Media-icmal 02.09.20

Rayonlarası yolların açılması, məmurun ərazini zəbt etməsi iddiaları, kirayə bazarında vəziyyət və s. məsələlər medianın aparıcı mövzuları sırasındadır...

Deputat deyir ki…

"Redaktor.az" "Rayonlara gediş-gəliş açılacaq – Məndə olan məlumata görə…" sərlövhəli məqalədə ölkədə koronavirus pandemiyasına qarşı mübarizəni əks etdirir.

"Hazırda koronavirusla bağlı vəziyyət nəzarət altındadır. Belə davam edərsə, karantin rejimini daha da uzatmağa ehtiyac olmayacaq", millət vəkili Asim Mollazadə koronavirusla bağlı danışarkən bele deyib. O, yumşaldılmalarla parelel nəzarətin artırılmasının da vacib olduğunu bildirib: 

"Düşünürəm ki, koronavirusla bağlı vəziyyəti bir müddət belə saxlmaq mümkün olsa, yaxın vaxtlarda müxtəlif yumşaldılmalara, həmçinin rayonlara gediş-gəlişin açılmasına da icazə vermək olar.

Məndə olan məlumata görə, bu məsələ ilə bağlı mütəxəssislər və Operativ Qərargah hazırda müzakirələr aparır. Yəqin ki, mövcud vəziyyət geniş şəkildə analiz olunduqdan sonra bu məsələ ilə bağlı yekun qərar veriləcək.

Amma bir məsələ də var ki, yumşaldılma olan kimi virusa yoluxanların sayında artım müşahidə olunur. Bu məsələlərdə maksimum dərəcədə diqqətli və ehtiyatlı olmaq lazımdır". 

Əli Həsənov ərazi zəbt edib?

"Yenisabah.az" "Əli Həsənov "Azərbaycan" Nəşriyyatının ərazisini zəbt edib - Baş direktordan şok açıqlama sərlövhəli məqalə diqqəti cəlb edir.

Prezidentin sabiq köməkçisi Əli Həsənov 2006-2007-cı illərdə "Azərbaycan" Nəşriyyatının ərazisini zəbt edərək özünə bina tikdirib. 

Müəllifə görə, hazırda Beynəlxalq Mətbuat Mərkəzinin yerləşdiyi bina "Azərbaycan" Nəşriyyatının ərazisində yerləşir. Əli Həsənov Prezident Administrasiyasının şöbə müdiri vəzifəsində çalışan zaman "Azərbaycan" Nəşriyyatının baş direktoru Ağabəy Əsgərovdan həmin ərazini istəyib və sözügedən ərazidə bir neçə bina inşa etdirib. Onlardan biri isə indiki Beynəlxalq Mətbuat Mərkəzi adlanan binadır. 

Məsələ ilə bağlı "Azərbaycan" Nəşriyyatının baş direktoru Ağabəy Əsgərovun fikirlərini öyrəndik. 

Ağabəy Əsgərov deyib: "Məgər nəşriyyatın binası mənim dədəmin, babamındır ki, kiməsə verim? O vaxtı dövlət tərəfindən elə məsələhət oldu ki, nəşriyyatın ərazisində Əli Həsənova yer verilsin. Əli Həsənov həmin ərazidə mətbuat evi tikib. Yenə deyirəm ki, onu Əli Həsənova mən verməmişəm, dövlət tərəfindən verilib. Axı mən kiməm ki, Əli Həsənova ərazi verim, ora mənim dədəmin, babamın yeri deyil. Bu məsələnin mənə heç bir bağlılığı yoxdur".

Kirayə bazarında vəziyyət necədir?

"Metbuat.az" saytında yer alan "Kirayədə yaşayanlar, diqqət" sərlövhəli məqalədə müəllif karantin rejimi dövründə iyul ayı ərzində daşınmaz əmlak bazarında vəziyyəti təhlil edir.

O deyir ki, iyul ayında bazarda 971 ədəd kirayə mənzil olub. Onlar arasında aparılan təhlil göstərir ki, ötən ay bir mənzilin aylıq kirayəsinin ortalama qiyməti 842 manatdan 765 manata düşüb. Faizlə desək, iyul ayı ərzində kirayə mənzillərin qiyməti 9,14% azalıb.

Qeyd edək ki, Nazirlər Kabinetinin qərarı ilə tədris prossesində bir qədər yumşalmalar oldu. Bəs, universitetlərin açılmaması kirayə mənzillərin qiymətinə öz təsirini necə göstərəcək?

Əmlak məsələləri üzrə ekspert Nüsrət İbrahimli açıqlamasında bildirib ki, hələki kirayə mənzil bazarında qiymətlərdə azalma müşahidə edilir: "Kirayə mənzillərə tələb artsa, qiymətlərdə əvvəl stabilləşmə olacaq. Daha sonra isə qiymətlərin əvvəlki formasına dönməsi müşahidə ediləcək. Amma qeyd etdiyim kimi, hələ qiymətlərdə azalma davam edir".

Ekspertin sözlərinə görə, qiymət dəyişimi tələblə bağlı bir məsələdir: "Tədris prossesi ilə bağlı verilən qərarlardan görünür ki, hələ oktyabr ayından yalnız birinci kurslar dərsə başlayacaq. Onların bölgələrdən şəhərə gəlməsi ilə büdcə tamamlanmır. Tələb çox olduğu təqdirdə, kirayə mənzil bazarında da qiymətlər dəyişəcək".