Media-icmal 03.10.20

“Azərbaycan” qəzeti  “Hərb tariximizə yeni şanlı səhifələr yazılır” sərlövhəli məqalədə Ermənistan-Azərbaycan arasındakı müharibənin mahiyyətini dəyərləndirir.

Müəllif  vurğulayır ki, Ermənistanın Azərbaycan torpaqlarını işğal etməsi Azərbaycanı müharibəyə vadar edib və 30 ildir davam edən işğala son qoyulmalıdır.            

Yazı müəllifi əlavə edir ki, BMT Təhlükəsizlik Şurasının Ermənistanın işğal etdiyi Azərbaycan torpaqlarından çıxması barədə 4 qətnaməsi,  ATƏT-in Minsk Qrupunun 26 illik vasitəçilik missiyası nəitcə vermir və buna görə də müharibə qaçılmaz olub. 

Müəllifə görə, 30 illik sülh danışıqları nəticə vermədiyi üçün müharibə labüdə çevrilib.

“Ölkəmizin bütün əhalisi dövlət başçısının və hərbçilərimizin haqq yolunda olduğuna, dədə-baba torpaqlarımızın işğaldan azad ediləcəyinə, nəhayət, ədalətin zəfər çalacağına tam əmindirlər. Bu əminlik həm də ondan irəli gəlir ki, hər bir vətəndaş ölkəmizin özünü müdafiə etdiyinə, hərbçilərimizin əks-hücumlarda peşəkarlığına, Azərbaycanın hərb tarixinə şanlı səhifələr yazan rəşadətli ordumuzun gücünə inanır”, - müəllif bildirir.

“Yenisabah.az” saytı “Ermənistan PKK, ASALA və digər terror təşkilatlarına qucaq açdı” sərlövhəli məqalədə erməni tərəfin qanunsuz məskunlaşdırma siyasəti apardığını dəyərləndirir.

“Ermənistan silahlı qüvvələrinin təxribatlarına cavab olaraq əks-hücum əməliyyatına başlamışdan əvvəl rəsmi İrəvanın Dağlıq Qarabağ və işğal olunmuş ətraf rayonlarda qanunsuz məskunlaşdırma siyasətinə dair təkzibedilməz faktlar üzə çıxdı. Məlum oldu ki, Ermənistan Livanda yaşayan erməni ailələrini işğal olunmuş ərazılərə köçürür. Bununla bağlı hətta sosial şəbəkələrin erməni seqmentində də fotolar yayılmışdı”.

Müəllifə görə, məsələnin ən xoşagəlməz tərəfi  budur ki, Ermənistan  məskunlaşdırma siyasəti çərçivəsində bölgəyə terrorçu qruplar və muzdlu döyüşçülər toplayır.

Müəllif  əlavə edib ki, rəsmi İrəvan bu təcrübədən Dağlıq Qarabağ və ətraf rayonların işğalı zamanı da istifadə edib. “Gələn məlumatlara görə, Ermənistan bu dəfə Dağlıq Qarabağ və ətraf rayonlara PKK, ASALA və bu kimi terrorçu təşkilatların xüsusi dəstələrini köçürüb”.

Yazı müəllifinin deməsinə görə, Ermənistan terrorçuları və muzdluları “könüllü dəstələr” adı ilə təqdim edir. Lakin faktlar göstərir ki, Ermənistanda Dağlıq Qarabağda könüllü döyüşmək istəyən demək olar ki, yoxdur”

Müəllif hesab edir ki, rəsmi İrəvanın terrorçu qrupları döyüşlərə cəlb etməsi Ermənistanın dövlət olaraq terrorçu mahiyyətini ortaya qoyur. Yeri gəlmişkən, rəsmi Bakı dəfələrlə dünyanı bu barədə məlumatlandırıb.

“Bizimyolinfo.az” saytı isə “Ekspert: “Ermənistanın Azərbaycanla müharibəyə iqtisadi gücü çatmaz" sərlövhəli məqalədə aparılan müharibənin iqtisadi tərəfləri barədə danışılır.

Müəllif bu mövzu barədə Milli Məclisin İqtisadi siyasət, sənaye və sahibkarlıq komissiyasının sədri Tahir Mirkişili ilə söhbətləşir.

