard manatdan artıq vəsait dollarla ifadədə 5 milyard dollardan da artıq idisə, bu gün həmin vəsaitlər 1 milyard azalaraq, 4 milyard dollara düşdü”, deyə Əli Kərimli düşünür. 

Onun fikrincə, «hakimiyyətin bu hərəkəti xalqın arzu və maraqlarının inkar edilməsidir ».

«Neçə müddətdir deyirik ki, ölkədə mətbuatın, azad fikrin, müxalifətçiliyin zorla zəiflədilməsi təkcə demokratiya uğrunda mübarizə aparan azadlıq mübarizlərinə ziyan vurmur. Xalqın əli-qolu, dili-ağzı bağlanırsa, bunun ziyanını hamı çəkəcək. Çünki xalqla hesablaşmaq məcburiyyəti hiss etməyən avtoritar hakimiyyətlər hər cür pisliklərə qadirdilər», - deyə Kərimli qeyd edir.

Öz növbəsində Müsavat Partiyası AMB-nin qərarını «xalqın maraqlarına zidd adlandırıb».

Partiyanın bəyanatında deyilir ki, manatın devalvasiyası korrupsioner rejimin rüşvət tələbləri altında çabalayan orta və kiçik sahibkarlığın məhvinə, ən əsası isə ərzaq, geyim və digər zəruri tələbat mallarının bahalanmasına səbəb olacaq».

Müsavat Partiyası manatın ABŞ dollarına nisbətdə qəfil olaraq 33,6 faiz dəyərsizləşdirilməsi haqqında Mərkəzi Bankın qərarını hökümətin iqtisadi siyasətinin iflası, Azərbaycanı gözləyən böyük iqtisadi böhranın “ilkin etirafı” kimi qiymətləndirir. Müsavat hesab edir ki, bu cür məsuliyyətsiz maliyyə siyasəti yeridən, həmçinin “ölkə iqtisadiyyatını ağır böhran şəraiti ilə üz-üzə qoyan səlahiyyətli şəxslər cinayət məsuliyyətinə cəlb edilməli, bütövlükdə İlham Əliyev hakimiyyəti bu məsuliyyətsiz davranışlarına görə xalq qarşısında cavab verməlidir».

REAL hərəkatının icraçı katibi, iqtisadçı ekspert Natiq Cəfərlinin fikrincə, AMB-nin qərarı ölkədə «dollarlaşma» yaradacaq. «Daşınmaz əmlak, maşın, qızıl, məişət əşyaları, mebel yenidən dollarla satılmağa başlayacaq, hətta, rüşvət də dollara keçəcək, Prezidentin müdaxiləsi ilə məzənnəyə müəyyən korreksiya edilə bilər, yəni siyasi gediş ola bilər, Amma 2015-də infilyasiya ikirəqəmli olacaq, ərzaq inflyasiyası 20-25% civarında olacaq, Bank və maliyyə-kredit sistemi stressə girəcək, bəzi banklar bağlanacaq, Dollarla ipoteka, avtomobil və istehlak krediti alanlar batacaq, onlara mütləq kömək lazımdır, gərək hökumət belə bir dəstək proqramı qəbul etsin», -  deyə Cəfərli Facebook səhifəsində yazıb.

Onun fikrincə, hökumət dərhal anti-böhran planının işlənməsinə başlamalı, bütün mütəxəssisləri cəlb etməli, ya da tam tərkibdə istefaya gedib, yeni texniki hökumətin yaradılmasına qərar verilməlidir.

«Vergi və gömrükdə olan rüşvət, müdaxilələr, inhisarçılıq dərhal yığışmalıdır, Ölkədə ciddi açılıma ehtiyac var, olmasa, bu proseslər xaosa yol aça bilər, xaos isə heç kimə lazım deyil», - deyə Cəfərli hesab edir.

Xatırladaq ki, Mərkəzi Bank fevralın 21-dən dolların manata nisbətən rəsmi məzənnəsini 1 dollar üçün 1,05 manat, avro üçün 1,19 manat səviyyəsində müəyyənləşdirib. Fevralın 20-də 1 dollar 0,78 manat idi. Manatın dollara nisbətdə məzənnəsi sutka ərzində 33,5%, avroya nisbətdə 30% düşüb. –06D--