Media-icmal 03.02.16

“Azərbaycan” qəzeti dövlət başçısı İlham Əliyevin Birləşmiş Ərəb Əmirliklərinə səfəri haqda yazıları ilk səhifədə yerləşdirib.    

Prezidentin köməkçisi Əli Həsənovun Quba ictimaiyyətilə görüşündəki çıxışın mətni dərc edilib. Əli Həsənov çıxışını nikbin notlar üstə qurub. “Ölkə postneft dövrünə qədəm qoyub, neftdən gələn gəlirlər ölkənin qeyri-neft sektorunun inkişafına, “qara qızıl”ın insan kapitalına yönəldiyini” bildirib. Ə.Həsənov böyük “neft pulları” daxil olan zaman bir çox vacib məsələlər kimi gənclərin xaricdə təhsil məsələsinin  təmin edildiyini bildirib.

“İdxalın fantastik həddə azalması böhranı daha da dərinləşdirəcək”, - “Azadlıq” belə yazır və bunu “ölkənin qıtlıq və bahalaşma ərəfəsində olması” hesab edir.

Qəzet Dövlət Gömrük Komitəsinin sədr müavini Mirqasım Vahabova isnadən bu ilin yanvarında idxalın 65-70% azaldığının bildirir.   Komitə sədrinin müavini bu il ölkə idxalının 5 milyard dollardan artıq olmayacağını deyib. “Proqnozlara görə, idxal keçən il ilə eyni olmayacaq, artım olarsa komitə vergi və rüsumları toplayıb dövlət büdcəsinə köçürəcək”, - M.Vahabov bildirib.

Ekspertlər isə bu azalmaya bir neçə səbəb göstərirlər. Bunun biri də devalvasiyadan sonra xeyli sayda ticarət obyektinin fəaliyyətini dayandırması,  bizneslərin xaricə köçürülməsidir. “Lakin bunu da nəzərdən qaçırmaq olmaz ki, ölkədə idxal sahəsi oliqarxların nəzarətindədir və hansısa sıradan bir sahibkarın ölkəyə məhsul idxalı idxal mafiyasının razılığı olmadan mümkün deyil”, - qəzet yazır.

Qəzetə görə, büdcəyə daha 2 milyard cəlb olunması ilə bağlı komitənin də öhdəliyi var bu açıqlama ilə hökumətə üzərinə düşən öhdəliyi yerinə yetiə bilməyəcəyi mesajı verir.

İndiki yaranmış böhran vəziyyətində “Exo” “Ölkədən beyin axınının qarşısını necə alaq?” sualını gündəmə gətirir.

Müəllif S.Əliyev ekspertlərə isnadən “ölkədə o qədər də sadə olmayan iqtisadi vəziyyətə görə yüksək ixtisaslı mütəxəssislərin ölkədən axını kimi təxribat yarada biləcəyi” barədə xəbərdarlıq edir. “Bütünlükdə Azərbaycanda beyin axını XX əsrin 90-cı illərinin ortasında qeydə alınıb, amma həmin irimiqyaslı axını müşahidə etsək də sonrakı nəticələrini müşahidə etmədik”, - müəllif bir çox sahələrdə mütəxəssislərin olmamasını həmin o vaxtkı axının nəticəsi hesab edir.    

“Ölkə valyutası getməkdə davam edir” “Novoe Vremya” qəzeti bununla Mərkəzi Bankın yanvar ayında 618 milyon dollar itirməsini önə çəkir.

Müəllif R.Vəliyev bu proseslərdən xalqın demək olar ki. xəbərsiz qaldığını xüsusi vurğulayır. “Sadə deyək ki, neftdən asılılıq çox böyükdür, nə qədər anlamaz olmaq lazımdır ki, manatın üzərinə gələn təhlükəni görməyəsən. Tədiyyə balansında profisit, ölkə rəhbərliyinin iradəsi manatın kursunu sabit saxlayır. Amma bu həlledici faktorlar uzun müddət davam edə bilməz”, -  müəllif manatın liberallaşdırılmasını vacib sayır.

Hazırda həbsdə olan Beynəlxalq Bankın keçmiş rəhbəri Cahangir Hacıyev maliyyə naziri Samir Şərifov və Mərkəzi Bankın rəhbəri Elman Rüstəmovla üzləşdirilməsini istəyir, əgər belə olsa böyük maliyyə cinayətlərilə bağlı həbslərin dairəsi daha da genişlənəcək, “Yeni Müsavat” da dərc edilən müəllif yazısında E.Hüseynov bunu bildirir. C.Hacıyev bu üzləşmə baş tutduğu halda onun protokollaşdırılmasını istəyir. Həbsdə olan bankir hər iki məmura “vaxt var idi qabağımda farağat dayanırdınız” mesajını da göndərib.   Müəllif isə Beynəlxalq Bankın səhmlərinin 51%-nin dövlətə məxsus və Müşahidə Şurasının sədri Şamir Şərifov olduğu üçün üzləşmə olmasını normal sayır. Müəllifə görə, C.Hacıyevin “vaxt var idi qabağımda farağat dayanırdınız” mesajı hər iki məmura üzləşməyə etiraz etməmək notlarıdır.

“Gəncliyimiz yaşamır, sürünür”, - “Bizim Yol” un sorğusunda iştirak edən gənclər ortaq qənaət ifadə ediblər. Gənclər əsas problemləri kimi ev, iş problemlərinin olduğunu, çoxları  isə gələcəyə ümidlərinin olmadığını bildiriblər.

“Bu gün gənclik üçün ən böyük problem işsizlikdir və bu mənada yeni düçüncə ilə köhnə düşüncənin toqquşmasından gənclik əziyyət çəkir”, - İsmayıl Qurbanov adlı gənc bildirir.    

Gənc ictimai-siyasi fəal Ülvi Həsənli isə gəncliyin azadlıq, təhsil və sosial təminat kimi problemlərinin olduğunu qeyd edib.