Müəllif  ekspertlərə istinadən deyir ki, Ermənistanın hələ iyul ayında Azərbaycanla sərhəd bölgəsində törətdiyi hərbi təxribatlar da  iqtisadi əsaslı olub, xalqın diqqətini tənəzzül və böhrandan yayındırmaq məqsədi güdüb.

Müəllif deyir ki, bir tərəfdən təxribatlar törədən və hərbi əməliyyatlara səbəb olan Ermənistan digər tərəfdən də müharibənin saxlanmasına səy göstərir, səbəb də budur ki, hərbi əməliyyatlar aparmağa iqtisadi gücü yoxdur. 

“Təhlillərə görə, Ermənistan iqtisadi nöqteyi-nəzərdən qısamüddətli hərbi əməliyyatlar belə aparmaq iqtidarında deyil. Təxmini məlumatlara əsasən ötən günlər ərzində Ermənistan dəyəri 1 milyard dollardan çox olan hərbi texnika itirib. Döyüş əməliyyatları gündə milyonlarla dollara başa gəlir, Ermənistanın isə belə bir imkanları yoxdur”, – Milli Məclisin İqtisadi siyasət, sənaye və sahibkarlıq komitəsinin sədri, deputat Tahir Mirkişili qeyd edib.

Deputat bunu da diqqətə çatdırır ki, Azərbaycan iqtisadiyyatı Ermənistan iqtisadiyyatından üçqat, müdafiə büdcələri baxımından isə dördqat üstündür.

T.Mirkişili əlavə edir ki, Azərbaycanın müdafiə büdcəsi 2,3 milyard ABŞ dolları, Ermənistanınkı isə 658 milyon dollar, Ermənistanın strateji ehtiyatları 2,6 milyard dollar, Azərbaycanın ehtiyatları isə 52 milayrd dollardır.

Deputat sonda deyir ki, Ermənistan Azərbaycana qarşı ciddi müharibə aparmaq üçün nə hərbi, nə də iqtisadi imkanlara malikdir, bu hərbi qarşıdurmanın hər günü işğalçı ölkəni labüd iqtisadi fəlakətə bir az da yaxınlaşdırır.

“Moderator.az” saytı isə “Azərbaycana qarşı düşmən münasibət bəsləyən dövlət necə həmsədr ola bilər..?” sərlövhəli məqalədə Ermənistan-Azərbaycan müharibəsinin siyasi aspektləri ətrafında konfliktoloq Elxan Mehdiyevlə müzakirə aparır.

E.Mehdiyev Fransa prezidenti Makronun Avropa İttifaqı dövlət başçılarının görüşündə Türkiyədən və özəlliklə Qaziantepdən Azərbaycana cihadçı terrorçuların göndərilməsi barədə bəyanat səsləndirməsini məsuliyyətsizlik adlandırır.

Ekspert əlavə edir ki, elə bu yalan bəyanata görə Makron Azərbaycanın düşməninə çevrilib: “Bu cür mövqe tutan bir ölkə necə həmsədr – vasitəçi ola bilər? Azərbaycan həmən ona etiraz etməli və sərt şəkildə onun hərəkətlərini pisləməlidir, Fransanın vasitəçilik missiyasından imtina edilməlidir”, - o bildirir.

E.Mehdiyevə görə, Ermənistanın fikirləşdiyi bu cür primitiv addım artıq Fransanın rəsmi siyasətinə çevrilib, Rusiyanı da bu işə daxil ediblər və  Azərbaycan höküməti sərt cavab verməsə, o daha da azğınlaşacaq.

ATƏT-in Minsk Qrupunun həmsərdləri olan dövlətlərin prezidentlərinin bəyanatına gəlincə, ekspert deyir ki, bəyanat da Makronun təşəbbüsü ilə hazırlanıb və Rusiya ilə koordinasiya edilib.

“Əgər o, (Makron-red.) Azərbaycana qarşı bu cür düşmən münasibət bəsləyirsə, bu cür dövlət necə tərəfsiz adlandırılan həmsədr ola bilər? Dərhal onun vasitəçiliyinə son verilməlidir. Bu elə Azərbaycandan asılı olan məsələdir. Əgər o, işğalçını dəstəkləyirsə, ona da aşağılayıcı cavab bu cür addım olmalıdır. 

Azərbaycan ordusu özünün VƏTƏN müharibəsini davam etdirməlidr”.